സ്പൈസ്ജെറ്റ് പൈലറ്റിനെ തോക്കിന് മുനയില് നിര്ത്തി മോഷ്ടിച്ചതിനു ശേഷം മര്ദ്ദിച്ച് അവശനാക്കി മോഷണ സംഘം കടന്നു കളഞ്ഞു... അവശനിലയില് ചോരയൊലിപ്പിച്ചു കിടന്ന യുവരാജിനെ പോലീസ് എത്തിയാണ് ആശുപത്രിയിലേക്കു മാറ്റിയത്
സ്പൈസ്ജെറ്റ് പൈലറ്റിനെ തോക്കിന് മുനയില് നിര്ത്തി മോഷ്ടിച്ചതിനു ശേഷം മര്ദ്ദിച്ച് അവശനാക്കി മോഷണ സംഘം കടന്നു കളഞ്ഞു. ഡല്ഹിയില് ഐഐടിക്കു സമീപമുള്ള ഫ്ളൈഓവറില് പുലര്ച്ചെ ഒന്നോടെയാണ് സംഭവം. ഫരീദാബാദിലെ വീട്ടില് നിന്നും എയര്പോര്ട്ടിലേക്ക് ഓഫീസ് വാഹനത്തില് പോകുകയായിരുന്ന സ്പൈസ്ജെറ്റ് വിമാനത്തിലെ ക്യാപ്റ്റന് യുവരാജ് തെവാതിയക്ക് നേരെയാണ് ആക്രമണമുണ്ടായത്.
അഞ്ചു ബൈക്കുകളിലായി പത്തു പേരടങ്ങുന്ന സംഘമാണ് തന്നെ ആക്രമിച്ചതെന്ന് യുവരാജ് പോലീസിനോടു പറഞ്ഞു. കാറ് തടഞ്ഞു നിര്ത്തിയ മോഷ്ടാക്കള് കാറിന്റെ ഗ്ലാസ് ഇടിച്ചു തകര്ക്കുകയും യുവരാജിന്റെ തലയില് പിസ്റ്റള് ഉപയോഗിച്ച് ഇടിക്കുകയും ചെയ്തു. അദ്ദേഹത്തിന്റെ കൈവശമുണ്ടായിരുന്ന 34,000 രൂപയും സംഘം കവര്ന്നു. കത്തി ഉപയോഗിച്ചും സംഘം യുവരാജിനെ മുറിവേല്പ്പിച്ചു. സംഭവത്തിനു ശേഷം അദ്ദേഹം പോലീസിന്റെ സഹായം തേടി. അവശനിലയില് ചോരയൊലിപ്പിച്ചു കിടന്ന യുവരാജിനെ പോലീസ് എത്തിയാണ് ആശുപത്രിയിലേക്കു മാറ്റിയത്. സംഭവത്തില് കേസ് രജിസ്റ്റര് ചെയ്ത് അന്വേഷണം ആരംഭിച്ചുവെന്ന് പോലീസ് വൃത്തങ്ങള് അറിയിച്ചു.
" f
https://www.facebook.com/Malayalivartha