ഇന്ത്യന്‍ രാഷ്ട്രീയ ചരിത്രത്തില്‍ അടയാളപ്പെടുത്തിയ സ്വാതന്ത്ര്യസമര പോരാളിയാണ് മോഹന്‍ ദാസ് കരംചന്ദ് ഗാന്ധി. എന്നാല്‍ അദ്ദേഹത്തിന് രാഷ്ട്രപിതാവ് പദവി നല്‍കേണ്ടിയിരുന്നില്ലെന്ന് എഴുത്തുകാരിയും സാമൂഹ്യപ്രവര്‍ത്തകയുമായ അരുന്ധതി റോയ് അഭിപ്രായപ്പെട്ടു. കോഴിക്കോട് ഡി.സി ബുക്സ് സംഘടിപ്പിച്ച കേരളാ ലിറ്ററേച്ചര്‍ ഫെസ്റ്രിവലില്‍ സംസാരിക്കുകയായിരുന്നു അദ്ദേഹം.

'സാഹിത്യത്തിന്റെ രാഷ്ട്രീയം' എന്ന വിഷയത്തിലാണ് തന്റെ നിലപാടുകള്‍ അരുന്ധതി റോയ് തുറന്നു പറഞ്ഞത്. ഗാന്ധിയുടെ വംശീയ മുന്‍വിധിയെക്കുറിച്ചുള്ള കാര്യങ്ങള്‍ ഇപ്പോഴാണ് കൂടുതല്‍ വെളിപ്പെട്ട് വരുന്നത്. ജാതിവ്യവസ്ഥയുമായി ബന്ധപ്പെട്ട് അംബേദ്കറിന്റെ വാദത്തിന് മുന്നില്‍ ഫലപ്രദമായ ഒരു മറുവാദം ഉയര്‍ത്താന്‍ ഗാന്ധിക്ക് കഴിഞ്ഞില്ല. ഗാന്ധി ഇന്ത്യന്‍ രാഷ്ട്രീയത്തിലെ ബുദ്ധിശാലിയായിരുന്നു എന്ന കാര്യത്തില്‍സംശയമില്ല. മാത്രമല്ല ഇന്ത്യയില്‍ രാഷ്ട്രീയത്തെ സ്വാധീനിക്കാനുള്ള കഴിവും അദ്ദേഹത്തിന് ഉണ്ടായിരുന്നു. എന്നാല്‍ ജാതിവ്യവസ്ഥയെക്കുറിച്ചും വംശീയ വിവേചനത്തെക്കുറിച്ചുമുള്ള ഗാന്ധിയുടെ നിലപാടുകള്‍ പരിശോധിക്കേണ്ടണെന്നും അരുന്ധതി വ്യക്തമാക്കി.

ഗാന്ധി നടത്തിയ ആഫ്രിക്കയിലെ സമരങ്ങള്‍ മിക്കതും കറുത്ത വര്‍ഗക്കാരെയും ഇന്ത്യക്കാരെയും ഒരേപോലെ കാണുന്നതിനെതിരെയായിരുന്നു. ബ്രിട്ടീഷുകാരും ഇന്ത്യക്കാരും ഒന്നിച്ചു നില്‍ക്കേണ്ടവരാണെന്ന തരത്തിലായിരുന്നു ഗാന്ധിയുടെ ആദ്യ നിലപാട്. ഇക്കാര്യം കൂടുതല്‍ ചര്‍ച്ച ചെയ്യപ്പെട്ടത് കൊണ്ടാണ് ഘാന സര്‍വകലാശാലയില്‍ ഗാന്ധിയുടെ പ്രതിമ നീക്കം ചെയ്യാന്‍ വേണ്ടി സമരം നടന്നത്. ഗാന്ധിയുടെ ചില നിലപാടുകള്‍ ചരിത്രപരമായി തെറ്റാണെന്നും അരുന്ധതി റോയ് കൂട്ടിച്ചേര്‍ത്തു.