ആള്‍ക്കൂട്ട ആക്രമണമെന്ന വാക്ക്(lynching) പാശ്ചാത്യ സൃഷ്ടിയാണ്. അത് കൊണ്ട് ഇന്ത്യയില്‍ ആ വാക്ക് ഉപയോഗിച്ച് രാജ്യത്തെ അപകീര്‍ത്തിപ്പെടുത്തരുതെന്ന് ആര്‍എസ്എസ് തലവന്‍ മോഹന്‍ ഭഗവത് പറഞ്ഞു. ഇന്ത്യയെ അപമാനിക്കാന്‍ ചിലര്‍ ഉപയോഗിക്കുന്നതാണ് ആള്‍ക്കൂട്ട ആക്രമണമെന്ന വാചകമെന്ന് അദ്ദേഹം ചൂണ്ടിക്കാട്ടി. നാഗ്പൂരില്‍ ആര്‍എസ്എസ് സംഘടിപ്പിച്ച വിജയദശമി ചടങ്ങില്‍ സംസാരിക്കവെയാണ് മോഹന്‍ ഭഗവത് ഈ കാര്യം പറഞ്ഞത്.

ആള്‍ക്കൂട്ട ആക്രമണം(lynching) ഇന്ത്യയില്‍ ഉണ്ടായ വാക്കല്ലെന്നും ഒരു പ്രത്യേക മതത്തില്‍ നിന്നുമാണ് ആ വാക്ക് വന്നതെന്നും അത് ഇന്ത്യയുടെ മേല്‍ അടിച്ചേല്‍പ്പിക്കാന്‍ ശ്രമിക്കരുതെന്നും പറഞ്ഞ അദ്ദേഹം രാജ്യത്തെ അപമാനിക്കാന്‍ ആള്‍ക്കൂട്ട ആക്രമണം എന്ന പദം ഉപയോഗിക്കരുതെന്നും പറയുകയുണ്ടായി. രാജ്യത്തെ ജനം സൗഹാര്‍ദ്ദപരമായി ജീവിക്കണംമെന്നും എല്ലാവരും നിയമത്തെ അനുസരിച്ച് ജീവിക്കണമെന്നും ആ സംസ്കാരമാണ് ആര്‍എസ്എസ് പഠിപ്പിക്കുന്നതെന്നും അദ്ദേഹം സൂചിപ്പിച്ചു. ഇന്ത്യയെക്കുറിച്ചുള്ള ചിന്താഗതി കഴിഞ്ഞ കുറച്ച് വര്‍ഷമായി മാറിക്കൊണ്ടിരിക്കുന്നു. വികസിത ഭാരതത്തെ ഭയക്കുന്നവർ രാജ്യത്ത് ആശങ്ക സൃഷ്ടിക്കുന്നു . ഇവര്‍ ഭാരതം ശക്തവും ഊര്‍ജ്വസ്വലവുമായ രാജ്യമാകുന്നതിനെ ഭയക്കുന്നുവെന്നും അദ്ദേഹം പറഞ്ഞു. ഇവരെ ബൗദ്ധിക തലത്തിലും സാമൂഹിക തലത്തിലും തിരിച്ചറിയണമെന്നും മോഹന്‍ ഭഗവത് പറഞ്ഞു.