മോഡിക്കെതിരെ ആദ്യവെടി, ആഗ്രഹിച്ചിരുന്ന പ്രധാനമന്ത്രി പദം പലപ്പോഴായി കൈവിട്ടു പോയി
ബിജെപിയെ ഇന്നത്തെ നിലയില്‍ ശക്തിപ്പെടുത്തുന്നതില്‍ അദ്വാനി വഹിച്ച പങ്ക്‌ ചെറുതല്ല. അദ്വാനി നയിച്ച രഥയാത്രയും ഹിന്ദുത്വ കാര്‍ഡും ഇന്ത്യന്‍ രാഷ്‌ട്രീയത്തില്‍ ചെലുത്തിയ സ്വാധീനം ഒട്ടും ചെറുതല്ല. നിര്‍ഭാഗ്യം കൊണ്ടു മാത്രം പ്രധാനമന്ത്രി പദത്തിലെത്താന്‍ കഴിയാതിരുന്ന ആളാണ്‌ ലാല്‍ കൃഷ്‌ണ അദ്വാനി.
2014ലെ ലോക്സഭാ തെരഞ്ഞെടുപ്പിന്റെ പ്രചാരണ ചുമതല ഗുജറാത്ത്‌ മുഖ്യമന്ത്രി നരേന്ദ്ര മോഡിയെ ഏല്‍പ്പിച്ചതില്‍ പ്രതിഷേധിച്ചാണ്‌ മുതിര്‍ന്ന ബിജെപി നേതാവായ എല്‍കെ അദ്വാനി പാര്‍ട്ടി പദവികള്‍ രാജിവച്ചത്‌. ബിജെപിയുടെ ദേശീയ നിര്‍വ്വാഹക സമിതി അംഗത്വം, പാര്‍ലമെന്ററി ബോര്‍ഡ്‌ അംഗത്വം, തെരഞ്ഞെടുപ്പ് സമിതി അംഗത്വം എന്നിവയാണ്‌ അദ്വാനി ഉപേക്ഷിച്ചത്‌. എല്‍കെ അദ്വാനിയുടെ രാജി ബിജെപിയെ ശരിക്കും ബാധിക്കും.
അടുത്തിടെയായി പാര്‍ട്ടിയുടെ പ്രവര്‍ത്തന രീതികളുമായി ചേര്‍ന്നു പോകാന്‍ കഴിയില്ലെന്ന്‌ രാജിക്കത്തില്‍ അഡ്വാനി പറയുന്നുണ്ട്‌. ഡോ. മുഖര്‍ജി, വാജ്‌പേയി തുടങ്ങിയ നേതാക്കള്‍ പടുത്തുയര്‍ത്തിയ പാര്‍ട്ടിയാണോ ഇതെന്ന്‌ തോന്നിപ്പോകുന്നു. ബിജെപിയിലെ ഇപ്പോഴത്തെ നേതാക്കളില്‍ പലരും സ്വന്തം താത്‌പര്യങ്ങള്‍ക്കാണ്‌ മുന്‍തൂക്കം നല്‍കുന്നത്‌. അതിനാല്‍ പാര്‍ട്ടി പദവികളില്‍ നിന്നും രാജിവയ്‌ക്കുന്നു എന്നാണ്‌ കത്തില്‍ പറയുന്നത്‌. ബി.ജെ.പി അധ്യക്ഷന്‍ രാജ്‌നാഥ് സിങ്ങിന് നേരിട്ടാണ്‌ രാജിക്കത്ത് നല്‍കിയത്‌.
മോഡിയെ അവരോധിച്ചതിന് പിന്നാലെ എല്‍കെ അദ്വാനിയെ അദ്ദേഹത്തിന്റെ വീട്ടില്‍ ചെന്ന് കണ്ട് രാജ്‌നാഥ് സിങ്ങ് ചര്‍ച്ചനടത്തിയിരുന്നു. മോഡിയെ അംഗീകരിക്കില്ലെന്ന ഉറച്ചനിലപാട് കൂടിക്കാഴ്ചയിലും വ്യക്തമാക്കിയതായാണ് റിപ്പോര്‍ട്ട്. അതിനു ശേഷമാണ്‌ രാജിക്കത്ത് നല്‍കിയത്‌.
ജനസംഘത്തില്‍ നിന്നും ജനതാ പാര്‍ട്ടിയിലേക്കും അവിടെ നിന്നും ഭാരതീയ ജനതാ പാര്‍ട്ടിയിലേക്കും എത്തിയ ആളാണ്‌ അദ്വാനി. 1986ല്‍ ബിജെപി പ്രസിഡന്റായി. പാര്‍ട്ടിയെ ശക്തിപ്പെടുത്താനായി ഹിന്ദുത്വ അജണ്ട കൊണ്ടു വന്നു. പിന്നീട്‌ കണ്ടത്‌ ബിജെപിയുടെ സമൂല വികാസമായിരുന്നു. രാമജന്മഭൂമി പ്രശ്‌നം സജീവമായി. അതോടൊപ്പമുണ്ടായ രഥയാത്ര ഒരു വന്‍ വിജയമായി മാറി. തുടര്‍ന്ന്‌ ബിജെപി അധികാരത്തിലുമായി.
1998ലെ ബാജ്‌പേയി മന്ത്രിസഭയിലെ ഉപപ്രധാനമന്ത്രിയും ആഭ്യന്തര മന്ത്രിയമായിരുന്നു അദ്വാനി.
.jpg)
മികച്ച പ്രതിപക്ഷനേതാവു കൂടിയായിരുന്നു അദ്വാനി. ഇതൊക്കെയാണെങ്കിലും പ്രധാനമന്ത്രിയാകാന്‍ കഴിയാത്തത്തിന്റെ വിഷമം അദ്വാനിക്കുണ്ടായിരുന്നു. അന്നതിനെ എതിര്‍ത്തിരുന്നവര്‍ ഇപ്പോള്‍ മോഡിക്കു മുമ്പില്‍ അണിനിരന്നതാണ്‌ അദ്വാനിയെ ഏറെ വിഷമിപ്പിക്കുന്നതും.
https://www.facebook.com/Malayalivartha
