രാജസ്ഥാനിലെ കോട്ട ജെകെ ലോണ്‍ സര്‍ക്കാര്‍ ആശുപത്രിയില്‍ മരിച്ച കുട്ടികളുടെ എണ്ണം 110 ആയി. ശനിയാഴ്ച മൂന്നു കുഞ്ഞുങ്ങളുടെ കൂടി മരണമാണ് രേഖപ്പെടുത്തിയത്. കഴിഞ്ഞ ഒരു മാസത്തിനിടെയിലാണ് ഇത്രയധികം കുഞ്ഞുങ്ങള്‍ ഇവിടെ മരിച്ചതെന്നും വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു. ഡല്‍ഹി എയിംസില്‍ നിന്നുള്ള വിദഗ്ധര്‍ ഉള്‍പ്പെട്ട കേന്ദ്ര സംഘം ശനിയാഴ്ച ജെകെ ലോണ്‍ ആശുപത്രി സന്ദര്‍ശിച്ചിരുന്നു.

അതേസമയം, ശരീര താപനില അപകടകരമായി താഴ്ന്നാണു കുട്ടികളേറെയും മരിച്ചതെന്നാണു രാജസ്ഥാന്‍ സര്‍ക്കാര്‍ നിയമിച്ച സമിതിയുടെ കണ്ടെത്തല്‍. അതിശൈത്യത്തില്‍ തണുത്തു വിറച്ച് തുടര്‍ച്ചയായി കുട്ടികള്‍ മരിച്ചു കൊണ്ടിരിക്കുന്‌പോഴും അടിയന്തര സാഹചര്യങ്ങള്‍ ഒരുക്കാന്‍ ആശുപത്രി അധികൃതര്‍ തയാറായില്ലെന്നും റിപ്പോര്‍ട്ടില്‍ കുറ്റപ്പെടുത്തുന്നു. കുട്ടികളുടെ മരണത്തിന്റെ ഉത്തരവാദിത്തത്തില്‍ നിന്ന് ആര്‍ക്കും ഒളിച്ചോടാനാവില്ലെന്ന് ഉപമുഖ്യമന്ത്രി സച്ചിന്‍ പൈലറ്റും വ്യക്തമാക്കിയിരുന്നു.