ബംഗാളില്‍ ബിജെപി പ്രവര്‍ത്തകനെ വെടിവെച്ചു കൊന്നു. ഇന്നലെ രാത്രി 10.30 യോടെയായിരുന്നു സംഭവം. 24 വയസുകാരനായ ചന്ദന്‍ ഷാ എന്നയാളാണ് കൊല്ലപ്പെട്ടത്. നോര്‍ത്ത് 24 പര്‍ഗണാസ് ജില്ലയിലായിരുന്നു സംഭവം. ബൈക്കില്‍ പോകുകയായിരുന്ന യുവാവിനെ തടഞ്ഞു നിര്‍ത്തി വെടിവെയ്ക്കുകയായിരുന്നു. തെരഞ്ഞെടുപ്പിന് ശേഷം ബംഗാളില്‍ പലഭാഗത്തും ആക്രമണം തുടര്‍ക്കഥയാണ്.

തെരഞ്ഞെടുപ്പില്‍ എതിരാളികളെ ഞെട്ടിക്കുന്ന പ്രകടനമാണ് ബംഗാളില്‍ ബിജെപി കാഴ്ചവെച്ചത്. ബി ജെ പി 18 സീറ്റ് നേടിയപ്പോള്‍ വലിയ നേട്ടം പ്രതീക്ഷിച്ച തൃണമൂല്‍ 22 ല്‍ ഒതുങ്ങി. തെരഞ്ഞെടുപ്പിലേറ്റ പരാജയത്തിന് പിന്നാലെ തൃണമൂല്‍ കോണ്‍ഗ്രസ് പ്രവര്‍ത്തകര്‍ പാര്‍ട്ടി ഓഫീസുകള്‍ക്കു നേരെയും പ്രവര്‍ത്തകര്‍ക്കു നേരെയും അക്രമണം അഴിച്ചു വിടുന്നതായി ബിജെപി ആരോപിച്ചിരുന്നു.ദിന്‍ഹത, പവര്‍പുര്‍, ഗംഗാരാംപുര്‍ തുടങ്ങിയ സ്ഥലങ്ങളില്‍ സംഘര്‍ഷ സാധ്യത നിലനില്‍ക്കുന്നതിനാല്‍ പോലീസിനെ വിന്യസിച്ചു.