വിജയ്യ്ക്കു പകരം തിരുച്ചിറപ്പള്ളിയില് മത്സരിക്കാനില്ലെന്ന് ലോറന്സ്
തമിഴ്നാട് നിയമസഭാ ഉപതെരഞ്ഞെടുപ്പില് തിരുച്ചിറപ്പള്ളി ഈസ്റ്റ് മണ്ഡലത്തില് നിന്നും മത്സരിക്കാനില്ലെന്ന് വ്യക്തമാക്കി നടനും സംവിധായകനുമായ രാഘവ ലോറന്സ് രംഗത്ത്. മുഖ്യമന്ത്രിയും തമിഴക വെട്രി കഴകം അധ്യക്ഷനുമായ വിജയ്യുടെ പിന്തുണയോടെ ലോറന്സ് മണ്ഡലത്തില് ജനവിധി തേടുമെന്ന അഭ്യൂഹങ്ങള് ശക്തമായി നിലനില്ക്കെയാണ്, സോഷ്യല് മീഡിയയിലൂടെ താരം നിലപാട് വ്യക്തമാക്കിയത്. എന്നാല് രാഷ്ട്രീയ പ്രവേശന സാധ്യതകള് ലോറന്സ് പൂര്ണമായി തള്ളിക്കളഞ്ഞിട്ടില്ല.
തമിഴ്നാട് നിയമസഭാ തെരഞ്ഞെടുപ്പില് പെരമ്പൂര്, തിരുച്ചി ഈസ്റ്റ് എന്നീ രണ്ട് മണ്ഡലങ്ങളില് നിന്നും വിജയിച്ച ടി.വി.കെ തലവന് വിജയ്, പിന്നീട് മുഖ്യമന്ത്രിയായി ചുമതലയേല്ക്കുന്നതിന് മുന്നോടിയായാണ് തിരുച്ചി ഈസ്റ്റ് മണ്ഡലത്തിലെ എംഎല്എ സ്ഥാനം രാജിവെച്ചത്. ഇതോടെയാണ് ഉപതെരഞ്ഞെടുപ്പ് അനിവാര്യമായ ഈ മണ്ഡലത്തിലേക്ക് ലോറന്സ് വരുമെന്ന ചര്ച്ചകള് സജീവമായത്. ഷൂട്ടിങ് ലൊക്കേഷനുകളില് പോലും ആളുകള് തന്നെ 'തിരുച്ചി ഈസ്റ്റ് എം.എല്.എ' എന്ന് വിളിച്ച് സ്വാഗതം ചെയ്യാറുണ്ടെന്നും ജനങ്ങളുടെ ഈ സ്നേഹത്തിന് നന്ദിയുണ്ടെന്നും ലോറന്സ് തന്റെ 16 മിനിറ്റ് നീണ്ട വിഡിയോയില് പറഞ്ഞു. എന്നാല് ഇതിലൊരു 'രാഷ്ട്രീയ ധര്മ്മം' അടങ്ങിയിട്ടുണ്ടെന്നാണ് താരത്തിന്റെ പക്ഷം.
''വിജയ് ഒരു സിനിമാ നടനായിരുന്ന കാലം മുതല് അദ്ദേഹത്തിന് വേണ്ടി പോസ്റ്ററുകള് ഒട്ടിച്ചും, പാര്ട്ടി രൂപീകരിച്ചപ്പോള് താഴെത്തട്ടില് കഠിനാധ്വാനം ചെയ്തും കൂടെനിന്ന ഒരുപാട് സാധാരണ പ്രവര്ത്തകരുണ്ട്. ആ മരത്തിന്റെ ഫലം അനുഭവിക്കേണ്ടത് വിത്ത് പാകി അതിനെ വളര്ത്തിയെടുത്തവരാണ്. അല്ലാതെ പെട്ടെന്നൊരു ദിവസം മറ്റൊരാള് വന്ന് അത് തട്ടിയെടുക്കുന്നത് ശരിയല്ല. ഞാന് രാഷ്ട്രീയത്തില് പ്രവേശിക്കുകയാണെങ്കില് ഒരു സാധാരണ പാര്ട്ടി അംഗമായി ചേര്ന്ന് കുറഞ്ഞത് മൂന്ന് നാല് വര്ഷമെങ്കിലും ജനങ്ങള്ക്കായി അധ്വാനിക്കണമെന്നാണ് എന്റെ നയം.'' ലോറന്സ് വിഡിയോയില് പറഞ്ഞു.
