അന്‍പത്തിയാറ് ഇഞ്ച് നെഞ്ചളവുള്ള പുരുഷനാണ് താനെന്ന പ്രധാനമന്ത്രി നരേന്ദ്രമോദിയുടെ പ്രസംഗത്തെ ഗുജറാത്തിലെ കോണ്‍ഗ്രസ് നേതാവ് ട്രോളുന്നു... കഴുതകള്‍ക്കാണ് അമ്പത്താറ് ഇഞ്ച് നെഞ്ചളവെന്നാണ് കോണ്‍ഗ്രസ് നേതാവ് അര്‍ജുന്‍ മദ്വാഡിയ പരിഹാസിച്ചത്. അമ്പത്താറ് ഇഞ്ച് നെഞ്ചളവ് ഉള്ളവര്‍ക്ക് മാത്രമേ ശക്തമായ തീരുമാനങ്ങള്‍ എടുക്കാന്‍ കഴിയൂ എന്ന് 2014 ല്‍ മോദി പ്രസംഗിച്ചിരുന്നു. അന്ന് മുതല്‍ സമൂഹമാധ്യമങ്ങളിലടക്കം വലിയ രീതിയിലുള്ള ട്രോളുകള്‍ ഉണ്ടായെങ്കിലും ഇത്രയും രൂക്ഷമായി പരിഹസിക്കുന്നത് ആദ്യമായാണ്. ഗുജറാത്തിലെ ബാണസ്‌കന്ത ജില്ലയിലെ ദീസയില്‍ തെരഞ്ഞെടുപ്പ് റാലിയില്‍ വെച്ചാണ് മോദ്വാഡിയ പ്രധാനമന്ത്രി നരേന്ദ്രമോദിക്കെതിരെ ഇത്തരത്തില്‍ പരോക്ഷവിമര്‍ശനം നടത്തിയത്. 

ആരോഗ്യമുള്ള ഒരാളുടെ നെഞ്ചളവ് 36 ഇഞ്ചാണ്. ബോഡി ബില്‍ഡിംഗ് ചെയ്യുന്നവരുടെ നെഞ്ചളവ് 42 ഇഞ്ച് വരെ വികസിക്കും. കഴുതകള്‍ക്ക് ജന്‍മനാ ് അമ്പത്തിയാറ് ഇഞ്ച് നെഞ്ചളവ് ഉണ്ട്. ചില കാളകള്‍ക്ക് 100 ഇഞ്ച് നെഞ്ചളവാണുള്ളത്- എന്നായിരുന്നു പ്രസംഗത്തിലെ പരാമര്‍ശം. ബി.ജെ.പി പ്രവര്‍ത്തകരും മോദി അനുയായികളും 56 ഇഞ്ച് വലിയ കാര്യമായി പ്രചരിപ്പിക്കുന്നുണ്ട്. അവര്‍ക്ക് യാഥാര്‍ത്ഥ്യ ബോധ്യമില്ലെന്നും പ്രധാനമന്ത്രി മോദിക്ക് അമ്പത്താറ് ഇഞ്ച് നെഞ്ചളവ് ആണെന്ന് ആരെങ്കിലും പറഞ്ഞാല്‍ ബി.ജെ.പിക്കാര്‍ക്ക് അത് വലിയ അഭിമാനമാണെന്നും മോദ്വാഡിയ കളിയാക്കി. 2007 ല്‍ ഗുജറാത്ത് തിരഞ്ഞെടുപ്പിനു ശേഷവും മോദി തന്റെ അമ്പത്താറ് ഇഞ്ച് നെഞ്ചിനെ കുറിച്ചു പറഞ്ഞിരുന്നു.

മോദി അധികാരത്തിലെത്തി 54 മാസത്തിനുള്ളില്‍ ജമ്മുകശ്മീരില്‍ മാത്രം 426 ജവാന്മാര്‍ രക്തസാക്ഷികളായതിനെ വിമര്‍ശിക്കാന്‍ 56 ഇഞ്ച് പ്രയോഗം കോണ്‍ഗ്രസ് വക്താവ് രണ്‍ദീപ് സിങ് സുര്‍ജേവാല ഉപയോഗിച്ചിരുന്നു. 54 മാസത്തിനിടെ ഭീകരാക്രമണങ്ങളില്‍ 278 സാധാരണക്കാരും കൊല്ലപ്പെട്ടിരുന്നു. സി.ആര്‍.പി.എഫ്., സേനാക്യാമ്പുകളിലും വ്യോമസേന താവളങ്ങളിലും പാമ്പോര്‍, ഉറി, പഠാന്‍കോട്ട്, ഗുരുദാസ്പുര്‍ എന്നീ പട്ടാളതാവളങ്ങളിലും അമര്‍നാഥ് തീര്‍ഥാടകര്‍ക്കുനേരെയുമൊക്കെയായി 16 വന്‍ഭീകരാക്രമണങ്ങളുണ്ടായത് മോദിയുടെ കാലത്തായിരുന്നു മന്‍ദീപ്, നരേന്ദ്രസിങ് എന്നീ ജവാന്മാരുടെ തലയെടുത്തപ്പോള്‍ മൂകസാക്ഷിയായിനിന്നത് മോദിയല്ലേ? 2014 മേയ് മുതല്‍ നാളിതുവരെ അതിര്‍ത്തിയില്‍ മുന്നൂറിലേറെത്തവണ പാകിസ്താന്‍ വെടിനിര്‍ത്തല്‍ കരാര്‍ ലംഘിച്ചപ്പോള്‍ 56 ഇഞ്ച് നെഞ്ചളവ് എവിടെപ്പോയി? എന്നാണ് സുര്‍ജേവാല പരിഹസിച്ചത്. 

അതിന് പിന്നാലെയാണ് ഗുജറാത്തിലെ കോണ്‍ഗ്രസ് നേതാവ് പരിഹാസവുമായി എത്തിയത്. സ്‌റ്റേറ്റ് കോണ്‍ഗ്രസ് ഇന്‍ ചാര്‍ജ് രാജിവ് സത്തവ്, കോണ്‍ഗ്രസ് സ്ഥാനാര്‍ത്ഥി പാര്‍ത്ഥി ഭട്ടേല്‍ എന്നിവര്‍ റാലിയില്‍ പങ്കെടുത്തു. അതേസമയം ശക്തമായ പ്രതിഷേധവുമായി ബിജെപി രംഗത്തിറങ്ങി്. നിയമസഭാ തെരഞ്ഞെടുപ്പിന് പിന്നാലെ ലോക്‌സഭയിലും അമ്പേ പരാജയപ്പെടുമെന്ന ആശങ്കയില്‍ കോണ്‍ഗ്രസ് നേതാക്കളുടെ മനോനില തകര്‍ന്നിരിക്കുകയാണെന്ന് സംസ്ഥാന ബിജെപി നേതാക്കള്‍ പറഞ്ഞു. പ്രതിപക്ഷ ബഹുമാനമില്ലാത്ത വാക്കുകളാണെന്നും അത്യന്തം ഹീനമായ പരാമര്‍ശമാണെന്നും ബിജെപി ഗുജറാത്ത് വക്താവ് ഭരത് പാണ്ഡ്യ ആഞ്ഞടിച്ചു. ജനങ്ങള്‍ ഇതിന് തെരഞ്ഞെടുപ്പില്‍ മറുപടി നല്‍കുമെന്നും അദ്ദേഹം പറഞ്ഞു.