സുനന്ദ പുഷ്‌കറിന്റെ കൊലപാതകവുമായി ബന്ധപ്പെട്ട് ശശി തരൂരിനെ വീണ്ടും ചോദ്യം ചെയ്യും. ചോദിച്ചിട്ടും ചോദിച്ചിട്ടും തൃപ്തി വരാതെ ഡല്‍ഹി പോലീസ്. ഐപിഎല്‍ വിഷയത്തിലാണ് ഇപ്പോള്‍ ചോദ്യം ചെയ്യല്‍ പ്രധാനമായും നടക്കുന്നത്. എംപിയോട് തന്റെ യാത്ര പരിപാടിയും മറ്റ് നീക്കങ്ങളും കൃത്യമായി അറിയിക്കണമെന്നും ഡല്‍ഹി പൊലീസ് ആവശ്യപ്പെട്ടിട്ടുണ്ട്. ശശി തരൂര്‍ കൈമാറിയ ഇമെയിലുകളും, മറ്റ് സന്ദേശങ്ങളും ഡല്‍ഹി പൊലീസ് സൂക്ഷ്മമായി പരിശോധിക്കുകയാണ്. ഇത് പൂര്‍ത്തിയാകുമ്പോഴും മൊഴികളിലെ വൈരുദ്ധ്യം നിലനിന്നാല്‍ തരൂരിനെ ഡല്‍ഹി പൊലീസ് അറസ്റ്റ് ചെയ്യും. എവിടെയാണോ തരൂര്‍ ഉള്ളത് അവിടെ എത്തി അറസ്റ്റ് ചെയ്യാനാണ് പദ്ധതിയെന്നാണ് സൂചന. അതിനാലാണ് യാത്രാ വിവരങ്ങള്‍ ഡല്‍ഹി പൊലീസിനെ അറിയിക്കണമെന്ന് നിര്‍ദ്ദേശമുള്ളത്. വിദേശ യാത്രയ്ക്ക് അനുമതി നല്‍കണമോ എന്നതും പൊലീസ് ആലോചിക്കുന്നുണ്ട്.
തരൂര്‍ ഇപ്പോഴും ചോദ്യങ്ങള്‍ക്ക് വ്യക്തമായ മറുപടി നല്‍കാത്തതും പലതും ഒളിക്കാന്‍ ശ്രമിക്കുന്നതുമാണ് പോലീസിനെ കുഴയ്ക്കുന്നത്. ഇന്നലെ ഉച്ചയോടെ തിരുവനന്തപുരത്തേക്ക് പുറപ്പെട്ട തരൂര്‍ ഡല്‍ഹിയില്‍ മടങ്ങിയെത്തിയശേഷമാകും വീണ്ടും ചോദ്യം ചെയ്യുക. കഴിഞ്ഞ ജനുവരി 19നും ഇക്കഴിഞ്ഞ വ്യാഴാഴ്ചയും തരൂരിനെ വിശദമായി ചോദ്യം ചെയ്തിരുന്നു. ഇന്നലെയും അദ്ദേഹം അന്വേഷണ ഉദ്യോഗസ്ഥര്‍ക്കുമുന്നില്‍ ഹാജരായിരുന്നു. തന്റെ കമ്പ്യൂട്ടര്‍ ഹാര്‍ഡ് ഡിസ്‌കുകള്‍, ഫോണ്‍ ഇ മെയില്‍ വിവരങ്ങളടക്കം ശശി തരൂര്‍ അന്വേഷണസംഘത്തിന് ഇന്നലെ കൈമാറിയിട്ടുണ്ട്. കൊച്ചി ഐപിഎല്‍ ടീമുമായി ബന്ധപ്പെട്ട പണമിടപാടുകളിലേക്കാണ് കാര്യങ്ങളെത്തുന്നത്. കേന്ദ്ര സര്‍ക്കാരിന്റെ ആദായ നികുതി വകുപ്പും തരൂരിനെ ചോദ്യം ചെയ്തു കഴിഞ്ഞു.
