തലയിലൂടെ തുളച്ച് കയറിയ കമ്പിയുമായി ആശുപത്രിയില് എത്തിച്ചപ്പോഴും ബോധം മറയാതെ സംസാരിച്ച് യുവാവ്!
തലയുടെ ഒരുവശത്തുകൂടെ തുളച്ച് കയറിയ കമ്പി മറുവശത്തുകൂടെ പുറത്ത് വന്നിട്ടും ബോധം മറയാതെ സംസാരിച്ചുകൊണ്ട് യുവാവ് ആശുപത്രിയില് എത്തി. മധ്യപ്രദേശിലെ ബാല്ഗട്ടിലാണ് അപൂര്വ്വമായ സംഭവം. ഇരുപത്തിയൊന്നുകാരനായ സഞ്ജയ് എന്ന യുവാവാണ് മെഡിക്കല് സയന്സിനും അത്ഭുതമായത്.
കിണര് വൃത്തിയാക്കുന്നതിനിടയിലാണ് നിര്മാണ തൊഴിലാളിയായ സഞ്ജയ് അപകടത്തില്പ്പെട്ടത്. കിണറ്റില് നിന്ന് കയറില് തൂങ്ങി, മുകളിലേക്ക് കയറുന്നതിനിടെ അബദ്ധത്തില് താഴേക്ക് വീഴുകയായിരുന്നു. മുപ്പത്തിയഞ്ച് അടി താഴ്ചയിലേക്ക് വീണ സഞ്ജയുടെ വലത് നെറ്റിയിലൂടെ നീണ്ട കമ്പി കുത്തിക്കയറി. തുളഞ്ഞുകയറിയ കമ്പി ഇടത്തേ നെറ്റിയുടെ വശത്ത് കൂടി പുറത്തേക്കെത്തിയിരുന്നു.
ഒപ്പമുണ്ടായിരുന്നവര് അപ്പോള് തന്നെ സഞ്ജയ്യെ ആശുപത്രിയിലെത്തിച്ചു. ആശുപത്രിയില് എത്തിക്കുമ്പോഴും സഞ്ജയ്യുടെ ബോധം നശിച്ചിരുന്നില്ല. നാഗ്പൂരിലുള്ള വലിയ ആശുപത്രിയില് സഞ്ജയ്യെ പ്രവേശിപ്പിച്ചു.
തലയ്ക്കകത്തെ സുപ്രധാന രക്തക്കുഴലുകളില് ഒന്നിലും തട്ടാതെയാണ് കമ്പി തുളച്ചു കയറിയത്. യുവാവിന്റെ ബോധം നശിക്കാതിരുന്നതും ജീവന് തലനാരിഴയ്ക്ക് രക്ഷപെട്ടതും ഇതുകൊണ്ടാണെന്ന് ഡോക്ടറുമാര് പറഞ്ഞു. ഒന്നരമണിക്കൂര് നീണ്ട ശസ്ത്രക്രിയയ്ക്ക് ഒടുവിലാണ് കമ്പി പുറത്തെടുത്തത്. ശസ്ത്രക്രിയയ്ക്ക് ശേഷം സഞ്ജയ് സുഖം പ്രാപിച്ച് വരുന്നു. പക്ഷേ അപകടത്തിന്റെ ആഘാതം ഇതുവരെ വിട്ടുമാറിയിട്ടില്ല.
https://www.facebook.com/Malayalivartha