ഇന്ത്യന് ആകാശത്തേക്ക് 3 ചാരക്കണ്ണുകള് കൂടി എത്തുന്നു
ശത്രുവിന്റെ ഒളിത്താവളത്തിലെ സൂക്ഷ്മദൃശ്യങ്ങള് വരെ പകര്ത്താന് കഴിയുന്ന കാര്ട്ടോസാറ്റ്-3 അടുത്ത 25-നും അതിര്ത്തിയിലെ നുഴഞ്ഞുകയറ്റക്കാരെ കണ്ടെത്താന് കഴിയുന്ന റിസാറ്റ്-2 ബിആര് 1, ബിആര് 2 ഉപഗ്രഹങ്ങള് ഡിസംബറിലും ഐഎസ്ആര്ഒ വിക്ഷേപിക്കുമ്പോള് ഇന്ത്യന് സേനകളുടെ ആകാശക്കരുത്തു കൂടും.
ഇക്കഴിഞ്ഞ ഏപ്രിലില് സൈനികാവശ്യങ്ങള്ക്കു മാത്രമായി എമിസാറ്റ്, മേയില് റിസാറ്റ് 2 ബി ഉപഗ്രഹങ്ങള് വിക്ഷേപിച്ചതിനു പിന്നാലെയാണ് ഇന്ത്യ ആകാശത്ത് വീണ്ടും ചാരക്കണ്ണുകള് വിന്യസിക്കുന്നത്. പിഎസ്എല്വി സി-47, 48, 49 റോക്കറ്റുകള് ഉപയോഗിച്ചായിരിക്കും വിക്ഷേപണം. കാര്ട്ടോസാറ്റിനൊപ്പം യുഎസിന്റെ 13 ചെറിയ ഉപഗ്രഹങ്ങള് കൂടി വിക്ഷേപിക്കുന്നുണ്ട്.
25 സെന്റിമീറ്ററിന്റെ ദൂരവ്യത്യാസത്തിലിരിക്കുന്ന വസ്തുക്കളെപ്പോലും 509 കിലോമീറ്റര് ഉയരെയുള്ള ഭ്രമണപഥത്തില് നിന്നുകൊണ്ട് വേര്തിരിച്ചറിയാനും ദൃശ്യം പകര്ത്താനും ശേഷിയുള്ള ക്യാമറയാണു കാര്ട്ടോസാറ്റ് 3-ല് ഉള്ളത്. ശത്രുപാളയത്തിലെ മനുഷ്യര്ക്കൊപ്പം തോക്കുകളുടെയും ബോംബുകളുടെയും വരെ വിവരങ്ങള് സേനയ്ക്കു ലഭിക്കും.
ഭീകരകേന്ദ്രങ്ങളിലെ ഒളിത്താവളങ്ങള്ക്കുള്ളിലെ ദൃശ്യം വരെ പകര്ത്താന് കഴിയുന്ന മള്ട്ടിസ്പെക്ട്രല്, ഹൈപ്പര് സ്പെക്ട്രല് ഉപകരണങ്ങളും കാര്ട്ടോസാറ്റിലുണ്ട്. 16 കിലോമീറ്റര് വ്യാപ്തിയുള്ള മേഖല ഒറ്റദൃശ്യത്തില് പകര്ത്താനുളള സ്പേഷ്യല് റേഞ്ചുമുണ്ട്.
കടുകട്ടി മേഘങ്ങളെയും ഇരുട്ടിനെയും മറികടന്നു ചിത്രങ്ങള് പകര്ത്താന് കഴിയുന്ന ഉപഗ്രഹങ്ങളാണു റിസാറ്റ് ബിആര്1, 2 എന്നിവ. അതിര്ത്തിയിലെ നുഴഞ്ഞുകയറ്റം നിരീക്ഷിക്കാനാണ് ഇവ ഉപയോഗിക്കുക.
ജിസാറ്റ്-1, ജിസാറ്റ്-2, റിസാറ്റ്-1എ, ജിസാറ്റ് 32 തുടങ്ങിയ സൈനികാവശ്യങ്ങള്ക്കു കൂടി ഉപയോഗിക്കാവുന്ന ഉപഗ്രഹങ്ങള് ഐഎസ്ആര്ഒയുടെ അടുത്ത വര്ഷത്തെ വിക്ഷേപണപ്പട്ടികയിലുണ്ട്.
https://www.facebook.com/Malayalivartha