ഭൂരിപക്ഷമില്ലെങ്കിലും അധികാരത്തില്‍ കടിച്ച് തൂങ്ങാനുള്ള കര്‍ണാടകാ മുന്‍ മുഖ്യമന്ത്രി എച്ച് ഡി കുമാരസ്വാമിയുടെ മോഹങ്ങള്‍ക്ക് തടയിട്ടത് പ്രധാനമന്ത്രി നരേന്ദ്രമോദിയും ആഭ്യന്തരമന്ത്രിയും ബിജെപി അധ്യക്ഷനുമായ അമിത്ഷായുമാണ്. അതിന്റെ പക അനവസരത്തില്‍ തീര്‍ക്കുകയാണ് കുമാര സ്വാമി. ചന്ദ്രയാന്റെ അവസാന നിമിഷത്തിലെ പരാജയത്തില്‍ രാഷ്ട്രീയം മറന്ന് എല്ലാവരും ശാസ്ത്രജ്ഞരോടൊപ്പമാണ്. പ്രധാനമന്ത്രി എല്ലാ പ്രോട്ടോകോളുകളും ലംഘിച്ച് ശാസ്ത്രജ്ഞരുടെ ദു:ഖത്തില്‍ പങ്കുചേരുകയും ഐഎസ്ആര്‍ഒ ചെയര്‍മാന്‍ ഡോ. ശിവനെ കെട്ടിപ്പിടിച്ച് ആശ്വസിക്കുകയും ചെയ്തു. എന്നാല്‍ അതിനെ കളിയാക്കിക്കൊണ്ട് രംഗത്തിത്തിയിരിക്കുകയാണ് കുമാരസ്വാമി.

ചാന്ദ്രയാന്‍ പരാജയപ്പെടാന്‍ കാരണം പ്രധാനമന്ത്രി നരേന്ദ്ര മോദിയാണെന്നാണ് കുമാരസ്വാമി പറയുന്നത്. നരേന്ദ്രമോദി ദു:ശകുനമായി മാറുകയായിരുന്നെന്നും ഇന്ത്യന്‍ ബഹിരാകാശ ഗവേഷകരുടെ ഒരു ദശാബ്ദ കാലത്തെ പ്രവര്‍നത്തിന്റെ വിജയം പിടിച്ചെടുക്കാനായിരുന്നു മോദിയുടെ ശ്രമമെന്നും പറഞ്ഞു. പക്ഷേ മോദി ഐഎസ്ആര്‍ഒ കേന്ദ്രത്തില്‍ കാലെടുത്തു വെച്ചത് ദു:ശകുനമായി. ശാസ്ത്രജ്ഞര്‍ക്ക് അത് നിര്‍ഭാഗ്യമായി മാറുകയും ചെയ്തുവെന്നാണ് ആക്ഷേപം. മോദിയുടെ നിര്‍ഭാഗ്യമാണ് ഗവേഷണ പദ്ധതിയെ തന്നെ ബാധിച്ചത്. ഇന്ത്യന്‍ ബഹിരാകാശ ഗവേഷണ സംഘടനയുടെ ശാസ്ത്രജ്ഞരില്‍ നിന്നും ചാന്ദ്രയാന്‍ 2 ന്റെ വിജയം പിടിച്ചെടുക്കാനായിരുന്നു മോദിയുടെ ശ്രമം.

ചാന്ദ്രയാന്‍2 ലാന്റ് ചെയ്യുന്നു എന്ന സന്ദേശം തനിക്കു തന്നെ നല്‍കണമെന്ന സ്വാര്‍ത്ഥതയുമായിട്ടാണ് മോദി ബംഗലുരുവിലെ ഐഎസ്ആര്‍ഒ കേന്ദ്രത്തില്‍ എത്തിയത്. എന്നാല്‍ അദ്ദേഹം കാലെടുത്തു വെച്ചപ്പോള്‍ തന്നെ ശാസ്ത്രജ്ഞരുടെ പത്തുപന്ത്രണ്ട് വര്‍ഷത്തെ കഠിനാദ്ധ്വാനം നിര്‍ഭാഗ്യമായി മാറിയെന്നും കുമാര സ്വാമി കുറ്റപ്പെടുത്തി.

