മേഘാലയയിലെ ഈസ്റ്റ് ജയന്തിയ ഹില്‍സിലുള്ള അനധികൃത ഖനിയില്‍ 15 തൊളിലാളികള്‍ അകപ്പെട്ടിട്ട് ഒരു മാസമാകുന്നു. അനധികൃത കല്‍ക്കരി ഖനിയില്‍ ഡിസംബര്‍ 13നാണ് 15 തൊഴിലാളികള്‍ കുടുങ്ങിയത്. ഇവരെ ജീവനോടെ രക്ഷിക്കാനാകുമെന്ന പ്രതീക്ഷകള്‍ എന്നേ അസ്തമിച്ചെങ്കിലും ഏതെങ്കിലും ഒരാളുടെ മൃതദേഹമെങ്കിലും കണ്ടെടുക്കാനാകുമോ എന്ന പ്രതീക്ഷയും കൈവിട്ട അവസ്ഥയിലാണ് ഇപ്പോള്‍ രക്ഷാപ്രവര്‍ത്തകര്‍. തൊഴിലാളികളുടെ മൃതദേഹം കണ്ടെത്താനുള്ള ശ്രമങ്ങള്‍ ഇപ്പോഴും തുടരുന്നുണ്ട്.

എന്നാല്‍ ഈ 15 പേരുടെ നിലവിലെ സ്ഥിതി പോലും അറിയാന്‍ സാധിക്കാത്ത അവസ്ഥയില്‍ തെരച്ചില്‍ അടുത്തുതന്നെ അവസാനിപ്പിക്കാനാണ് സാധ്യതയെന്ന് സര്‍ക്കാര്‍ വൃത്തങ്ങള്‍ സൂചിപ്പിക്കുന്നു. ഖനിയിലെ വെള്ളം വറ്റിക്കാനുള്ള ശ്രമങ്ങള്‍ പൂര്‍ണ പരാജയമായിരുന്നു.
ലക്ഷക്കണക്കിന് ലിറ്റര്‍ വെള്ളം പുറത്തേക്ക് ഒഴുക്കിക്കളഞ്ഞെങ്കിലും ഖനിയിലെ ജലനിരപ്പ് ഇപ്പോഴും മാറ്റമില്ലാതെ തുടരുന്നതാണ് രക്ഷാപ്രവര്‍ത്തനങ്ങള്‍ക്ക് വിലങ്ങു തടിയായത്. ഇന്ത്യന്‍ നാവിക സേന, കോള്‍ ഇന്ത്യ, എന്‍.ഡി.ആര്‍.എഫ്, ഒഡിഷ അഗ്‌നിശമന സേന എന്നിവിടങ്ങളില്‍ നിന്നുള്ള 200 ഓളം രക്ഷാപ്രവര്‍ത്തകര്‍ പ്രദേശത്ത് തമ്പടിച്ച് തെരച്ചില്‍ നടത്തുന്നുണ്ട്.
സ്വകാര്യ പമ്പ് നിര്‍മാതാക്കളായ കിര്‍ലോസ്‌ക്കറും രക്ഷാപ്രവര്‍ത്തനത്തില്‍ പങ്കാളിയാണ്. രക്ഷാപ്രവര്‍ത്തനം തുടരണമെന്നും അത്ഭുതങ്ങള്‍ സംഭവിച്ച് ഒരാളെയെങ്കിലും ജീവനോടെ രക്ഷിക്കാനായാലോ എന്നും വെള്ളിയഴ്ച സുപ്രീംകോടതി ചോദിച്ചിരുന്നു. കൂടാതെ അനധികൃത ഖനി ഉടമകള്‍ക്കെതിരെ എന്ത് നടപടികളാണ് സ്വീകരിച്ചതെന്നും കോടതി സര്‍ക്കാറിനോട് ആരാഞ്ഞിരുന്നു. 320 അടി താഴ്ചയുള്ള ഖനിയില്‍ ഡിസംബര്‍ 13 നാണ് 15 തൊഴിലാളികള്‍ കുടുങ്ങിയത്. തൊഴിലാളികള്‍ പണിയെടുക്കുന്നതിനിടെ ഖനിയുടെ ഒരു ഭാഗം തകര്‍ന്ന് വീഴുകയായിരുന്നു. സമീപത്തെ നദിയില്‍ നിന്നുള്ള വെള്ളം തകര്‍ന്ന ഭാഗത്തുകൂടെ ഖനിയിലേക്ക് ഒഴുകാനും തുടങ്ങി. കൂടാതെ നദിയില്‍ വെള്ളപ്പൊക്കവുമുണ്ടായി.

അതോടെ ഖനിയില്‍ 70 അടിയിലേറെ വെള്ളം ഉയരുകയും അത് വറ്റിക്കുന്നതില്‍ അധികൃതര്‍ പരാജയപ്പെടുകയുമായിരുന്നു. കല്‍ക്കരിയുമായി കൂടിക്കലര്‍ന്ന് കറുത്ത നിറത്തിലുള്ള വെള്ളമായതിനാല്‍ തന്നെ വെള്ളത്തില്‍ കാഴ്ച കുറയുന്നതും രക്ഷാപ്രവര്‍ത്തകര്‍ക്ക് തടസമായി. എലിമടകള്‍ പോലെ ധാരാളം ഇടുങ്ങിയ അറകളുള്ള ഖനിയുടെ രൂപരേഖകള്‍ ഇല്ലാത്തതും രക്ഷാപ്രവര്‍ത്തകര്‍ക്ക് തിരിച്ചടിയാവുകയായിരുന്നു.