മറുപടി കേരളത്തില്... കേരളത്തിന് പുറത്ത് കവി സമ്മേളനത്തിനെത്തിയ മന്ത്രി ജി. സുധാകരന് നേരെ അപ്രതീക്ഷിത പ്രതിഷേധം; ശബരിമല വിഷയത്തില് മന്ത്രി നടത്തിയ പരാമര്ശം എണ്ണിയെണ്ണി ചോദിച്ചതോടെ അന്തരീക്ഷം കലുഷിതമായി; വേദി മാറ്റിയെങ്കിലും രക്ഷയായില്ല
കൊടുത്താല് കൊല്ലത്തും കിട്ടും എന്ന ചൊല്ല് അനവസരത്തില് കടന്നു വന്നിരിക്കുകയാണ്. അതും കവി മന്ത്രികൂടിയായ ജി സുധാകരന്. അല്ലെങ്കില് തന്നെ ശബരിമല വിഷയം മലയാളികള് തെരഞ്ഞെടുപ്പ് കഴിഞ്ഞതോടെ മറന്നതാണ്. സിപിഎമ്മിനാണെങ്കില് ശബരിമല എന്ന് കേള്ക്കുന്നതേ അലര്ജിയാണ്. വീണ്ടും ജനങ്ങളുടെ മനസില് എന്തെങ്കിലും കിടക്കുന്നുണ്ടെങ്കില് അത് കഴുകിക്കളയാന് നേതാക്കള് വീട് കയറിയിറങ്ങുകയും ചെയ്തു. ഇതിന് ശേഷം പല പ്രാവശ്യം ശബരിമല തുറന്നിട്ടും ഒരു യുവതികള്ക്കും കയറുകയും വേണ്ട. ചുരുക്കത്തില് മലയാളികളെല്ലാം ശബരിമല മറന്നു. എന്നാല് ചിലര് ചില കാര്യങ്ങള് മറക്കില്ല എന്നല്ലേ പറയാറ്. അതേ അവസ്ഥയാണ് അങ്ങ് പൂനയിലും സംഭവിച്ചത്.
നാട്ടില് അറിയപ്പെടുന്ന കവിയായ പൊതുമരാമത്ത് വകുപ്പ് മന്ത്രി ജി. സുധാകരന് കവി സമ്മേളനത്തിനായി പൂനെയില് എത്തിയപ്പോഴാണ് പെട്ടുപോയത്. ഹിന്ദു സംഘടനകളുടെ പ്രതിഷധം മൂലം പരിപാടിയില് പങ്കെടുക്കാനാകാതെ മന്ത്രി മടങ്ങി. ശബരിമല യുവതീ പ്രവേശനവുമായി ബന്ധപ്പെട്ട് ജി. സുധാകരന് നടത്തിയ പരാമര്ശങ്ങളില് പ്രതിഷേധിച്ചാണ് ഹിന്ദു സംഘടനകള് എതിര്പ്പുമായി വന്നത്.
ആനുകാലിക പ്രസിദ്ധീകരണത്തിന്റെ ആഭിമുഖ്യത്തിലാണ് പൂനയില് പരിപാടി സംഘടിപ്പിച്ചത്. ഇതില് പങ്കെടുക്കാനായി വിമാനത്താവളത്തിലെത്തിയ മന്ത്രിയെ സംഘാടകര് ചേര്ന്ന് സ്വീകരിച്ച് പരിപാടി സ്ഥലത്തേക്ക് കൂട്ടി കൊണ്ടുവന്നു. എന്നാല് മന്ത്രിയുടെ വരവറിഞ്ഞ് പ്രതിഷേധകര് അവിടെ ധര്ണ്ണയുമായി രംഗത്തൈത്തി.
അതേസമയം വന്ന മന്ത്രിയെ അപമാനിച്ച് വിടുന്നത് ശരിയല്ല എന്ന് കണ്ട് സംഘാടകര് പരിപാടിയുടെ സ്ഥലം പെട്ടന്ന് മാറ്റി. പരിപാടിയില് പങ്കെടുത്തേ മടങ്ങുകയുള്ളൂവെന്ന് മന്ത്രിയും വാശിപിടിച്ചു. അതോടെ നിശ്ചയിച്ച സ്ഥലത്തു നിന്നും പരിപാടി നിഗഡി ശ്രീകൃഷ്ണ ക്ഷേത്രത്തിലെ പാഞ്ചജന്യം ഹാളിലേക്ക് മാറ്റി. എങ്ങനേയും മന്ത്രിയെ കൊണ്ടുവന്ന് ഉദ്ഘാടനം നടത്തി വിടാനായിരുന്നു സംഘാടകരുടെ ശ്രമം. എന്നാല് സുരക്ഷയൊരുക്കേണ്ട പോലീസുകാര് മലക്കം മറിഞ്ഞു. പുറത്തെ ഒരു മന്ത്രിക്ക് എന്തെങ്കിലും പറ്റിയാല് ആര് സമാധാനം പറയും.
