കര്‍ശന നടപടികളിലൂടെ കാശ്മീരില്‍ സമാധാനം സ്ഥാപിക്കാന്‍ ശ്രമിക്കുകയാണ് പ്രധാനമന്ത്രി നരേന്ദ്രമോദിയുടെ നേതൃത്വത്തില്‍. കാശ്മീര്‍ ജനത സമാധാനത്തിലെത്തിയാല്‍ പാകിസ്താന്റെ തീവ്രവാദം വിലപോകില്ല. ഇത് മുന്നില്‍ കണ്ട് വിവിധ പ്രകോപനവുമായി പാകിസ്താന്‍ പ്രധാനമന്ത്രി ഇമ്രാന്‍ ഖാനും മറ്റുമന്ത്രിമാരും രംഗത്തെത്തിയിട്ടുണ്ട്. അന്തര്‍ദേശീയ രംഗത്ത് ഇന്ത്യയെ താഴ്ത്തിക്കാട്ടാനുള്ള ശ്രമങ്ങളെല്ലാം പരാജയപ്പെടുകയും ചെയ്തു. ലോക രാഷ്ട്രങ്ങളെല്ലാം ഇന്ത്യയ്ക്ക് പിന്തുണ നല്‍കുന്ന കാഴ്ചയാണ് കാണാന്‍ കഴിയുന്നത്. അതിനിടെ പാക് അധീന കാശ്മീരില്‍ ഇമ്രാന്‍ഖാന്‍ കാശ്മീര്‍ പ്രഖ്യാപനം നടത്തി ഇന്ത്യയെ പ്രകോപിപ്പിച്ചിട്ടുമുണ്ട്.

എന്നാല്‍ ഇന്ത്യ വാക്കിലല്ല പ്രവൃത്തിയ്ക്കാണ് പ്രാധാന്യം നല്‍കുന്നത്. എല്ലാ കാര്യങ്ങള്‍ക്കും പ്രവര്‍ത്തികളിലൂടെ മറുപടി പറയുകയാണ് ഇന്ത്യ. ചാന്ദ്രയാന്‍ രണ്ട് ദൗത്യത്തിന് ശേഷം മറ്റൊരു സുപ്രധാന നേട്ടം കൈവരിച്ചിരിക്കുകയാണ് മോദിയുടെ ഇന്ത്യ. ഇന്ത്യ സ്വന്തമായി നിര്‍മിച്ച ലഘു പോര്‍വിമാനമായ തേജസിന്റെ അറസ്റ്റഡ് ലാന്‍ഡിങ് വിജയകരമായി നടന്നിരിക്കുകയാണ്. ചരിത്രത്തില്‍ ആദ്യമായാണ് ഇന്ത്യന്‍പോര്‍വിമാനം ഇത്തരത്തില്‍ ഇറക്കുന്നത്. തേജസ് നാവികസേനയുടെ ഭാഗമാക്കുന്നതിനുള്ള നിര്‍ണായക പരീക്ഷണമായിരുന്നു ഇത്. ഇത് വിജയിച്ചതോടെ വലിയ നേട്ടമാണ് ഇന്ത്യ കൈവരിച്ചത്.

ഗോവയിലെ നാവികസേനാ പരിശീലനകേന്ദ്രമായ ഐ.എന്‍.എസ്. ഹംസയിലാണ് വെള്ളിയാഴ്ച തേജസ് അറസ്റ്റഡ് ലാന്‍ഡിങ് നടത്തിയത്. നാവികസേനയുടെ വിമാനവാഹിനിക്കപ്പലായ ഐ.എന്‍.എസ്. വിക്രമാദിത്യയില്‍ തേജസ് ഇറക്കുന്നതിനു മുന്നോടിയായാണ് കരയിലെ പരിശീലന കേന്ദ്രത്തിലിറക്കി പരീക്ഷണം നടന്നത്. റഷ്യയുടെ മിഗ്29 കെ യുദ്ധ വിമാനങ്ങളാണ് ഇപ്പോള്‍ ഐ.എന്‍.എസ്. വിക്രമാദിത്യയിലുള്ളത്.

പോര്‍മുഖത്തെ ആവേശം കൊള്ളിക്കുന്നതാണ് അറസ്റ്റഡ് ലാന്‍ഡിങ്. കപ്പലുകളിലെ നീളം കുറഞ്ഞ റണ്‍വേയിലിറങ്ങുന്ന വിമാനത്തെ പെട്ടെന്നു പിടിച്ചുനിര്‍ത്തുന്നതിനുള്ള സംവിധാനമാണ് അറസ്റ്റഡ് ലാന്‍ഡിങ് സംവിധാനം. ഐ.എന്‍.എസ്. ഹംസയില്‍ കപ്പലുകളിലേതിനു സമാനമായ സാഹചര്യമൊരുക്കിയാണ് പരീക്ഷണം നടത്തിയത്. യു.എസ്., റഷ്യ, ബ്രിട്ടന്‍, ഫ്രാന്‍സ്, ചൈന എന്നീ രാജ്യങ്ങള്‍ വികസിപ്പിച്ച ഏതാനും യുദ്ധവിമാനങ്ങള്‍ മാത്രമേ ഇതുവരെ പടക്കപ്പലുകളില്‍ അറസ്റ്റഡ് ലാന്‍ഡിങ് നടത്തിയിട്ടുള്ളൂ എന്നത് ഓര്‍ക്കണം.

റണ്‍വേയിലിറങ്ങുന്ന വിമാനം അധികദൂരം ഓടുംമുമ്പ് പിടിച്ചു കെട്ടിനിര്‍ത്തുക എന്നത് വലിയ അപകടവും ശ്രമകരവുമാണ്. വിമാനത്തിനടിയില്‍ വാലിനടുത്തായി ഇതിനായി രൂപകല്‍പ്പന ചെയ്ത കൊളുത്തുണ്ടാകും. വിമാനമിറങ്ങുമ്പോള്‍ വിമാനവാഹിനിക്കപ്പലുകളുടെ ഡെക്കില്‍ ഇട്ടിട്ടുള്ള ബലമേറിയ ഉരുക്കു വടങ്ങളിലെ കുടുക്കില്‍ ഈ കൊളുത്തുടക്കും. മുന്നോട്ടോടുന്ന വിമാനം പിടിച്ചുകെട്ടിയപോലെ നില്‍ക്കും. ഇതിനേയാണ് അറസ്റ്റഡ് ലാന്‍ഡിങ് എന്ന് പറയുന്നത്.

പ്രതിരോധഗവേഷണ വികസന സ്ഥാപനമായ ഡി.ആര്‍.ഡി.ഒ. അതിനു കീഴിലുള്ള എയ്‌റോനോട്ടിക്കല്‍ ഡെവലപ്‌മെന്റ് ഏജന്‍സിയുമായ എ.ഡി.എ.യുമാണ് വെള്ളിയാഴ്ചത്തെ പരീക്ഷണത്തിന് നേതൃത്വം വഹിച്ചത്.

വ്യോമസേനയ്ക്കായുണ്ടാക്കിയ വിവിധോദ്ദേശ്യ ഒറ്റ എന്‍ജിന്‍ യുദ്ധവിമാനമാണ് തേജസ്. 2012ലായിരുന്നു കന്നിപ്പറക്കല്‍ നടത്തിയത്. നാവികസേനയ്ക്കുവേണ്ട സൗകര്യങ്ങള്‍ ചേര്‍ത്ത തേജസിന്റെ ആദ്യ പരിശീലനപ്പറക്കല്‍ 2014ലാണ് നടന്നത്.