വിചിത്ര ലീവ് എഴുതി സ്കൂൾ അധികൃതരെ ഞെട്ടിച്ച് എട്ടാം ക്ലാസ് വിദ്യാര്‍ത്ഥി. താന്‍ മരണപ്പെട്ടെന്നും പകുതി ദിവസം തനിക്ക് ലീവ് അനുവദിക്കണമെന്നുമായിരുന്നു കുട്ടിയുടെ അഭ്യർത്ഥന. എന്നാൽ എന്താണ് വിദ്യാര്‍ത്ഥി എഴുതിയിരിക്കുന്നതെന്ന് വായിക്കാതെ കണ്ണുംപൂട്ടി പ്രിന്‍സിപ്പാള്‍ ലീവ് അനുവദിക്കുകയും ചെയ്തിട്ടുണ്ട്. ഓഗസ്റ്റ് 20നായിരുന്നു സംഭവം. ലീവ് ലെറ്ററില്‍ ഓഗസ്റ്റ് 20 രാവിലെ പത്ത് മണിക്ക് താന്‍ മരിച്ചെന്നാണ് കുട്ടി എഴുതിയിരിക്കുന്നത്. ഈ ലീവ് ലെറ്റര്‍ ഇപ്പോള്‍ സോഷ്യല്‍ മീഡിയയിൽ വൈറലാവുകയാണ്. വിദ്യാര്‍ത്ഥിയുടെ സുഹൃത്തുക്കള്‍ ലെറ്റര്‍ കാണാന്‍ ഇടയായതോടെയാണ് ഈ വാര്‍ത്ത പുറത്തുവന്നത്.

കുട്ടിയുടെ വിഡ്ഢിത്തരത്തെ അല്ലെങ്കില്‍ അതിബുദ്ധിയെ കുറിച്ച്‌ വാചാലരാവുകയാണ് സോഷ്യല്‍മീഡിയ. ഒപ്പം പ്രിന്‍സിപ്പാളിന്റെ അശ്രദ്ധയെ വിമര്‍ശിക്കുകയും ചെയ്യുകയാണ്. അതേ സമയം കുട്ടിയുടെ മുത്തശ്ശി മരിച്ചു പോയെന്നും അത് കുട്ടി തെറ്റായി എഴുതിയതാണെന്നും ചില റിപ്പോര്‍ട്ടുകള്‍ പറയുന്നു.