കനത്ത പ്രതിഷേധം വകവെയ്ക്കാതെ യോഗി സര്‍ക്കാര്‍ രാജ്യത്ത് ആദ്യമായി പൗരത്വ നിയമ ഭേദഗതി നടപ്പാക്കി; പൗരത്വമില്ലാതെ കഴിയുന്നവരെ കണ്ടെത്താന്‍ 75 ജില്ലാ മജിസ്‌ട്രേറ്റുമാരോടും നിര്‍ദേശിച്ചതായി അഡീഷണല്‍ ചീഫ് സെക്രട്ടറി
രാജ്യത്ത് ആദ്യമായി പൗരത്വ നിയമ ഭേദഗതി നടപ്പാക്കുന്നത് യോഗിയുടെ യു.പിയിലാണ്. കനത്ത പ്രതിഷേധം വകവെയ്ക്കാതെയാണ് നടപടി.
പാകിസ്താന്‍, അഫ്ഗാനിസ്താന്‍, ബംഗ്ലാദേശ് എന്നിവിടങ്ങളില്‍നിന്ന് കുടിയേറി പൗരത്വമില്ലാതെ കഴിയുന്നവരെ കണ്ടെത്താന്‍ 75 ജില്ലാ മജിസ്‌ട്രേറ്റുമാരോടും നിര്‍ദേശിച്ചതായി അഡീഷണല്‍ ചീഫ് സെക്രട്ടറി അവനീഷ് അവസ്തിയാണ് വെളിപ്പെടുത്തിയിരിക്കുന്നത്.
പുതിയ നിയമത്തിലെ വ്യവസ്ഥകളനുസരിച്ച് ഇവര്‍ക്ക് പൗരത്വം നല്‍കാനാണ് നീക്കം. സംസ്ഥാനത്ത് അനധികൃതമായി കഴിയുന്ന മുസ്ലിം കുടിയേറ്റക്കാരെ സ്വന്തം രാജ്യങ്ങളിലേക്കാണ് തിരിച്ചയക്കുക. എന്നാല്‍, തിരിച്ചയക്കുന്ന കാര്യത്തില്‍ ഇതുവരെ തീരുമാനമായിട്ടില്ല.
എന്‍.ഡി.എ ഘടകകക്ഷികള്‍ ഭരിക്കുന്ന ബീഹാര്‍ ഉള്‍പ്പെടെ തിരക്കിട്ട അനുനയ നീക്കങ്ങളാണിപ്പോള്‍ നടക്കുന്നത്. സുപ്രീംകോടതിയില്‍ നിന്നു കൂടി അനുകൂല നിലപാടുണ്ടായാല്‍ ഇവരെല്ലാം പിന്നോട്ട് പോകുമെന്നാണ് കേന്ദ്രം കരുതുന്നത്.
ബി.ജെ.പി ഭരിക്കുന്ന എല്ലാ സംസ്ഥാനങ്ങളും ആദ്യം തന്നെ പൗരത്വ ഭേദഗതി നിയമം നടപ്പാക്കണമെന്നാണ് ആര്‍.എസ്.എസും നിര്‍ദ്ദേശിച്ചിരിക്കുന്നത്. ഇതിനു ശേഷമായിരിക്കും മറ്റു സംസ്ഥാനങ്ങളില്‍ കേന്ദ്രം ഇടപെടല്‍ നടത്തുക.
കേരള മോഡലില്‍ മറ്റൊരു നിയമസഭയും പ്രമേയം പാസാക്കാത്തത് കേന്ദ്രത്തിന് ആശ്വാസമായിട്ടുണ്ട്. കോണ്‍ഗ്രസ്സാകട്ടെ പ്രക്ഷോഭത്തില്‍ നിന്നും ഇപ്പോള്‍ ഉള്‍വലിഞ്ഞ അവസ്ഥയിലുമാണ്.
https://www.facebook.com/Malayalivartha
