മറിയം ത്രേസ്യയെ വിശുദ്ധയായി പ്രഖ്യാപിക്കാനുള്ള തീരുമാനം ഓരോ ഇന്ത്യക്കാരനും അഭിമാനകരം. വാഴ്ത്തപ്പെട്ട മറിയം ത്രേസ്യയ്ക്ക് ആദരമര്‍പ്പിച്ച് പ്രധാനമന്ത്രി നരേന്ദ്ര മോദി. പ്രതിമാസ 'മന്‍ കി ബാത്ത്' പരിപാടിയിലാണ് മറിയം ത്രേസ്യയ്ക്ക് അദ്ദേഹം ആദരമര്‍പ്പിച്ചത്. ഒക്ടോബര്‍ 13 നാണ് മറിയം ത്രേസ്യയെ ഫ്രാന്‍സിസ് മാര്‍പാപ്പ വിശുദ്ധയായി പ്രഖ്യാപിക്കുന്നത്.
മറിയം ത്രേസ്യയ്ക്ക് ഹൃദയപൂര്‍വമായ ആദരമര്‍പ്പിക്കുന്നതോടൊപ്പം ഈ അഭിമാന മുഹൂര്‍ത്തത്തില്‍ രാജ്യത്തെ എല്ലാ പൗരന്മാരെയും പ്രത്യേകിച്ച് ക്രിസ്ത്യന്‍ സഹോദരീ സഹോദരന്മാരെയും അഭിനന്ദിക്കുന്നുവെന്നും അദ്ദേഹം കൂട്ടിച്ചേര്‍ത്തു. മറിയം ത്രേസ്യയുടെ 50 വര്‍ഷത്തെ ജീവിതകാലത്ത് അവര്‍ മനുഷ്യനന്മയ്ക്കു വേണ്ടി പ്രവര്‍ത്തിച്ച്, ലോകത്തിന് സേവനത്തിന്റെ ഉത്തമ മാതൃകയായി മാറിയെന്ന് പ്രധാനമന്ത്രി അറിയിച്ചു.