ജമ്മു കാശ്മീരില്‍ വീണ്ടും നിയന്ത്രണങ്ങള്‍ വര്‍ദ്ധിപ്പിച്ചു. ശ്രീനഗറില്‍ ഉള്‍പ്പെടെ കര്‍ഫ്യൂ സമാന നിയന്ത്രണങ്ങള്‍ നടപ്പാക്കാനാണ് നിര്‍ദേശം നല്‍കിയിരിക്കുന്നത്. വീണ്ടും നിയന്ത്രണങ്ങള്‍ കര്‍ശനമാക്കാന്‍ കാരണം വ്യക്തമാക്കിയില്ലെങ്കിലും മുഹര്‍റം ഘോഷയാത്രയോടനുബന്ധിച്ച് അനിഷ്ട സംഭവങ്ങളും പ്രതിഷേധങ്ങളും ഉടലെടുക്കാതിരിക്കാനാണെന്നാണ് കരുതുന്നത്. താഴ്‌വരയിലുടനീളം കട കമ്പോളങ്ങള്‍ അടഞ്ഞുകിടക്കുകയാണ്. പൊതുഗതാഗതവും സ്തംഭിച്ച അവസ്ഥയിലാണ്. ശ്രീനഗറിലെ പ്രധാന വ്യാപാര കേന്ദ്രമായ ലാല്‍ചൗക്കില്‍ ഉള്‍പ്പെടെ പ്രധാന കേന്ദ്രങ്ങളിലെ റോഡുകളില്‍ കമ്പിവേലികള്‍ സ്ഥാപിച്ചിട്ടുണ്ട്.

അടിയന്തര വൈദ്യസഹായം ആവശ്യമുള്ളവരെ മാത്രമാണ് കടത്തിവിടുന്നത്. കഴിഞ്ഞ ആഗസ്റ്റ് അഞ്ചിന് സംസ്ഥാനത്തിന്റെ പ്രത്യേക പദവി എടുത്തുകളഞ്ഞ ശേഷം കര്‍ശനമാക്കിയ നിയന്ത്രണങ്ങള്‍ കാരണം ജനജീവിതം സ്തംഭിച്ച അവസ്ഥ തുടരുകയാണ്. കടുത്ത സമ്മര്‍ദങ്ങളെ തുടര്‍ന്ന് നേരിയ അയവുവരുത്തിയെങ്കിലും ഇപ്പോള്‍ വീണ്ടും ശക്തമാക്കിയത് ദുരിതം ഏറുകയാണ്.