ഇന്ത്യന്‍ കോസ്റ്റ്ഗാര്‍ഡിന്റെ നിരീക്ഷണ കപ്പല്‍ വരാഹ ചെന്നൈ പോര്‍ട്ട് ട്രസ്റ്റില്‍ പ്രതിരോധമന്ത്രി രാജ്‌നാഥ് സിംഗ് കമ്മീഷന്‍ ചെയ്തു. കോസ്റ്റ്ഗാര്‍ഡിന്റെ 98 മീറ്റര്‍ ഓഫ്‌ഷോര്‍ പട്രോളിംഗ് വെസല്‍ വിഭാഗത്തില്‍പ്പെട്ട ഏഴ് കപ്പലുകളില്‍ നാലാമത്തേതാണ് വരാഹകപ്പല്‍ കോസ്റ്റ്ഗാര്‍ഡിന്റെ ശേഷി വര്‍ധിപ്പിക്കുമെന്ന് പ്രതിരോധമന്ത്രി പറഞ്ഞു. പൂര്‍ണമായും തദ്ദേശീയമായി നിര്‍മിച്ച കപ്പലാണ് വരാഹ. മംഗലാപുരം തുറമുഖം മുതല്‍ കന്യാകുമാരി വരെയുള്ള ഭാഗത്തെ പട്രോളിങ്ങിനായിരിക്കും വരാഹ ഉപയോഗിക്കുക. 14 ഓഫീസര്‍മാരും 89 ജീവനക്കാരും ഇതിലുണ്ടാകും. ഹെലികോപ്റ്ററും നാല് അതിവേഗ ബോട്ടുകളും വഹിക്കാന്‍ ശേഷിയുണ്ട് ഈ കപ്പലിന്. അത്യാധുനിക ആശയവിനിമയ, ദിശനിര്‍ണയ ഉപകരണങ്ങളുണ്ടാകും. 33 എം.എം., 12.7 എം.എം. തോക്കുകളുമുണ്ട്.

മയക്കുമരുന്ന് കടത്ത്, എണ്ണച്ചോര്‍ച്ച, കടല്‍മാര്‍ഗമുള്ള തീവ്രവാദം എന്നിവ നേരിടാന്‍ വിവിധ രാജ്യങ്ങളുടെ സേനകളുമായി ഇന്ത്യന്‍ തീരസംരക്ഷണസേന സഹകരിച്ച് പ്രവര്‍ത്തിക്കുന്നുണ്ടെന്നും അത്യാധുനിക നിരീക്ഷണ സംവിധാനങ്ങളോടുകൂടിയ കപ്പല്‍ തീരസംരക്ഷണസേനയുടെ കരുത്ത് പലമടങ്ങായി വര്‍ധിപ്പിക്കുമെന്നും മന്ത്രി പറഞ്ഞു. കാട്ടുപ്പള്ളി കപ്പല്‍നിര്‍മാണശാലയില്‍ എല്‍. ആന്‍ഡ് ടി.യാണ് നിര്‍മാണം നടത്തിയത്.