കൊറോണാവൈറസ് പകര്ച്ചവ്യാധിക്കിടെ ഇറാനില് കുടുങ്ങിയ മുന്നൂറോളം ഇന്ത്യക്കാരുടെ രക്തസാമ്പിളുകളുമായി ഇറാനില് നിന്നുള്ള വിമാനം ഇന്ത്യയില് ഇന്ന് രാത്രി ലാന്ഡ് ചെയ്യും; വൈറസ് പടര്ന്നുപിടിച്ച രാജ്യത്ത് കുടുങ്ങിയ ആയിരക്കണക്കിന് പേരില് നിന്നുമുള്ളവരുടെ സാമ്പിളുകളാണ് വിമാനം എത്തിക്കുന്നത്; ഇന്ത്യയില് വന്നിറങ്ങുന്ന വിമാനം ഇറാന് പൗരന്മാരെ തിരികെ കൊണ്ടുപോകുകയും ചെയ്യും
വിമാനത്തിന് ഇന്ത്യയുടെ ഏവിയേഷന് റെഗുലേറ്ററായ ഡയറക്ടറേറ്റ് ജനറല് ഓഫ് സിവില് ഏവിയേഷന് അനുമതി നല്കി. ഇതോടെ അടുത്ത 24 മണിക്കൂറില് വിമാനം ഡല്ഹിയില് ഇറങ്ങും. ഇന്ത്യക്കാരുടെ രക്തസാമ്പിളുകള് കൊറോണാവൈറസ് പരിശോധനയ്ക്കായി ഉപയോഗിക്കും. നെഗറ്റീവായി കണ്ടെത്തുന്നവരെ തിരികെ എത്തിക്കും.
ഏകദേശം 2000 ഇന്ത്യക്കാരാണ് ഇറാനിലുള്ളത്. ഇവരില് ഭൂരിഭാഗവും കശ്മീരിലെ കാര്ഗില് മേഖലയില് നിന്നുള്ളവരാണ്. ഇറാനിലെ മതകേന്ദ്രം സന്ദര്ശിക്കാന് എത്തിയതാണ് ഇവര്. മാരകമായ കൊറോണാവൈറസ് പൊട്ടിപ്പുറപ്പെട്ടതോടെ ഇരുരാജ്യങ്ങളുടെയും യാത്രാവിമാനങ്ങള് റദ്ദാക്കിയത് മൂലം ഇന്ത്യക്കാര് കുടുങ്ങി. മിഡില് ഈസ്റ്റിലെ കൊറോണാ പ്രഭവകേന്ദ്രമായി ഇറാന് മാറിയിട്ടുണ്ട്.
107 മരണങ്ങളാണ് വൈറസ് ബാധിച്ച് റിപ്പോര്ട്ട് ചെയ്തിരിക്കുന്നത്. ഇറാനിലുള്ള ഇന്ത്യക്കാരെ അടിയന്തരമായി തിരിച്ചെത്തിക്കാന് അധികൃതരുമായി ചര്ച്ച നടത്തിവരികയാണെന്ന് കേന്ദ്ര വ്യോമയാന മന്ത്രി ഹര്ദീപ് സിംഗ് പുരി പറഞ്ഞു. ഇന്ത്യയിലും ഏകദേശം 2000 ഇറാന്കാര് കുടുങ്ങിയിട്ടുണ്ട്.
ഒരു സംഘം ഇന്ത്യന് ഡോക്ടര്മാരെ നേരത്തെ തന്നെ ഇറാനില് കുടുങ്ങിയ ഇന്ത്യക്കാര്ക്ക് വൈദ്യസഹായം നല്കാന് അയച്ചിരുന്നു. വൈറസ് മാരകമായതോടെ സ്കൂളുകളും, യൂണിവേഴ്സിറ്റികളും ഏപ്രില് വരെ അടച്ചിരിക്കുകയാണ് ഇറാന്.
അതിനിടെ കൊറോണ വൈറസ് ബാധ പടരുന്ന പശ്ചാത്തലത്തില് ബഹ്റൈനിലെ വിദ്യാഭ്യാസ സ്ഥാപനങ്ങള്ക്ക് പ്രഖ്യാപിച്ച അവധി മാര്ച്ച് 29 വരെ നീട്ടി. കിരീടാവകാശി സല്മാന് ബിന് ഹമദ് അല് ഖലീഫയുടെ അധ്യക്ഷതയില് ചേര്ന്ന ഗവണ്മെന്റ് എക്സിക്യൂട്ടീവ് കമ്മിറ്റി യോഗത്തിലാണ് തീരുമാനമെടുത്തത്.
എന്നാല് അധ്യാപക, അനധ്യാപക ജീവനക്കാര് ഞായറാഴ്ച മുതല് ജോലിക്കെത്തണമെന്നും വിദ്യാഭ്യാസ മന്ത്രാലയം അറിയിച്ചിട്ടുണ്ട്. കിന്റര്ഗാര്ട്ടനുകള് മുതല് ഉന്നത വിദ്യാഭ്യാസ സ്ഥാപനങ്ങള് വരെയുള്ള എല്ലാ പൊതു, സ്വകാര്യ മേഖലകളിലെ വിദ്യാഭ്യാസ സ്ഥാപനങ്ങള്ക്കും അവധി ബാധകമാണെന്നുമാണ് അറിയിപ്പ്
കൊവിഡ് 19 ബാധിച്ച് 24 മണിക്കൂറിനുള്ളില് ഇറ്റലിയില് മരിച്ചത് 49 പേര്. ഇതോടെ ഇറ്റലിയില് കൊറോണ ബാധിച്ച് മരിച്ചവരുടെ എണ്ണം 197 ആയി. ലോകത്തെ ആശങ്കയിലാഴ്ത്തി കൊറോണ ബാധിച്ചുള്ള മരണങ്ങള് ഏറുകയാണ്. ഇറ്റലിയില് ഒരാഴ്ചയ്ക്കിടെ 4600 പേര്ക്കാണ് കൊവിഡ് 19 രോഗബാധ സ്ഥിരീകരിച്ചത്. ഇതോടെ ചൈനയ്ക്ക് പുറത്ത് ഏറ്റവുമധികം കൊവിഡ് 19 മരണങ്ങള് റിപ്പോര്ട്ട് ചെയ്ത രാജ്യമായി ഇറ്റലി മാറി.
ചൈനയില് മാത്രം 3015 പേരാണ് കൊവിഡ് ബാധിച്ച് മരിച്ചത്. ഇറാനില് 24 മണിക്കൂറിനിടെ 1200 പേര്ക്കാണ് രോഗം സ്ഥിരീകരിച്ചത്. 124 പേരാണ് രോഗം ബാധിച്ച് ഇറാനില് മരിച്ചത്. ലോകാരോഗ്യസംഘടനയുടെ കണക്ക് പ്രകാരം ലോകത്ത് ഒരു ലക്ഷത്തിലധികം പേര് രോഗബാധിതരായി ചികിത്സയിലാണ്.
https://www.facebook.com/Malayalivartha