തന്റെ ജീവകാരുണ്യ ഫൗണ്ടേഷന്റെ പ്രവര്ത്തനങ്ങള്ക്കായി മുന്പ് കരുണാനിധി, എം.കെ. സ്റ്റാലിന്, ഉദയനിധി സ്റ്റാലിന്, അന്പുമണി രാമദോസ് എന്നിവര് നല്കിയ പിന്തുണയെ ലോറന്സ് വിഡിയോയില് അനുസ്മരിച്ചു. നടനായിരുന്ന കാലത്ത് സ്വന്തം പണം ചിലവഴിച്ച് ഒരു കുട്ടിയുടെ ശസ്ത്രക്രിയയ്ക്ക് വിജയ് സഹായിച്ചിട്ടുണ്ടെന്നും, ഇപ്പോള് അദ്ദേഹം മുഖ്യമന്ത്രിയായ സാഹചര്യത്തില് കൂടുതല് ധൈര്യത്തോടെ കുട്ടികളുടെ ചികിത്സാ സഹായത്തിനായി വിജയ്യെ സമീപിക്കുമെന്നും ലോറന്സ് വ്യക്തമാക്കി.
ലോറന്സ് രാഷ്ട്രീയ ധര്മ്മത്തെക്കുറിച്ച് വാചാലനാകുന്നുണ്ടെങ്കിലും, താരം 'നൈസായി മുങ്ങുകയായിരുന്നു' എന്നാണ് സോഷ്യല് മീഡിയയുടെയും രാഷ്ട്രീയ നിരീക്ഷകരുടെയും വിലയിരുത്തല്. ലൈവ് വീഡിയോയില് രാഷ്ട്രീയവുമായി നേരിട്ട് ബന്ധമില്ലാത്ത കുറെ കഥകളും തന്റെ കീഴിലുള്ള ട്രസ്റ്റിന്റെ പ്രവര്ത്തനങ്ങളും സംസാരിച്ച് ലോറന്സ് വിഷയം മാറ്റാന് ശ്രമിച്ചതായി വിമര്ശകര് ചൂണ്ടിക്കാണിക്കുന്നു. ഡി.എം.കെയുടെ കരുത്തുറ്റ സ്ഥാനാര്ഥിയായി സാക്ഷാല് സ്റ്റാലിന് തന്നെ ഇവിടെ ജനവിധി തേടിയേക്കുമെന്ന സൂചനകള് പുറത്തുവന്നതോടെ ലോറന്സ് പിന്വാങ്ങിയതാണെന്നും രാഷ്ട്രീയ വൃത്തങ്ങളില് സംസാരമുണ്ട്. രാഷ്ട്രീയത്തിലേക്ക് ഇറങ്ങുന്ന എതിരാളികളെ എല്ലാ തരത്തിലും കടന്നാക്രമിക്കുകയും വ്യക്തിപരമായി ഇല്ലാതാക്കാന് ശ്രമിക്കുകയും ചെയ്യുന്ന ഡി.എം.കെയുടെ കടുത്ത രാഷ്ട്രീയ ശൈലിയെ ഭയന്നാണ് ലോറന്സ് ഈ പിന്മാറ്റം നടത്തിയതെന്നാണ് വിലയിരുത്തല്.
ഇത്രയും മോശം രാഷ്ട്രീയ സാഹചര്യം നിലനില്ക്കുമ്പോഴും ഡി.എം.കെയുടെ കയ്യില് ഭരണാധികാരമുള്ളപ്പോഴും, അവരുടെ കോട്ടയിലേക്ക് ഇറങ്ങിച്ചെന്ന് അധികാരം പിടിച്ച വിജയ് തമിഴ്നാട് രാഷ്ട്രീയം ആഗ്രഹിച്ച ഒരു മാറ്റം തന്നെയാണ്. വിജയ്യോടൊപ്പം ധൈര്യത്തോടെ അണിനിരക്കാന് സിനിമാ മേഖലയില് നിന്ന് എത്രപേരുണ്ടാകും എന്നത് കണ്ടറിയണം. എങ്കില്പ്പോലും, നിലവിലെ മുഖ്യമന്ത്രി എന്ന നിലയിലുള്ള വിജയ്യുടെ ജനപ്രീതിയും പ്രവര്ത്തനങ്ങളും കൊണ്ട് തിരുച്ചി ഈസ്റ്റ് മണ്ഡലത്തില് ആര് സ്ഥാനാര്ത്ഥിയായാലും ടി.വി.കെയുടെ വിജയം സുരക്ഷിതമാണെന്നാണ് രാഷ്ട്രീയ ചര്ച്ചകളിലെ പൊതുവിലയിരുത്തല്.
https://www.facebook.com/Malayalivartha
