രാജ്യം ലോക്ക്ഡൗൺ 4.0-ലേക്ക് കടക്കുമ്പോൾ രോഗബാധിതരുടെ എണ്ണം നാൾക്ക് നാൾ ഏറിവരുന്നു. ഇപ്പോൾ രോഗ ബാധിതർ 90,000 കടന്നു. കേന്ദ്ര ആരോഗ്യമന്ത്രാലയം പുറത്തുവിട്ട ഏറ്റവും പുതിയ കണക്ക് പ്രകാരം 90,927 പേർക്കാണ് രാജ്യത്ത് ഇതുവരെ കൊവിഡ് ബാധ സ്ഥിരീകരിച്ചത്.

നിലവിൽ രാജ്യത്ത് ചികിത്സയിലുള്ളവരുടെ എണ്ണവും അരലക്ഷം പിന്നിട്ടു. കഴിഞ്ഞ 24 മണിക്കൂറിൽ 4,987 പേർക്ക് രോഗം പുതുതായി സ്ഥിരീകരിച്ചു . രാജ്യത്തെ ആകെ മരണസംഖ്യ 2872 ആയി ഉയർന്നു. രോഗബാധിതരുടെ എണ്ണത്തിൽ രാജ്യത്ത് ഏറ്റവും കൂടുതൽ സംഖ്യ റിപ്പോർട്ട് ചെയ്യപ്പെട്ടത് കഴിഞ്ഞ ഇരുപത്തിനാല് മണിക്കൂറിലാണ്.

ഓരോ ദിവസവും ഏതാണ്ട് അയ്യായിരത്തോളം കേസുകൾ രാജ്യത്ത് പുതിയതായി ഉണ്ടാകുന്നു.. ഈ സാഹചര്യത്തിൽ രണ്ട് ദിവസത്തിനകം തന്നെ രാജ്യത്ത് കൊവിഡ് രോഗബാധിതരുടെ എണ്ണം ഒരു ലക്ഷം കവിഞ്ഞേക്കുമെന്നാണ് സൂചന.

നാലാംഘട്ട ലോക്ക്ഡൗൺ മാർഗനിർദേശങ്ങൾ ഇന്ന് പുറത്തിറക്കാനിരിക്കെ, സർക്കാരിനെ അലട്ടുന്നത് ഈ പ്രശ്നമാണ് . ഇനിയും ലോക് ഡൌൺ അനിശ്ചിതമായി നീട്ടാൻ കഴിയില്ല. എന്നാൽ ഇളവുകൾ നൽകുമ്പോൾ രോഗ വ്യാപനം ഏറുമോ എന്ന ആശങ്കയും ഉണ്ട്

ഇതുവരെ 34,108പേർക്ക് രോഗം ഭേദമായി എന്നത് മാത്രമാണ് ഏക ആശ്വാസം. ഇതോടെ, രാജ്യത്ത് രോഗമുക്തി നേടിയവരുടെ ശതമാനം 37.51 ആയി ഉയർന്നു.

മഹാരാഷ്ട്ര, ദില്ലി, തമിഴ്നാട്, ഗുജറാത്ത് എന്നീ സംസ്ഥാനങ്ങളിൽ ആണ് ഏറ്റവും കൂടുതൽ രോഗികളുള്ളത് . രാജ്യത്തെ ആകെ കേസുകളിൽ മൂന്നിലൊന്നും മഹാരാഷ്ട്രയിലാണ്. ഇതിൽ തന്നെ ആകെയുള്ള 30,706 രോഗികളിൽ 18,500 രോഗികളും മുംബൈയിലാണ്.

തമിഴ്നാട്ടിലും, ഗുജറാത്തിലും രോഗബാധിതരുടെ എണ്ണം പതിനായിരം കടന്നു. മഹാനഗരങ്ങളിൽ വൻരീതിയിൽ രോഗം പടരുന്നുവെന്നതാണ് ഇതിൽ വ്യക്തമാകുന്നത്. കുടിയേറ്റത്തൊഴിലാളികൾ തിങ്ങിപ്പാർക്കുന്ന ദില്ലി, മുംബൈ, ചെന്നൈ എന്നീ മഹാനഗരങ്ങളിലാണ് രോഗം വലിയ രീതിയിൽ പടരുന്നത്.

ഈ സാഹചര്യത്തിൽ നഗരഭരണസംവിധാനങ്ങളോട് വലിയ ജാഗ്രത പാലിക്കാനാണ് ആരോഗ്യമന്ത്രാലയം നി‍ർദേശം നൽകുന്നത്. ചെറിയ ഇടത്ത് കൂടുതൽ പേർ തിങ്ങിപ്പാർക്കുന്ന ധാരാവിയെപ്പോലെയുള്ള ചേരിപ്രദേശങ്ങൾ എങ്ങനെ അണുവിമുക്തമാക്കാം എന്നതും സർക്കാർ പരിഗണനയിലാണ്

ആകെ കൊവിഡ് കേസുകളുടെ എണ്ണത്തിൽ ചൈനയിലെ രോഗബാധിതരുടെ എണ്ണത്തെ ഇന്ത്യ മറികടന്നിരിക്കുന്നു. 85,000 കൊവിഡ് കേസുകളാണ് ചൈനയിൽ ഔദ്യോഗികമായി സ്ഥിരീകരിച്ചത്. ഇതിന്‍റെ പശ്ചാത്തലത്തിൽ മഹാരാഷ്ട്ര, തമിഴ്നാട്, ഗുജറാത്ത്, ദില്ലി, മധ്യപ്രദേശ്, പശ്ചിമബംഗാൾ, രാജസ്ഥാൻ, ഉത്തർപ്രദേശ്, തെലങ്കാന, ആന്ധ്രാപ്രദേശ്, പഞ്ചാബ്, ഒഡിഷ എന്നീ സംസ്ഥാനങ്ങളിലെ മുപ്പത് മേഖലകളെ പ്രത്യേക റെഡ് സോണുകളായി തിരിച്ച് ഇവ സമ്പൂർണ്ണമായി അടച്ചിടുന്ന നടപടിക്കാന് സാധ്യത