സംഘര്ഷഭരിതമായ സാഹചര്യം നിലനില്ക്കുന്നത് കണക്കാക്കി സംഘാടകര് പരിപാടി റദ്ദാക്കി. ഇത് മന്ത്രി ജി. സുധാകരനെ അറിയിക്കുകയും ചെയ്തു. അതേസമയം ഇത് തന്നെ കരിവാരി തേയ്ക്കാന് കരുതിക്കൂട്ടി ചെയ്തതാണെന്നാണ് മന്ത്രി വിശ്വസിക്കുന്നത്. ഇങ്ങനെയൊരു പ്രതിഷേധത്തിന്റെ സൂചന ലഭിച്ചിരുന്നെങ്കില് പൂനയില് ഇതുപോലൊരു പരിപാടിയ്ക്ക് വരില്ലായിരുന്നു. പരിപാടിയ്ക്കിടെ പാടാനായി ഒരു കവിതയും തയ്യാറാക്കിയായിരുന്നു. എന്നാല് അതെല്ലാം കുളമായി. ഇതിനുള്ള മറുപടി എന്തായാലും മന്ത്രി കേരളത്തില് പറയുമെന്ന് ഉറപ്പാണ്.
ശബരിമല പ്രക്ഷോഭ സമയത്ത് മന്ത്രി ജി. സുധാകരന് നടത്തിയ പല പ്രസ്താവനകളും വിവാദമായിരുന്നു. അതിലേറ്റവും പ്രധാനമായിരുന്നു പൂജാരിമാരെപ്പറ്റിയും രാജകുടുംബാഗങ്ങളെപ്പറ്റിയും തന്ത്രിയെപ്പറ്റിയും മന്ത്രി നടത്തിയ പ്രസ്താവന. പൂജാരിമാര് അടിവസ്ത്രം ഇടില്ലെന്ന് പറഞ്ഞത് വലിയ വിവാദമായി. സ്വാമി ചിദാനന്ദപുരി വരെ അത് കൊട്ടിഘോഷിച്ചു.
ഫ്യൂഡല് പൗരോഹിത്യത്തിന്റെ തകര്ച്ചയുടെ മണിമുഴക്കമാണ് ശബരിമലയില് ഉണ്ടായതെന്നാണ് ജി. സുധാകരന് അന്ന് പറഞ്ഞത്. ഹര്ത്താലിന് കട പൂട്ടി പോകുന്ന ലാഘവത്തോടെയാണ് നട അടച്ചിടുമെന്നു തന്ത്രി പറഞ്ഞത്. ഇത് കേരളം ചര്ച്ച ചര്ച്ച ചെയ്യേണ്ട വിഷയമാണെന്നും അദ്ദേഹം വ്യക്തമാക്കി. പാപം ചെയ്തവരാണ് ആരാധനാലയങ്ങളില് പോകുന്നത്. ശബരിമലയില് പോകുന്നവരുടെ പൂര്വ കാല ചരിത്രം നോക്കേണ്ട ആവശ്യമില്ല. ധൈര്യം ഉള്ളവര് മാത്രം ശബരിമലയില് പോയാല് മതി. സ്ത്രീകള് ക്ഷേത്ര സന്ദര്ശനം പൂര്ത്തിയാക്കാതെ തിരിച്ചു പോന്നത് നിരാശ ജനകമാണ്. നിയമം കൈയ്യിലെടുക്കുമെന്നു പറഞ്ഞു സര്ക്കാരിനെതിരെ ഭീഷണിവേണ്ടെന്നും ഇക്കാര്യത്തില് സര്ക്കാര് തന്നെയാണ് വിജയിക്കുക ഉള്ളൂവെന്നും സുധാകരന് വ്യക്തമാക്കിയിരുന്നു. ഇതിനെതിരേയാണ് ഇപ്പോള് അങ്ങ് പൂനയില് നിന്നും പ്രതിഷേധം ഉണ്ടായത്.
https://www.facebook.com/Malayalivartha