സഹോദരാ, നിങ്ങള് തോക്ക് എടുക്കണം എന്ന് മദ്യപിച്ച് ലക്കുകെട്ട ആളുടെ ആക്രോശം; ഡാൻസ് നിർത്തിയ യുവതിക്ക് നേരെ വെടിയുതീർത്തു
വിവാഹപാര്ട്ടിക്കിടെ ഉണ്ടായ വെടിവയ്പ്പിൽ യുവതിക്ക് ഗുരുതര പരിക്കേറ്റു. ഉത്തര്പ്രദേശിലെ തിക്ര ഗ്രാമത്തില് കഴിഞ്ഞാഴ്ചയാണ് സംഭവം. വിവാഹപാര്ട്ടിക്കിടെ ഡാന്സ് നിര്ത്തിയ നൃത്തസംഘത്തിന് നേരെയായിരുന്നു ആക്രമണം. 22 കാരിയായ ഹിനയ്ക്കാണ് മുഖത്ത് വെടിയേറ്റത്. ഡിസംബര് ഒന്നിന് തിക്ര ഗ്രാമത്തില് ഗ്രാമത്തലവന് സുധീര് സിംഗ് പട്ടേലിന്റെ മകളുടെ വിവാഹ ചടങ്ങിലായിരുന്നു ആക്രമണം.
വെടിവയ്പില് വരന്റെ അമ്മാവന്മാരായ മിഥിലേഷ്, അഖിലേഷ് എന്നിവര്ക്കും പരിക്കേറ്റതായി പൊലീസ് പറഞ്ഞു. സംഭവത്തിന്റെ വീഡിയോ സോഷ്യല് മീഡിയയില് ശ്രദ്ധേയമാവുകയാണ്. ഒരു മിനിട്ട് ദൈര്ഘ്യമുള്ള വീഡിയോയില് യുവതി ഡാന്സ് നിര്ത്തിയപ്പോള് സഹോദരാ, നിങ്ങള് തോക്ക് എടുക്കണം എന്ന് മദ്യപിച്ച് ലക്കുകെട്ട ഒരാള് പറയുന്നത് കേള്ക്കാം.
പെട്ടെന്ന് യുവതി വെടിയേറ്റ് വീഴുന്നതും, എന്താണ് സംഭവിച്ചതെന്ന് അറിയാതെ അതിഥികള് പകച്ചു നില്ക്കുന്നതും വീഡിയോയില് കാണാം. ഉടന് കാണ്പൂരിലെ ആശുപത്രിയില് പ്രവേശിപ്പിച്ച യുവതി സുഖം പ്രാപിച്ചുവരികയാണ്. ഗ്രാമത്തലവന്റെ കുടുംബാംഗങ്ങളിലൊരാളാണ് യുവതിയ്ക്ക് നേരെ നിറയൊഴിച്ചതെന്ന് റിപ്പോര്ട്ട് ഉണ്ട്.
https://www.facebook.com/Malayalivartha
