ഭാവി വധുവിനെ എട്ടുപേര് ചേര്ന്ന് കൂട്ടമാനഭംഗത്തിനിരയായി; അവളെ തന്നെ വിവാഹം കഴിച്ച് പ്രതികള്ക്കെതിരെ പോരാടിയ യുവാവ്
ചില അസാധാരണ സമയങ്ങളില് സാധാരണക്കാരും സൂപ്പര് ഹീറോകളാകും. അത്തരത്തില് സൂപ്പര് ഹീറോയായി രാജ്യത്തിന്റെയാകെ കയ്യടി നേടുകയാണ് ഈ യുവാവ്. വിവാഹം കഴിക്കാന് പോകുന്ന പെണ്കുട്ടിയെ എട്ടുപേര് ചേര്ന്ന് പീഡിപ്പിച്ചുവെന്ന് അറിഞ്ഞപ്പോള് തകര്ന്നു പോയെങ്കിലും അവളെ ചേര്ത്തു പിടിച്ച് വിവാഹം കഴിച്ച് പ്രതികള്ക്കെതിരെ പോരാടിയിരിക്കുകയാണ് ഹരിയാന സ്വദേശിയായ യുവാവ്. വിവാഹം അടുത്തിരിക്കെ ഒരു ദിവസം വധുവും കുടുംബവും വരനെയും കുടുംബത്തെയും വീട്ടിലേയ്ക്ക് വിളിപ്പിച്ചു.
താന് ലൈംഗിക പീഡനത്തിന് ഇരയായിട്ടുണ്ടെന്നും എട്ടുപേര് ചേര്ന്ന് തന്നെ മാനഭംഗപ്പെടുത്തിയെന്നും അതുകൊണ്ട് വിവാഹത്തില് നിന്നു പിന്മാറണമെന്ന് വരനോടും വീട്ടുകാരോടും അവള് അഭ്യര്ഥിച്ചു. എന്നാല് ഈ ഒരു കാരണം കൊണ്ട് നിസ്സഹായയായ ആ പെണ്കുട്ടിയെ ഉപേക്ഷിക്കാന് ആ യുവാവിന് സാധിച്ചില്ല.
വധുവിനും വീട്ടുകാര്ക്കും 2 വാഗ്ദാനങ്ങള് നല്കിയാണ് അന്ന് വരനും കൂട്ടരും ആ വീടുവിട്ടിറങ്ങിയത്. ഒന്ന്. അവളെ താന് തന്നെ വിവാഹം കഴിക്കും. രണ്ട്. എന്തു വിലകൊടുത്തും അവള്ക്ക് നീതി വാങ്ങിക്കൊടുക്കും. അങ്ങനെ 2015ല് അവര് വിവാഹിതരായി. അവള്ക്കു കൊടുത്ത വാക്കു പാലിക്കാനായി ആദ്യം അയാള് ചെയ്തത് പെണ്കുട്ടിയെ കൂട്ടമാനഭംഗം ചെയ്തവര്ക്കെതിരെ കേസ് കൊടുത്ത് എഫ്ഐആര് ഫയല് ചെയ്യുകയായിരുന്നു.
അംഗബലംകൊണ്ടും സമ്പത്തുകൊണ്ടും രാഷ്ട്രീയ ബന്ധം കൊണ്ടും ഉന്നതരായിരുന്ന എതിരാളികള് യുവതിയെയും ഭര്ത്താവിനെയും വേട്ടയാടിത്തുടങ്ങി. പക്ഷേ ഒരനുഗ്രഹം പോലെ എന്തിനും ഏതിനും ഭര്ത്താവിന്റെ വീട്ടുകാരും അവള്ക്കൊപ്പം നിന്നു. ഇതിനിടയില് ശത്രുപക്ഷത്തുള്ളവര് അവളുടെ ഭര്ത്താവിനെതിരെ നാലു വ്യാജ എഫ്ഐആറുകള് തയാറാക്കി. ദുസ്വപ്നങ്ങള് അവളെ വിട്ടൊഴിയാതെയായി. എന്നിട്ടും പിന്മാറാതെ ആ യുവാവ് പോരാട്ടം തുടര്ന്നു.
