അന്തര്‍ സംസ്ഥാന തൊഴിലാളികള്‍ കാല്‍നടയായി യാത്ര ചെയ്ത് അപകടങ്ങള്‍ ഉണ്ടാകുന്ന കാര്യത്തില്‍ ഇടപെടാനാകില്ലെന്ന് സുപ്രീംകോടതി...
അന്തര്‍ സംസ്ഥാന തൊഴിലാളികള്‍ കാല്‍നടയായി യാത്ര ചെയ്ത് അപകടങ്ങള്‍ ഉണ്ടാകുന്ന കാര്യത്തില്‍ ഇടപെടാനാകില്ലെന്ന് സുപ്രീംകോടതി. ഇക്കാര്യത്തില്‍ അതത് സംസ്ഥാന സര്‍ക്കാറുകള്‍ ഉചിതമായ തീരുമാനമെടുക്കട്ടെ. ആരാണ് റോഡിലൂടെ നടക്കുന്നതെന്നും നടക്കാതിരിക്കുന്നതെന്നും പരിശോധിക്കാന്‍ കോടതിക്ക് കഴിയില്ല. വിഷയത്തില്‍ സുപ്രീംകോടതി ഇടപെടണമെന്ന പൊതുതാല്‍പര്യ ഹരജി തള്ളിക്കൊണ്ടായിരുന്നു കോടതിയുടെ അഭിപ്രായപ്രകടനം. 'അവര്‍ നടക്കണോ വേണ്ടയോ എന്നെല്ലാം സംസ്ഥാനങ്ങള്‍ തീരുമാനിക്കട്ടെ. കോടതികള്‍ എന്തിനാണ് ഇക്കാര്യം ചര്‍ച്ച ചെയ്യുന്നത്' കോടതി ചോദിച്ചു.
കാല്‍നടയായി യാത്ര ചെയ്യുന്ന അന്തര്‍ സംസ്ഥാന തൊഴിലാളികളെ കണ്ടെത്തി അവര്‍ക്ക് ഭക്ഷണവും പാര്‍പ്പിടവും കേന്ദ്രം ഒരുക്കണമെന്നായിരുന്നു അഭിഭാഷകനായ അലോക് ശ്രീവാസ്തവ ഹരജിയില്‍ ആവശ്യപ്പെട്ടിരുന്നത്. 'അവരെ തടയാന്‍ നമുക്കെങ്ങനെയാണ് കഴിയുക' എന്നും കോടതി ചോദിച്ചു.
മഹാരാഷ്ട്രയില്‍ പാളത്തിലുറങ്ങിക്കിടന്ന 16 തൊഴിലാളികള്‍ ട്രെയിന്‍ കയറി മരണമടഞ്ഞതും ഹരജിയില്‍ സൂചിപ്പിച്ചിരുന്നു. 'റെയില്‍വെ ട്രാക്കില്‍ അവര്‍ ഉറങ്ങാന്‍ തീരുമാനിച്ചാല്‍ ആര്‍ക്കാണ് തടയാന്‍ കഴിയുക 'എന്നും കോടതി ചോദിച്ചു. പത്രവാര്‍ത്തകളുടെ മാത്രം അടിസ്ഥാനത്തില്‍ ഇത്തരം ഹരജികള്‍ ഫയല്‍ ചെയ്ത അഭിഭാഷകനെ കോടതി ശകാരിച്ചു. അന്തര്‍ സംസ്ഥാന തൊഴിലാളികളെ നാട്ടിലെത്തിക്കാനായി കേന്ദ്രം ട്രെയിന്‍ സര്‍വീസുകള്‍ ഏര്‍പ്പാടാക്കിയിട്ടുണ്ട്.
https://www.facebook.com/Malayalivartha