അതേസമയം പ്രധാനമന്ത്രിയാണ് തങ്ങള്‍ക്ക് പ്രചോദനമായതെന്നാണ് ശാസ്ത്രജ്ഞര്‍ പറയുന്നത്. പരാജയത്തെ തുടര്‍ന്ന് വേണമെങ്കില്‍ മോദിയ്ക്ക് തിരികെ പോകാമായിരുന്നു. എന്നാല്‍ അത് ചെയ്യാതെ അവിടത്തന്നെ തുടരുകയും ഡോ. ശിവനെ ഉള്‍പ്പെടെ ആശ്വസിപ്പിക്കുകയും ചെയ്തു. അത് തങ്ങള്‍ക്ക് വലിയ കരുത്ത് നല്‍കിയെന്ന് അവര്‍ തന്നെ വെളിപ്പെടുത്തിയിരുന്നു. നിരാശപ്പെടരുതെന്നാണ് മോദി പറഞ്ഞത്. പ്രതീക്ഷ കൈവിടുകയുമരുത്, ഇനിയും ശ്രമം തുടരും. നമ്മള്‍ വിജയം നേടുകതന്നെ ചെയ്യുമെന്നായിരുന്നു ഐ.എസ്.ആര്‍.ഓ ചെയര്‍മാന്‍ ഡോ.കെ. ശിവനോടും സഹപ്രവര്‍ത്തകരോടും മോദി പറഞ്ഞത്

ഇന്ത്യയുടെ ചന്ദ്രയാന്‍2 ചാന്ദ്ര ദൗത്യത്തെ പല വിദേശ രാജ്യങ്ങള്‍ വരെ അഭിനന്ദിച്ചിരുന്നു. ചന്ദ്രയാന്‍ 2 അവസാന ഘട്ടത്തില്‍ പരാജയപ്പെട്ടെങ്കിലും അമേരിക്കന്‍ ബഹിരാകാശ ഏജന്‍സി ഉള്‍പ്പെടെ ഐഎസ്ആര്‍ഒയ്ക്ക് പ്രശംസയുമായി രംഗത്തെത്തിയിരുന്നു. എന്നാല്‍ പരാജയത്തിനു പിന്നാലെ പ്രതീക്ഷിച്ചതുപോലെ പാകിസ്ഥാന്‍ രംഗത്തെത്തിയിരുന്നു. ചന്ദ്രനിലേയ്ക്ക് അയച്ച കളിപ്പാട്ടം മുംബൈയില്‍ ലാന്‍ഡ് ചെയ്തുവെന്നായിരുന്നു പരിഹാസം. അതേസമയം ചന്ദ്രയാനെ അഭിനന്ദിച്ച് പാക്കിസ്ഥാനി ഗവേഷക രംഗത്തെത്തിയത് ഏറെ കൈയ്യടി നേടി. ഗവേഷകയും ആദ്യ പാക്കിസ്ഥാനി ബഹിരാകാശ യാത്രികയുമാകാന്‍ ഒരുങ്ങുന്ന നമീറ സലീം ആണ് ഇന്ത്യയെ അഭിനന്ദിച്ചത്.

ചന്ദ്രയാന്‍ 2 ദൗത്യം ഇന്ത്യയ്ക്ക് മാത്രമല്ല ദക്ഷിണേഷ്യയ്ക്ക് മുഴുവന്‍ അഭിമാനമാണ്. ഒരു വലിയ ചുവടുവയ്പ്പാണ്. ലോക ബഹിരാകാശ വ്യവസായത്തിനും ഇത് അഭിമാനത്തിനുള്ള വക നല്‍കുന്നുവെന്നാണ് നമീറ സലിം പറഞ്ഞത്.

ഇങ്ങനെ പാകിസ്താനില്‍ നിന്നുപോലും ഇന്ത്യന്‍ ശാസ്ത്രജ്ഞര്‍ക്ക് അഭിനന്ദനം കിട്ടിക്കൊണ്ടിരിക്കുമ്പോഴാണ് പഴയ പ്രതീകാരവുമായി കുമാര സ്വാമി രംഗത്തെത്തിയിരിക്കുന്നത്. അതിനാല്‍ തന്നെ രാഷ്ട്രീയം മറന്ന് വലിയ വിമര്‍ശനമാണ് കുമാരസ്വാമി നേരിടുന്നത്.