കേസ് നടത്താനും അഭിഭാഷകര്ക്ക് ഫീസ് കൊടുക്കാനുമൊക്കെ പണം തികയാതെ വന്നപ്പോള് അയാള് തന്റെ പേരിലുള്ള സ്ഥലം വിറ്റു. കേസിനും കൂട്ടത്തിനുമായി 14 ലക്ഷത്തോളം രൂപ ചിലവായി. ജില്ലാക്കോടതിയില് നിന്നും നീതി കിട്ടാതായപ്പോള് തളരാതെ ഹൈക്കോടതിയില് കേസ് നടത്തി. ഇതിനിടയില് പണം കൊടുത്ത് കേസ് ഒതുക്കാനും ശത്രു പക്ഷത്തു നിന്ന് ശ്രമങ്ങളുണ്ടായി.
അഭിഭാഷകരോടുള്ള വിശ്വാസം നഷ്ടപ്പെട്ട ഒരു ഘട്ടത്തില് അയാള് ഒരു തീരുമാനമെടുത്തു. നിയമം പഠിക്കണം. അങ്ങനെ ഭാര്യയ്ക്ക് നീതിനേടിക്കൊടുക്കണം. ഭാര്യയ്ക്ക് നഷ്ടപ്പെട്ട ആത്മവിശ്വാസം നേടിക്കൊടുക്കാന് അവളുടെ മാതാപിതാക്കള് താമസിക്കുന്ന വീടിനടുത്ത് വീടെടുത്ത് ഇരുവരും താമസം തുടങ്ങി. വൈകാതെ ഭാര്യയെയും നിയമം പഠിപ്പിക്കാന് അയാള് തീരുമാനിച്ചു. ഇപ്പോള് രണ്ടു വയസ്സുള്ള ഒരു കുഞ്ഞിന്റെ മാതാപിതാക്കളാണിവര്.
ഭാര്യയ്ക്കു മാത്രമല്ല, പുരുഷാധിപത്യ സമൂഹത്തില് നീതി നിഷേധിക്കപ്പെടുകയും പീഡനത്തിന് ഇരയാവുകയും ചെയ്യുന്ന എല്ലാ സ്ത്രീകള്ക്കും വേണ്ടിയാണ് നിയമം പഠിക്കുന്നതെന്ന് അയാള് ഉറപ്പിച്ചു പറയുന്നു. ചെറുപ്പകാലത്തും മറ്റും ആണുങ്ങള് കൂട്ടം ചേര്ന്ന് സ്ത്രീകളെയും വിദ്യാര്ഥിനികളെയുമൊക്കെ ശല്യം ചെയ്യുന്ന ദൃശ്യങ്ങള്ക്ക് താന് സാക്ഷിയായിട്ടുണ്ടെന്നും അന്നൊക്കെ അധികൃതര്ക്ക് പരാതി നല്കിയിട്ടുണ്ടെന്നും അയാള് പറയുന്നു. പക്ഷേ ആരുംതന്നെ അതിനെതിരെ ഫലപ്രദമായ ഒരു നടപടിയും സ്വീകരിച്ചിട്ടില്ലെന്നും അയാള് പറയുന്നു. ഇത്തരം ശല്യങ്ങളെക്കുറിച്ച് വീട്ടില് പറഞ്ഞാല് പെണ്കുട്ടികളുടെ പഠിപ്പ് നിര്ത്തുകയാണ് ആ ഗ്രാമങ്ങളിലെ പതിവെന്നും അയാള് പറയുന്നു. തികച്ചും നിസ്സഹായരായ അത്തരക്കാര്ക്കുവേണ്ടിയാണ് തങ്ങളുടെ പോരാട്ടമെന്നാണ് ആ ഭാര്യാഭര്ത്താക്കന്മാര് പറയുന്നത്.
https://www.facebook.com/Malayalivartha