ലോകത്തെ ഏറ്റവും വലിയ രാഷ്ട്രീയ കക്ഷിയായി ബിജെപി വളര്‍ന്നിരിക്കുന്നു എന്നാണ് ബിജെപി സ്വന്തമായി അവകാശപ്പെടുന്നത്. കാരണം, ബിജെപിയില്‍ ഇപ്പോള്‍ അംഗത്വം നേടിയിരിക്കുന്നത് 9 കോടി ജനങ്ങളാണ്. അംഗത്വ സംഖ്യയില്‍ ചൈനീസ് കമ്യൂണിസ്റ്റ് പാര്‍ട്ടിയെ പിന്നിലാക്കിയാണ് ബിജെപി മുന്നില്‍ എത്തി നില്‍ക്കുന്നത്.

ചൈനീസ് കമ്യൂണിസ്റ്റ് പാര്‍ട്ടിയില്‍ 8.7 കോടി അംഗങ്ങളാണുള്ളത്. ബിജെപിയുടെ പ്രഥമ പ്രസിഡന്റും പാര്‍ട്ടിയുടെ ആദ്യ പ്രധാനമന്ത്രിയുമായ അടല്‍ ബിഹാരി വാജ്‌പേയി ഭാരതരത്‌ന ഏറ്റുവാങ്ങുമ്പോള്‍ ബിജെപി വലിയ വിജയതിളക്കത്തിന്റെ സന്തോഷത്തിലും കൂടിയാണ്. ലോകത്തിലെ ഏറ്റവും വലിയ പാര്‍ട്ടിയായി ബിജെപി മാറിയതിന്റെ ഔദ്യോഗിക പ്രഖ്യാപനം ദേശീയ അധ്യക്ഷന്‍ അമിത് ഷാ ഉടന്‍ നടത്തുമെന്നാണ് അറിയുന്നത്.
ഏറ്റവും അംഗങ്ങളുള്ള രാഷ്ട്രീയ പാര്‍ട്ടിയായി ബിജെപി ഉയരുമ്പോള്‍ വളര്‍ച്ചാവഴികളില്‍ വെളിച്ചം വീശിയവര്‍ക്കും കൂടെ നടന്നവര്‍ക്കും അഭിമാനമേറുകയാണ്. രാജ്യത്തിന്റെ സമസ്തമേഖലകളിലെ ജനങ്ങളെയും പ്രതിനിധീകരിക്കുന്ന കക്ഷിയായി ബിജെപി മാറിയെന്നു വ്യക്തമാക്കുന്ന കണക്കുകളാണ് അംഗത്വവുമായി ബന്ധപ്പെട്ട് ലഭ്യമാകുന്നത്. മൊബൈല്‍ ഫോണ്‍ വഴി ഒരു മിസ്ഡ്  കോള്‍ മാത്രം മതി ബിജെപിയില്‍ അംഗത്വം എടുക്കാന്‍.

ഈയൊരു സംവിധാനം തന്നെയാണ് ഇത്രയും ജനങ്ങള്‍ ബിജെപിയില്‍ അംഗത്വം എടുക്കാന്‍ കാരണമായതും. വീടുവീടാന്തരം കയറിയിറങ്ങി 100 പേരെ ചേര്‍ക്കുന്നവര്‍ക്കാകും സജീവാംഗത്വം. മണ്ഡലം തലം മുതലുള്ള ഭാരവാഹിത്വത്തിനു സജീവാംഗത്വം ആവശ്യമാണ്. അംഗത്വ വിതരണം പൂര്‍ത്തിയാകുന്ന സാഹചര്യത്തില്‍ സംഘടനാ തിരഞ്ഞെടുപ്പു പ്രക്രിയയ്ക്കു തുടക്കമിടാനായി വൈകാതെ ദേശീയ വരണാധികാരിയെ നിശ്ചയിക്കുമെന്നാണ് റിപ്പോര്‍ട്ടുകള്‍.

