കല്‍ക്കരിപ്പാടം അഴിമതിയില്‍ കോണ്‍ഗ്രസ്‌ എം.പി ജിന്‍ഡാലിനെതിരെ എഫ്.ഐ.ആര്‍
കല്‍ക്കരിപ്പാടം അഴിമതിക്കേസില്‍ മുന്‍ കല്‍ക്കരി വകുപ്പ് സഹമന്ത്രി ദാസരി നാരായണ റാവു കോണ്‍ഗ്രസ്‌ എം.പി നവീന്‍ ജിന്‍ഡാല്‍ എന്നിവരെ പ്രതിചേര്‍ത്ത്‌ സി.ബി.ഐ എഫ്.ഐ.ആര്‍ രജിസ്റ്റര്‍ ചെയ്‌തു. ഇതിനു പിന്നാലെ നവീന്‍ ജിന്‍ഡാലിന്റെ വസതിയിലും ഓഫീസുകളിലും സി.ബി.ഐ റെയ്‌ഡ്‌ നടത്തി.
ജിന്‍ഡാലിന്റെ ഉടമസ്ഥതയിലുള്ള സ്ഥാപനത്തിന്‌ 11 കല്‍ക്കരിപ്പാടങ്ങള്‍ അനുവദിച്ചത്‌ ചട്ടവിരുദ്ധമാണെന്ന ആരോപണം ഉയര്‍ന്നിരുന്നു. ഇതിന്‌ കൂട്ടുനിന്ന ദാസരി നാരായണ റാവുവിന്‌ ജിന്‍ഡാല്‍ ഗ്രൂപ്പ്‌ പ്രത്യുപകാരം ചെയ്‌തെന്നും സി.ബി.ഐ ആരോപിക്കുന്നുണ്ട്‌. വ്യാജരേഖ ചമക്കല്‍,വഞ്ചന എന്നീ കുറ്റങ്ങളാണ്‌ ഇവര്‍ക്കെതിരെ സി.ബി.ഐ ചുമത്തിയിരിക്കുന്നത്‌.
2004 മുതല്‍ 2009 വരെ കല്‍ക്കരിപ്പാടം അനുവദിച്ചതില്‍ വന്‍ അഴിമതി നടന്നതായാണ്‌ സി.ബി.ഐ കണ്ടെത്തിയിരിക്കുന്നത്‌. സി.ബി.ഐയുടെ അന്വേഷണ റിപ്പോര്‍ട്ട്‌ തിരുത്തിയതിന്റെ പേരില്‍ നിയമമന്ത്രിയായിരുന്ന അശ്വിനി കുമാറിന്‌ രാജിവെക്കേണ്ടിയും വന്നിരുന്നു. റിപ്പോര്‍ട്ട്‌ തിരുത്തിയ നടപടിയില്‍ സുപ്രീം കോടതിയില്‍ നിന്ന് കേന്ദ്ര സര്‍ക്കാരിന്‌ രൂക്ഷമായ വിമര്‍ശനമാണ്‌ ഏറ്റുവാങ്ങേണ്ടി വന്നത്‌. പുതിയ സംഭവവികാസങ്ങള്‍ സര്‍ക്കാരിനെ കൂടുതല്‍ പ്രതിരോധത്തിലാക്കും.
https://www.facebook.com/Malayalivartha
