പോലീസ് കസ്റ്റഡിയിലായിരുന്ന റിമാന്‍ഡ് പ്രതി രാജ്കുമാര്‍ കൊല്ലപ്പെട്ട സംഭവത്തിലെ ഒന്നാം പ്രതി എസ്.ഐ കെ.എ. സാബുവിനെ ക്രൈംബ്രാഞ്ച് ആവശ്യപ്രകാരം പീരുമേട് കോടതി ബുധനാഴ്ച വൈകീട്ട് ആറുവരെ കസ്റ്റഡിയില്‍ വിട്ടു. പ്രതിപ്പട്ടികയിലുള്ള ഇനിയും അറസ്റ്റ് രേഖപ്പെടുത്താത്ത പൊലീസുകാരെ ചോദ്യം ചെയ്തതില്‍ ലഭിച്ച ചില വിവരങ്ങളില്‍ വ്യക്തത വരുത്തുന്നതിനാണ് എസ്.ഐയെ കസ്റ്റഡിയില്‍ വാങ്ങിയതെന്നാണ് സൂചന.

52 പോലീസുകാരില്‍ നിന്നാണ് സംഭവവുമായി ബന്ധപ്പെട്ട് മൊഴി രേഖപ്പെടുത്തിയത്. കസ്റ്റഡി സംബന്ധമായ വിവരങ്ങളില്‍ മാറ്റം വരുത്താന്‍ കൃത്രിമരേഖകള്‍ ചമച്ചതടക്കം ഇവരില്‍ പലരുടെയും മൊഴികളില്‍ വൈരുധ്യമുണ്ട്. എസ്.ഐയുടെ സാന്നിധ്യത്തില്‍ ഇതിനുകൂടി ഉത്തരം കിട്ടണം. വ്യാജരേഖ ചമച്ചതില്‍ എസ്.ഐയുടെ പങ്ക് ഏതാണ്ട് ഉറപ്പായിട്ടുണ്ട്്. കേസില്‍ ഇതു സംബന്ധിച്ച വകുപ്പു കൂടി ചേര്‍ക്കുന്നതിന് കൂടുതല്‍ തെളിവ് ഉറപ്പാക്കുന്നതിനു കൂടിയാണ് എസ്.ഐയെ കസ്റ്റഡിയില്‍ വാങ്ങിയതെന്നാണ് വിവരം.