സംസ്ഥാന ഘടകം ശുപാര്‍ശ ചെയ്യുന്ന പാനലില്‍ നിന്നു സംസ്ഥാന വരണാധികാരികളെയും ദേശീയ വരണാധികാരി നിയോഗിക്കും. ജില്ലാ, മണ്ഡലം സമിതികള്‍ ശുപാര്‍ശ ചെയ്യുന്ന പാനലുകളില്‍ നിന്നു ജില്ലാ, മണ്ഡലം വരണാധികാരികളെ തീരുമാനിക്കുന്നതു സംസ്ഥാന വരണാധികാരിയാണ്. 2014 നവംബര്‍ 1ന് പ്രധാനമന്ത്രി നരേന്ദ്ര മോഡിയാണ് ബിജെപിയുടെ ആദ്യഅംഗമായി ചേര്‍ന്നത്. തുടര്‍ന്ന് ദേശീയ അധ്യക്ഷനും അംഗത്വം എടുത്തു. ഓണ്‍ ലൈനിലൂടെയും 18002662020 എന്ന ടോള്‍ഫ്രീ നമ്പറില്‍ മിസ്ഡ് കോള്‍ ചെയ്തും അംഗത്വം രജിസ്റ്റര്‍ ചെയ്യുന്ന നവീന രീതിയാണ് ബിജെപി അവലംബിച്ചത്.

വിളിച്ചയാളുടെ ഫോണില്‍ അംഗത്വ നമ്പറും മറ്റു വിവരങ്ങളും എസ്എംഎസ് ആയി ലഭിക്കുന്ന ബിജെപിയുടെ കാമ്പയിന് ദേശവ്യാപകമായി വലിയ സ്വീകാര്യത ലഭിച്ചു. വിവിധ രംഗങ്ങളിലെ പ്രമുഖര്‍ പാര്‍ട്ടിയില്‍ അംഗങ്ങളായി. മാര്‍ച്ച് 15 മുതലുള്ള 8 ദിവസങ്ങളിലായി ഒരുകോടി പുതിയ അംഗങ്ങള്‍ പാര്‍ട്ടിയിലെത്തി. ആദ്യത്തെ ഒരുകോടി അംഗങ്ങള്‍ ചേര്‍ന്നത് 30ദിവസങ്ങള്‍ കൊണ്ടായിരുന്നു.

രണ്ടുകോടിയിലേക്ക് 22 ദിവസങ്ങള്‍ക്ക് ശേഷവും 3 കോടിയിലേക്ക് 13 ദിവസങ്ങള്‍ പിന്നിട്ടപ്പോഴും പാര്‍ട്ടിയെത്തി. നാലുകോടി (16 ദിവസം), അഞ്ചുകോടി (18 ദിവസം), ആറുകോടി (21 ദിവസം), ഏഴുകോടി (15 ദിവസം) എട്ടുകോടി (8 ദിവസം) എന്നിങ്ങനെ ക്രമാനുഗതമായി അംഗത്വം ഉയര്‍ന്നു. മുന്‍വര്‍ഷം 3.25 കോടിയായിരുന്നു ബിജെപിയിലെ അംഗങ്ങളുടെ എണ്ണം.
സമഗ്ര അംഗത്വ വിതരണ കാമ്പയിന്‍ എല്ലാ സംസ്ഥാനങ്ങളിലെയും പാര്‍ട്ടി അംഗങ്ങളുടെ എണ്ണത്തില്‍ പതിന്മടങ്ങ് വര്‍ധനവ് ഉണ്ടാക്കിയിട്ടുണ്ട്. കേരളത്തില്‍ 5.5 ലക്ഷമായിരുന്ന അംഗങ്ങളുടെ എണ്ണം ഇതുവരെ 21 ലക്ഷത്തിലെത്തി. ബിജെപിയുടെ അംഗസംഖ്യ 9 കോടിയിലേക്ക് അടുത്തുകൊണ്ടിരിക്കുകയാണെന്ന് ദേശീയ നേതൃത്വം വ്യക്തമാക്കുന്നത് .മാര്‍ച്ച് 31വരെയാണ് അംഗത്വവിതരണ കാമ്പയിനെങ്കിലും തീയതി കുറച്ചുകൂടി നീട്ടിയേക്കുമെന്നും സൂചനയുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha