സാമ്പത്തിക സംവരണ ഭേദഗതി ബില്‍ രാജ്യസഭയില്‍ പാസാക്കി. മന്ത്രി തവര്‍ചന്ദ് ഗെഹ്ലോട്ടാണ് ബില്‍ അവതരിപ്പിച്ചത്.ബില്‍ സെലക്ട് കമ്മിറ്റിക്ക് വിടണമെന്ന ആവശ്യവുമായി പ്രതിപക്ഷ പാര്‍ട്ടികള്‍ രംഗത്തെത്തി. എന്നാല്‍ അത് 7നെതിരെ 141 വോട്ടിനിട്ട് തള്ളി. ബില്ലിന്റെ വിജയം മോഡിയുടെ വിജയം കൂടിയാണ്.

ബില്‍ പൂര്‍ണമല്ല. എന്താണ് നിങ്ങള്‍ക്ക് ഇത്ര ധൃതിയെന്നും കോണ്‍ഗ്രസ് നേതാവ് മധുസൂദനന്‍ മിസ്ത്രി ചോദിച്ചു. ബില്ലില്‍ കൂടുതല്‍ ചര്‍ച്ച വേണമെന്നാവശ്യപ്പെട്ട് പ്രതിപക്ഷ പാര്‍ട്ടികള്‍ നടുത്തളത്തിലിറങ്ങി പ്രതിഷേധിച്ചു. ബഹളത്തെ തുടര്‍ന്ന് രാജ്യസഭ രണ്ടു മണി വരെ നിര്‍ത്തിവെച്ചു.

ബില്‍ ലോക്‌സഭയില്‍ അവതരിപ്പിച്ചപ്പോള്‍ കോണ്‍ഗ്രസും ഇടതുപാര്‍ട്ടികളും അനുകൂലിച്ച് വോട്ട് ചെയ്തിരുന്നു. ബില്‍ തടയുന്നതിന് കോണ്‍ഗ്രസ് സാങ്കേതിക പ്രശ്‌നങ്ങളുയര്‍ത്തുകയാണെന്ന് ബിജെപി എംപി വിജയ് ഗോയല്‍ പറഞ്ഞു. നിങ്ങള്‍ ബില്ലിനെ തുറന്ന് എതിര്‍ക്കുകയാണെങ്കില്‍ അത് വ്യത്യസ്തമാണ്. അതല്ലങ്കില്‍ ബില്‍ ഇതിനകം അവതരിക്കപ്പെട്ടതിനാല്‍ നമുക്ക് ചര്‍ച്ചയാവാമെന്നും അദ്ദേഹം പറഞ്ഞു.

ഈ ബില്‍ രാജ്യത്തെ ദരിദ്രരെ ഉയര്‍ത്തിപ്പിടിക്കുമെന്ന പരിഗണനയോടെ എടുത്ത തീരുമാനമാണിതെന്നും ബില്‍ അവതരിപ്പിച്ച്‌ക്കൊണ്ട് മന്ത്രി തവര്‍ചന്ദ് ഗെഹ്ലോട്ട് പറഞ്ഞു. മൂന്നിനെതിരേ 323 വോട്ടുകള്‍ക്കാണ് ബില്‍ ലോക്‌സഭയില്‍ പാസാക്കിയത്.

അതേസമയം പൗരത്വ ബില്ലിനെതിരെ രാജ്യസഭയില്‍ ബഹളമുണ്ടായി. പ്രതിപക്ഷം നടുത്തളത്തില്‍ പ്രതിഷേധിച്ചതോടെ സഭ 12 മണിവരെ നിര്‍ത്തി വച്ചു. പാര്‍ലമെന്റിന് പുറത്ത് പ്രതിഷേധം കനക്കുന്നതിനിടെ പൗരത്വ ബില്‍ ലോക് സഭ ഇന്നലെ പാസാക്കിയിരുന്നു. അഫ്ഗാനിസ്ഥാന്‍, ബംഗ്ലാദേശ്, പാകിസ്താന്‍ എന്നീ രാജ്യങ്ങളില്‍ നിന്നും കുടിയേറിയ ന്യൂനപക്ഷങ്ങള്‍, ഹിന്ദുക്കള്‍, സിക്ക്, ബുദ്ധമതം, ജൈനന്‍മാര്‍, പാഴ്‌സികള്‍, ക്രിസ്ത്യാനികള്‍ എന്നിവര്‍ക്ക് പൗരത്വം നല്‍കുക എന്ന ലക്ഷ്യത്തോടെയാണ് 1985ലെ പൗരത്വ നിയമത്തെ ഭേദഗതി ചെയ്യാന്‍ തീരുമാനമായത്.

1971ന് ശേഷം ഇന്ത്യയിലേക്ക് കുടിയേറി എല്ലാ വിദേശപൗരന്‍മാരേയും തിരിച്ചയക്കാനാണ് 1985ലെ അസം ആക്ട് നിര്‍ദേശിക്കുന്നത്. 2014 ഡിസംബര്‍ 31ന് മുമ്പ് ഇന്ത്യയിലെത്തിയവര്‍ക്കാണ് പൗരത്വം നല്‍കുക. സര്‍ക്കാരിന്റെ നീക്കം 1985 അസ്സം ഉടമ്പടിയുടെ ലംഘനമാണെന്ന് പ്രതിപക്ഷ കക്ഷികളടക്കം വിമര്‍ശനം ഉയര്‍ത്തിയിരുന്നു.