മോദിയുടെ യാത്ര വൈകി; പ്രധാനമന്ത്രി നരേന്ദ്രമോദിയുടെ ഹെലികോപ്റ്ററില് പരിശോധന നടത്തിയ ഉദ്യോഗസ്ഥനെ തിരഞ്ഞെടുപ്പ് കമ്മിഷന് സസ്പെന്ഡ് ചെയ്തു
പ്രധാനമന്ത്രി നരേന്ദ്രമോദിയുടെ ഹെലികോപ്റ്ററില് പരിശോധന നടത്തിയ ഉദ്യോഗസ്ഥനെ തിരഞ്ഞെടുപ്പ് കമ്മിഷന് സസ്പെന്ഡ് ചെയ്തു. ഒഡീഷയില് ലോക്സഭാ തിരഞ്ഞെടുപ്പുമായി ബന്ധപ്പെട്ട് നിരീക്ഷകനായി നിയോഗിച്ചിരുന്ന കര്ണാടകയില് നിന്നുള്ള മുഹമ്മദ് മുഹസിനെയാണ് സസ്പെന്ഡ് ചെയ്തത്. മോദിയുടെ ഹെലികോപ്റ്ററില് ഫ്ളൈയിംഗ് സ്ക്വാഡ് അംഗങ്ങള് പരിശോധന നടത്തിയതിനെ തുടര്ന്നാണ് നടപടിയെന്ന് കമ്മിഷന് ഉത്തരവില് അറിയിച്ചു. എസ്.പി.ജി സുരക്ഷയുള്ളവര്ക്കായുള്ള മാര്ഗനിര്ദേശങ്ങള്ക്കെതിരാണ് ഉദ്യോഗസ്ഥന്റെ നടപടിയെന്നും സസ്പെന്ഷന് ഉത്തരവ് പ്രാബല്യത്തില് വന്നതായും ഉത്തരവില് പറയുന്നു. ഉദ്യോഗസ്ഥന്റെ നടപടി മൂലം പ്രധാനമന്ത്രിക്കു മിനുറ്റുകളോളം കാത്തിരിക്കേണ്ടി വന്നെന്നും കമ്മിഷന് വ്യക്തമാക്കുന്നു.
കര്ണാടകയിലെ ചിത്രദുര്ഗയില് മോദിയുടെ വിമാനത്തില് നിന്ന് സുരക്ഷാപരിശോധനയില് ഉള്പ്പെടുത്താതെ ഒരു പെട്ടി രഹസ്യമായി സ്വകാര്യ വാഹനത്തില് കയറ്റിക്കൊണ്ടുപോകുന്നതിന്റെ വിഡിയോ വിവാദമായതിന് പിന്നാലെയാണ് മോദിയുടെ ഹെലികോപ്റ്ററില് പരിശോധന നടത്തിയത്. സ്വകാര്യ വാഹനത്തില് കയറ്റിക്കൊണ്ടുപോയ പെട്ടിയെ കുറിച്ച് അന്വേഷിക്കമെന്ന് ആവശ്യപ്പെട്ട് പ്രതിപക്ഷ കക്ഷികള് രംഗത്തെത്തിയിരുന്നു. എസ്.പി.ജി സംരക്ഷണമുള്ളവരോട് പെരുമാറേണ്ട രീതി സംബന്ധിച്ച തിരഞ്ഞെടുപ്പ് കമ്മീഷന് ചട്ടങ്ങള് ലംഘിച്ചു എന്ന് പറഞ്ഞാണ് നടപടി.എസ്.പി.ജി സംരക്ഷണമുള്ളവരെ ഇത്തരത്തില് പരിശോധിക്കുന്നത് കമ്മിഷന്റെ മാര്ഗനിര്ദ്ദേശങ്ങള്ക്ക് വിരുദ്ധമാണ് എന്ന് ഉദ്യോഗസ്ഥര് പറയുന്നു. പരിശോധന കാരണം പ്രധാനമന്ത്രിയുടെ യാത്ര 15 മിനിറ്റ് വൈകിയെന്നും കമ്മിഷന് പറഞ്ഞു. അതേസമയം,? കമ്മിഷന്റെ നടപടിയില് അസ്വഭാവികതയുണ്ടെന്നു ആരോപിച്ച് കോണ്ഗ്രസ് രംഗത്തെത്തിയിട്ടുണ്ട്.
https://www.facebook.com/Malayalivartha