ഏറ്റുമുട്ടല്‍ തുടരുന്ന യെമനില്‍ നിന്ന് 350 ഇന്ത്യക്കാരെ സുരക്ഷിതരായി ഒഴിപ്പിച്ചെന്ന് അധികൃതര്‍ വ്യക്തമാക്കി. നിരവധി ഇന്ത്യക്കാരാണ് യമനില്‍ അഞ്ച് ദിവസമായി കുടുങ്ങി കിടക്കുന്നത്. 220 പുരുഷന്‍മാരും 101 വനിതകളും 28 കുട്ടികളെയുമാണ് സുരക്ഷിതമായി ഒഴിപ്പിച്ചത്. ഇന്ത്യന്‍ നാവിക സേനയുടെ കപ്പലായ ഐഎന്‍എസ് സുമിത്രയില്‍ ആഫ്രിക്കന്‍ രാജ്യമായ ജിബൂട്ടിയിലാണ് ഇവരെ എത്തിച്ചിരിക്കുന്നത്. വിമാനമാര്‍ഗം ഇവരെ ഇന്ത്യയിലെത്തിക്കും.
ഇന്നലെ രാത്രി തന്നെ കപ്പല്‍ യെമന്‍ തുറമുഖം വിട്ടെന്ന് പ്രതിരോധ മന്ത്രാലയ വൃത്തങ്ങള്‍ അറിയിച്ചു. കുടങ്ങിപ്പോയ ഇന്ത്യക്കാരെ സുരക്ഷിതരായി മാറ്റാന്‍ നാവിക സേനയുടെ രണ്ട് കപ്പലുകളും രണ്ട് യാത്രാക്കപ്പലുകളും യെമനിലേയക്ക് തിങ്കളാഴ്ച യാത്ര തിരിച്ചിട്ടുണ്ടായിരുന്നു. നിരവധി സൗകര്യങ്ങളുള്ള യാത്രകപ്പലുകളാണ് ഇന്ത്യക്കാരെ സുരക്ഷിതരായി മാറ്റാനായി അയച്ചിരുന്നത്.
രക്ഷാപ്രവര്‍ത്തനം ഏകോപിപ്പിക്കുന്നതിനു കേന്ദ്ര വിദേശകാര്യ സഹമന്ത്രി വി.കെ. സിങ് യെമനിലെ ജിബൂട്ടിയില്‍ എത്തിയിട്ടുണ്ട്. 4,000 ഇന്ത്യക്കാരാണ് നിലവില്‍ യെമനില്‍ കുടങ്ങിക്കിടക്കുന്നത്. അഞ്ചു ദിവസങ്ങളായി യെമനില്‍ സൗദി വ്യോമാക്രമണം തുടരുകയാണ്.
യെമനുമായി അതിര്‍ത്തി പങ്കിടുന്ന സൗദി അറേബ്യയുടെ അസിര്‍, ജിസാന്‍ എന്നീ തെക്കന്‍ പ്രവിശ്യകള്‍ പൂര്‍ണമായും സുരക്ഷിതമാണെന്നു ഗവര്‍ണര്‍മാരായ ഫൈസല്‍ ബിന്‍ ഖാലിദ് രാജകുമാരനും മുഹമ്മദ് ബിന്‍ നാസര്‍ രാജകുമാരനും അറിയിച്ചിരുന്നു. ഹൂതി വിമതര്‍ ഈ പ്രദേശങ്ങളില്‍ ഇപ്പോള്‍ ക്രമസമാധാനപ്രശ്‌നങ്ങളുണ്ടാക്കുന്നില്ലെന്ന് ഇരുവരും വ്യക്തമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha