പൗരത്വഭേദഗതി നിയമത്തിനെതിരെ രാജ്യവ്യാപകമായി പ്രക്ഷോഭം തുടരുമ്പോഴും കേന്ദ്രആഭ്യന്തരമന്ത്രി അമിത്ഷാ പാറ പോലെ ഉറച്ചുനില്‍ക്കുന്നു. ആരെതിര്‍ത്താലും നിയമം നടപ്പാക്കുമെന്നും സര്‍ക്കാര്‍ ഒരിഞ്ചു പോലും പിന്നോട്ട് പോവില്ലെന്നും കോണ്‍ഗ്രസ് സര്‍ക്കാര്‍ ഭരിക്കുന്ന രാജസ്ഥാനില്‍ വെച്ച് അമിത് ഷാ വീണ്ടും നിലപാട് വ്യക്തമാക്കിയത്. പൗരത്വ ഭേദഗതി നിയമത്തെ അനുകൂലിച്ച് ജോധ്പൂരില്‍ ബി.ജെ.പി നടത്തിയ റാലിയിലായിരുന്നു അമിത്ഷാ പാര്‍ട്ടിയുടെയും സര്‍ക്കാരിന്റെയും തീരുമാനം അറിയിച്ചത്. പ്രതിപക്ഷ പാര്‍ട്ടികളെല്ലാം ഒരുമിച്ച് വന്നാലും ബി.ജെ.പി. പൗരത്വ നിയമ ഭേദഗതി നിയമത്തില്‍ നിന്ന് പിന്നോട്ടു പോകില്ല. എത്രത്തോളം തെറ്റിദ്ധാരണ പടര്‍ത്താന്‍ ആഗ്രഹിക്കുന്നുവോ അത്രത്തോളം ചെയ്‌തോളൂ. ഇക്കാര്യത്തില്‍ വ്യാജ വാര്‍ത്തകള്‍ എത്ര വേണമെങ്കിലും പ്രചരിപ്പിക്കാമെന്നും അദ്ദേഹം പ്രതിഷേധക്കാരോട് പറഞ്ഞു.

വോട്ടുബാങ്ക് രാഷ്ട്രീയത്തിനായി സവര്‍ക്കറെ പോലുള്ള 'മഹത്‌വ്യക്തി'കളെ കോണ്‍ഗ്രസ് അപമാനിക്കുകയാണെന്നും അമിത്ഷാ ചൂണ്ടിക്കാട്ടി. കോണ്‍ഗ്രസ് പ്രവര്‍ത്തകര്‍ അവരവരെ കുറിച്ച് ആലോചിച്ച് ലജ്ജിക്കണമെന്നും അമിത് ഷാ പറഞ്ഞു. രാഹുല്‍ ഗാന്ധിയെയും അമിത് ഷാ പ്രസംഗത്തില്‍ വിമര്‍ശിച്ചു. രാഹുല്‍ ബാബാ, താങ്കള്‍ പൗരത്വ നിയമ ഭേദഗതി വായിച്ചുവെങ്കില്‍, ദയവായി അതേക്കുറിച്ച് ചര്‍ച്ച ചെയ്യാന്‍ എവിടെയെങ്കിലും വരൂ. നിങ്ങള്‍ വായിച്ചില്ലെങ്കില്‍, നിയമം ഇറ്റാലിയന്‍ ഭാഷയിലേക്ക് പരിഭാഷപ്പെടുത്തി തന്ന് സഹായിക്കാം. ദയവായി നിയമം വായിക്കൂ എന്നും അമിത് ഷാ പരിഹസിച്ചു. മുന്‍പ് മതന്യൂനപക്ഷങ്ങള്‍ പീഡിപ്പിക്കപ്പെട്ടപ്പോള്‍ കോണ്‍ഗ്രസ് ഉള്‍പ്പെടെയുള്ള പാര്‍ട്ടികള്‍ എവിടെയായിരുന്നുന്നെന്നും അമിത് ഷാ ചോദിച്ചു.

നുണ പ്രചരിപ്പിച്ച് ജനങ്ങള്‍ക്കിടയില്‍ തെറ്റിധാരണയുണ്ടാക്കാമെന്നാണ് കോണ്‍ഗ്രസും ആംആദ്മിയും കരുതുന്നത്. അത് വിലപ്പോവില്ല. വിഭജനത്തിന്റെ ഭാഷ നന്നായി അറിയാവുന്നത് കോണ്‍ഗ്രസിനാണ്. പാകിസ്താനിലടക്കം മതന്യൂനപക്ഷങ്ങളായ ഹിന്ദുക്കള്‍ പീഡിപ്പിക്കപ്പെടുമ്പോള്‍ കോണ്‍ഗ്രസ് എവിടെപ്പോയിരുന്നെന്നും അമിത് ഷാ ചോദിച്ചു. പൗരത്വ നിയമ ഭേദഗതിയെ എതിര്‍ക്കുന്നതിനു പകരം രാജസ്ഥാനിലെ കോട്ടയില്‍ ദിനംപ്രതി മരിക്കുന്ന കുഞ്ഞുങ്ങളെ ആദ്യം ശ്രദ്ധിക്കൂവെന്ന് രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ടിനെ ഷാ ഉപദേശിച്ചു. കോട്ടയിലെ നവജാത ശിശുമരണത്തില്‍ കുറച്ചുകൂടി ശ്രദ്ധിക്കൂ. അമ്മമാര്‍ നിങ്ങളെ ശപിക്കുകയാണെന്നും അമിത്ഷാ കൂട്ടിച്ചേര്‍ത്തു.

കേന്ദ്ര സര്‍ക്കാരിനെതിരെ ഉയര്‍ന്ന പ്രക്ഷോഭം തണുപ്പിക്കാനാണ് ബിജെപി രാജ്യവ്യാപകമായി പ്രചാരണത്തിന് തുടക്കം കുറിച്ചത്. അതിന്റെ ഭാഗമായിട്ടായിരുന്നു രാജസ്ഥാനിലെ റാലിയും. ദേശീയ പൗരത്വ റജിസ്റ്റര്‍ സംബന്ധിച്ച് മോദിയും അമിത്ഷായും പറയുന്ന വാക്കുകളിലെ വൈരുദ്ധ്യം വലിയ വിവാദമായിരുന്നു. ദേശവ്യാപകമായി പൗരത്വ റജിസ്റ്റര്‍ കൊണ്ടുവരുന്നതിനെക്കുറിച്ച് ഇതുവരെ ചര്‍ച്ച ചെയ്തിട്ടു പോലുമില്ലെന്നാണ് ഡല്‍ഹിയില്‍ നടന്ന റാലിയില്‍ നരേന്ദ്ര മോദി പറഞ്ഞത്. ഇക്കാര്യവും അമിത്ഷാ ആവര്‍ത്തിച്ചു. ജനങ്ങള്‍ക്ക് നരേന്ദ്രമോദി സര്‍ക്കാരിലുള്ള വിശ്വാസം തകര്‍ക്കാനാണ് കോണ്‍ഗ്രസ് അടക്കമുള്ള പ്രതിപക്ഷ പാര്‍ട്ടികള്‍ നീക്കം നടത്തുന്നതെന്നും അതി ഒരുകൂട്ടം മാധ്യമങ്ങളുടെയും ബുദ്ധിജീവികളുടെയും പിന്തുണയുണ്ടെന്നും അമിത്ഷാ ചൂണ്ടിക്കാട്ടി.