ഐ.പി.എല്‍ വിവാദത്തിലേക്ക് അന്വേഷണം വ്യാപിക്കുന്നതിന്റെ ഭാഗമായി ഡല്‍ഹി പൊലീസിന്റെ സാമ്പത്തിക കുറ്റാന്വേഷണ വിഭാഗം കൊച്ചി ഐ.പി.എല്‍ ടീമിന്റെ സാമ്പത്തിക ഇടപാടുകളും പരിശോധിക്കുന്നുണ്ട്. ടീമിന്റെ ഉടമസ്ഥര്‍, സ്‌പോണ്‍സര്‍മാര്‍, ടീം നടത്തിയ ഇടപാടുകള്‍ തുടങ്ങിയവയെല്ലാം അന്വേഷിക്കും. ഇതിന്റെ ഭാഗമായി പൊലീസ് സംഘം മുംബയിലേക്ക് എത്തിയെന്നും റിപ്പോര്‍ട്ടുണ്ട്. കൊച്ചി ടീമിന്റെ ഉടമയായിരുന്ന റെന്‍ഡേവൂ സ്‌പോര്‍ട്‌സ് വേള്‍ഡിന്റെ ഭാരവാഹികളെയും ചോദ്യം ചെയ്യും. സുനന്ദ പുഷ്‌കറിന് വാഗ്ദാനം നല്‍കിയ 75 കോടിയുടെ വിയര്‍പ്പിന്റെ ഓഹരിയെക്കുറിച്ചും ചോദിച്ചറിയും.
കൊച്ചി ഐപിഎല്‍ ടീമില്‍ വിയര്‍പ്പ് ഓഹരിയായി സുനന്ദയ്ക്ക് കിട്ടിയ തുക എങ്ങനെ കിട്ടിയെന്നാണ് പ്രധാനമായും അന്വേഷിക്കുന്നത്. കൊച്ചി ടീമുമായി സുനന്ദയ്ക്കുള്ള ബന്ധം. തരൂരിന്റെ അവഹിത സ്വത്ത് സമ്പാദനം തുടങ്ങിയവയെല്ലാം പരിശോധിക്കുന്നു. സുനന്ദയ്ക്ക് 93 കോടി രൂപയുടെ ആസ്തിയുണ്ടായിരുന്നു.

2002നും 2010നും ഇടയിലാണ് സമ്പാദ്യത്തില്‍ വളര്‍ച്ചയുണ്ടായത്. ഇതിന് പിന്നിലെ കാരണവും ആദായ നികുതി വകുപ്പ് അന്വേഷിക്കുന്നു. കൊച്ചി ടസ്‌കേഴ്‌സിന്റെ ദുബായ് ഇടപാടും സംശയത്തിലാണ്. ഐപിഎല്‍ ഇടപാടുകളില്‍ താന്‍ ബിനാമിയായിരുന്നുവെന്നും ചിലത് വെളിപ്പെടുത്തിയാല്‍ എല്ലാവരുടേയും കഥ കഴിയുമെന്നും മരിക്കുന്നതിന് ദിവസങ്ങള്‍ക്ക് മുമ്പ് സുനന്ദ പറഞ്ഞിരുന്നു. ഇതുമായി ബന്ധപ്പെട്ട സംശയ നിവാരണത്തിന് തരൂരിന് കഴിഞ്ഞുമില്ല. ഈ സാഹചര്യത്തിലാണ് കേസ് അന്വേഷണത്തില്‍ തരൂര്‍ സംശയ നിഴലില്‍ ആകുന്നത്.
ചോദ്യം ചെയ്യലില്‍ തരൂര്‍ പറഞ്ഞ പല കാര്യങ്ങളിലും വൈരുദ്ധ്യമുണ്ടെന്നാണ് അന്വേഷണ ഉദ്യോഗസ്ഥര്‍ പറയുന്നത്. തരൂരിന്റെയും സഹായികളുടേയും മൊഴികളിലും വൈരുദ്ധ്യമുണ്ട്. ഇക്കാര്യത്തില്‍ വ്യക്തത വരുത്താന്‍വേണ്ടിയാണ് വീണ്ടും ചോദ്യം ചെയ്യുന്നതെന്നാണ് സൂചന. അതിലും അവ്യക്തത നിഴലിച്ചാല്‍ അറസ്റ്റ് ഉറപ്പാണ്. ചോദ്യം ചെയ്യലിനിടെ തന്നെ അറസ്റ്റ് ചെയ്യാനും സാധ്യതയുണ്ട്. എന്നാല്‍ പാര്‍ലമെന്റ് അംഗമായതിനാല്‍ മൊഴി വിശകലനം ചെയ്ത് പഴുതുകള്‍ അടയ്ക്കാനാണ് നീക്കം. അതുകൊണ്ടാണ് യാത്രാ വിവരങ്ങള്‍ അറിയിക്കാനുള്ള പൊലീസിന്റെ നിര്‍ദ്ദേശം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha