ചന്ദ്രയാന്‍ 2 ലാന്‍ഡര്‍ വിക്രമുമായുള്ള ബന്ധം 2.1 കിലോമീറ്റര്‍ മുമ്പാണ് നഷ്ടപ്പെട്ടതെന്നാണ് ഔദ്യോഗീക വിശദീകരണം വന്നത് എന്നാല്‍ ചന്ദ്രോപരിതലത്തോട് ഏറെ അടുത്തായിരിക്കുമ്പോഴാണ് നഷ്ടപ്പെട്ടതെന്നുതെളിയിക്കുന്ന പുതിയ വിലയിരുത്തലുമായി രംഗത്തെത്തിയിരിക്കുകയാണ് ശാസ്ത്രലോകം. വിക്രം ലാന്‍ഡറുമായുള്ള ബന്ധം നഷ്ടപ്പെട്ടതു മുതല്‍ ഇത് സംബന്ധച്ച് ഇസ്രോ ഗവേഷകര്‍ അന്വേഷണം നടത്തുന്നുണ്ട്. ഇസ്രോയുടെ പ്രാഥമിക ഡേറ്റകള്‍ പ്രകാരം ചന്ദ്രോപരിതലത്തില്‍ നിന്ന് 2.1 കിലോമീറ്റര്‍ ഉയരത്തിയിരുന്ന സമയത്താണ് ലാന്‍ഡറുമായി ബന്ധം നഷ്ടപ്പെട്ടതെന്നാണ്. എന്നാല്‍ അതിനു ശേഷവും ലാന്‍ഡറുമായി ബന്ധമുണ്ടായിരുന്നു എന്നു തെളിയിക്കുന്നതാണ് ഇസ്രോ ഡേറ്റകള്‍. വിക്രം ചന്ദ്രന്റെ ഉപരിതലത്തോട് 400 മീറ്റര്‍ വരെ അടുത്തെത്തിയതായി സിഗ്‌നല്‍ ഡേറ്റയില്‍ കാണിക്കുന്നുണ്ട്.

വിക്രം ലാന്‍ഡറുമായുള്ള ബന്ധം നഷ്ടപ്പെട്ടതായി ഇസ്രോ പുറത്തുവിട്ട ആദ്യ പ്രസ്താവന പോലെയല്ല ഈ വിലയിവിലയിരുത്തലുകള്‍. വിക്രം ചന്ദ്രനിലേക്ക് സഞ്ചരിക്കുന്ന ഒരു ഗ്രാഫിന്റെ ചിത്രത്തില്‍ നിന്നാണ് വസ്തുതകള്‍ക്ക് വ്യക്തത ലഭിക്കുന്നത്. ശനിയാഴ്ച പുലര്‍ച്ചെ 1:40 ന് തൊട്ടുമുന്‍പാണ് വിക്രം ഇറങ്ങാന്‍ തുടങ്ങിയത്. പുലര്‍ച്ചെ 1: 50 ഓടെ, ബെംഗളൂരുവിലെ ഇസ്രോ കമാന്‍ഡ് സെന്ററില്‍ നിശബ്ദത പിടിമുറുക്കാന്‍ തുടങ്ങി, അവിടുത്തെ ശാസ്ത്രജ്ഞരുടെ മുഖത്ത് വിഷമം കാണാമായിരുന്നു. എന്തോ കുഴപ്പം സംഭവിച്ചുവെന്ന് മാധ്യമങ്ങളും മനസ്സിലാക്കി. അടുത്ത 20 മിനിറ്റ് ഇസ്രോയില്‍ നിന്ന് അപ്‌ഡേറ്റുകളൊന്നും വന്നില്ല. പുലര്‍ച്ചെ 2:18 ന് ഇസ്രോ മേധാവി കെ. ശിവന്‍ ലാന്‍ഡറുമായി ബന്ധം നഷ്ടപ്പെട്ടതായി അറിയിച്ചു. വിക്രം ലാന്‍ഡറിന്റെ ചന്ദ്രനിലേക്കുള്ള ഇറക്കത്തിന്റെ ചിത്രത്തില്‍ കാണിക്കുന്നത് ഇസ്രോ മേധാവി പറഞ്ഞതില്‍ നിന്ന് ചില മാറ്റങ്ങള്‍ കാണാം. ചിത്രത്തില്‍ കാണുന്ന മൂന്ന് എലിപ്റ്റിക് ലൈനുകളില്‍ മധ്യരേഖ വിക്രമിന്റെ ഇറക്കവുമായി യോജിക്കുന്നു. വിക്രം ചന്ദ്രനില്‍ ഇറങ്ങാനുള്ള ആസൂത്രിത പാത ചുവന്ന ലൈനില്‍ കാണിക്കുന്നു. വിക്രം യഥാര്‍ഥത്തില്‍ സഞ്ചരിച്ച പാതയാണ് പച്ച ലൈന്‍.

ലാന്‍ഡിംഗിന്റെ ഭൂരിഭാഗവും പച്ച ലൈന്‍, ചുവന്ന ലൈനുമായി തികച്ചും യോജിക്കുന്നുണ്ട്. ഇത് വിക്രമിന്റെ ഇറക്കം കൃത്യമായി പദ്ധതി പ്രകാരം പോകുന്നുവെന്ന് സൂചിപ്പിക്കുന്നു. 5 മുതല്‍ 3 കിലോമീറ്റര്‍ വരെ ഉയരത്തില്‍ വിക്രമിന്റെ യഥാര്‍ഥ ഇറക്കത്തിന്റെ പാതയിലും ആസൂത്രണം ചെയ്തതിലും വ്യത്യാസമുണ്ട്. എന്നാല്‍ ഇത് അത്ര ഗൗരവമായ പ്രശ്‌നമല്ല. 2.1 കിലോമീറ്റര്‍ ഉയരത്തില്‍ പച്ച ലൈന്‍ ചുവന്ന രേഖയില്‍ നിന്ന് കുത്തനെ വ്യതിചലിക്കുന്നു, ഇത് വിക്രം ഗതിയില്‍ നിന്ന് പോയി എന്ന് സൂചിപ്പിക്കുന്നു. പച്ച ലൈന്‍ 400 മീറ്ററോളം ഉയരത്തില്‍ അവസാനിക്കുന്നു. ഇത് സൂചിപ്പിക്കുന്നത് ചന്ദ്രോപരിതലത്തില്‍ നിന്ന് 400 മീറ്റര്‍ ഉയരത്തില്‍ വരെ വിക്രം ബെംഗളൂരുവിലെ ഇസ്രോ കമാന്‍ഡ് സെന്ററുമായി ബന്ധപ്പെട്ടിരുന്നു എന്നാണ്. അപ്പോഴാണ് ചന്ദ്രയാന്‍ 2 ലാന്‍ഡര്‍ ഇസ്രോയുമായുള്ള ആശയവിനിമയം നിര്‍ത്തിയതെന്നുമെന്നാണ് നിഗമനം.