മേലുദ്യോഗസ്ഥന്‍, രൂക്ഷമായ ഭാഷ തൊഴിലിടങ്ങളില്‍ ഉപയോഗിക്കുന്നത് ലൈംഗിക പീഡനമല്ലെന്ന് മദ്രാസ് ഹൈക്കോടതി
ചെറിയ പ്രശ്‌നങ്ങള്‍ ഊതിവീര്‍പ്പിച്ചു തൊഴിലിടങ്ങളില്‍ ലൈംഗിക പീഡനം തടയുന്നതിനുള്ള നിയമം ദുരുപയോഗപ്പെടുത്തുന്നില്ലെന്ന് ഉറപ്പാക്കണമെന്നു ജസ്റ്റിസ് ആര്‍.ഹേമലത, ജസ്റ്റിസ് എം.സത്യനാരായണന്‍ എന്നിവരുള്‍പ്പെട്ട മദ്രാസ് ഹൈക്കോടതി
ബെഞ്ച് വിധിച്ചു. സഹ പ്രവര്‍ത്തകയോട് രൂക്ഷമായ ഭാഷയില്‍ സംസാരിക്കുന്നതു തൊഴിലിടങ്ങളില്‍ ലൈംഗിക പീഡനം തടയുന്നതിനുള്ള നിയമത്തിന്റെ പരിധിയില്‍ വരില്ലെന്നു മദ്രാസ് ഹൈക്കോടതി വ്യക്തമാക്കി.
ഇന്റലക്ച്വല്‍ പ്രോപ്പര്‍ട്ടി ഓഫ് ഇന്ത്യ ഡപ്യൂട്ടി രജിസ്ട്രാര്‍ നടരാജന്‍ ജോലിക്കിടെ രൂക്ഷമായ ഭാഷ ഉപയോഗിച്ചുവെന്നാരോപിച്ച്, സഹപ്രര്‍ത്തകയായ യുവതി ജോലി സ്ഥലത്തെ ലൈംഗിക പീഡനം തടയാനുള്ള നിയമം അനുസരിച്ചു പരാതി നല്‍കിയിരുന്നു. സഹപ്രവര്‍ത്തകയുടെ പരാതി സെന്‍ട്രല്‍ അഡ്മിനിസ്‌ട്രേറ്റീവ് ട്രൈബ്യൂണലും ജില്ലാ ലോക്കല്‍ കംപ്ലെയിന്റ് കമ്മിറ്റിയും ശരിവച്ചു. ഇതിനെതിരെ നടരാജന്‍ ഹൈക്കോടതിയെ സമീപിച്ചു. വി.നടരാജന്റെ ഹര്‍ജി പരിഗണിക്കവേയാണ് വ്യക്തിപരമായ വൈരാഗ്യം തീര്‍ക്കാന്‍ പരാതിക്കാരി നിയമം ദുരുപയോഗിക്കുകയായിരുന്നെന്ന് വ്യക്തമാണെന്ന് കോടതി പറഞ്ഞത്.
എല്ലാ ഓഫിസുകളിലും പാലിക്കേണ്ട മര്യാദകളുണ്ട്. ഏല്‍പ്പിക്കപ്പെട്ട ജോലി പൂര്‍ത്തിയാക്കുന്നതില്‍നിന്നു വനിതാ ജീവനക്കാര്‍ക്കും ഒഴിഞ്ഞു മാറാനാവില്ല. കഴിവില്ലായ്മയോ ഓഫിസുമായി ബന്ധപ്പെട്ട മറ്റു കാരണങ്ങള്‍ കൊണ്ടോ വിവേചനം നേരിട്ടാല്‍ അതിനുള്ള പരിഹാരം ലൈംഗിക പീഡന പരാതി നല്‍കുകയല്ലെന്നു കോടതി പറഞ്ഞു.
https://www.facebook.com/Malayalivartha
