മാധ്യമപ്രവര്‍ത്തകന്‍ റാം ചന്ദര്‍ ഛത്രപതിയെ വധിച്ച കേസില്‍ ആള്‍ദൈവം ഗുര്‍മീത് റാം റഹീമും മറ്റ് മൂന്ന് പേരും കുറ്റക്കാരാണെന്ന് പഞ്ചകുല കോടതി വിധിച്ചു. ജനുവരി 17ന് പ്രതികള്‍ക്കുള്ള ശിക്ഷ കോടതി പ്രഖ്യാപിക്കും.

കേസിലെ മറ്റ് മൂന്ന് പ്രതികളെയും ഇന്ന് കോടതിയില്‍ ഹാജരാക്കി. സുരക്ഷ പരിഗണിച്ച്‌ ജയിലില്‍ കഴിയുന്ന റാം റഹീമിനെ വീഡിയോ കോണ്‍ഫറന്‍സിംഗിലൂടെയാണ് കോടതി വിധി കേള്‍പ്പിച്ചത്. 2002-ലാണ് മാധ്യമപ്രവര്‍ത്തകന്‍ കൊല്ലപ്പെട്ട സംഭവം നടന്നത്.

കേസില്‍ റാം റഹീം കുറ്റക്കാരനാണെന്ന കോടതി വിധിയുണ്ടായതിന് പിന്നാലെ ഹരിയാനയില്‍ പോലീസ് സുരക്ഷ ശക്തമാക്കിയിട്ടുണ്ട്. റാം റഹീമിന്‍റെ ദേര സച്ച സൗദ എന്ന സംഘടനയിലെ അനുയായികള്‍ തെരുവിലിറങ്ങുമോ എന്ന ആശങ്കയിലാണ് സുരക്ഷ വര്‍ധിപ്പിച്ചത്. പഞ്ചകുളലയില്‍ ജില്ലാ ഭരണകൂടം നിരോധനാജ്ഞയും പുറപ്പെടുവിച്ചിട്ടുണ്ട്.

2017 ഓഗസ്റ്റ് 25ന് ലൈംഗിക പീഡനക്കേസില്‍ അറസ്റ്റിലായ റാം റഹീം 20 വര്‍ഷം തടവിന് ശിക്ഷിക്കപ്പെട്ട് റോഹ്തകിലെ സുനാരിയ ജയിലില്‍ ശിക്ഷ അനുഭവിക്കുകയാണ്. ഇയാളെ അറസ്റ്റ് ചെയ്തതിന് പിന്നാലെ ഹരിയാനയില്‍ വന്‍ കലാപം പൊട്ടിപ്പുറപ്പെട്ടിരുന്നു. സംഘര്‍ഷങ്ങളില്‍ നിരവധി പേര്‍ മരിക്കുകയും വാഹനങ്ങള്‍ അഗ്നിക്കിരയാകുകയും ചെയ്തു.

അനുയായികളായ രണ്ടു സ്ത്രീകളെ പീഡിപ്പിച്ച കേസില്‍ ശിക്ഷ അനുഭവിക്കുന്നതിനിടെയാണ് മാധ്യമപ്രവര്‍ത്തകനെ വധിച്ച കേസിലും വിധി വരാന്‍ പോകുന്നത്. 51 വയസുകാരനായ റാം റഹീമിനെതിരേ നിരവധി കേസുകള്‍ ഇപ്പോള്‍ നിലവിലുണ്ട്.

സിര്‍സയിലെ ദേര സച്ച സൗദയുടെ ആസ്ഥാനത്ത് റാം റഹീം നിരവധി സ്ത്രീകളെ ലൈംഗികമായി ഉപയോഗിക്കുന്നുവെന്ന റിപ്പോര്‍ട്ടുകള്‍ക്ക് പിന്നാലെയാണ് പൂര സച്ച്‌ എന്ന പ്രസിദ്ധീകരണത്തിലെ മാധ്യമപ്രവര്‍ത്തകന്‍ റാം ചന്ദര്‍ ഛത്രപതി കൊല്ലപ്പെടുന്നത്. 2003-ല്‍ സംഭവവുമായി ബന്ധപ്പെട്ട് പോലീസ് കേസ് രജിസ്റ്റര്‍ ചെയ്തു. 2006-ല്‍ കേസ് സിബിഐക്ക് കൈമാറിയിരുന്നു.