പ്രധാനമന്ത്രിയുടെ യാത്രയ്ക്കായി വാങ്ങുന്ന അത്യാധുനിക സുരക്ഷാ സംവിധാനങ്ങളോടുകൂടിയ വിമാനങ്ങള് ഇന്ത്യയിലേക്ക്... പ്രധാനമന്ത്രിക്കായി 'എയര് ഇന്ത്യ വണ്' അതും എയര്ഫോഴ്സ് വണ് മാതൃകയില്...
പ്രധാനമന്ത്രിയുടെ യാത്രയ്ക്കായി വാങ്ങുന്ന അത്യാധുനിക സുരക്ഷാ സംവിധാനങ്ങളോടുകൂടിയ വിമാനങ്ങള് ഓഗസ്റ്റ്, സെപ്റ്റംബര് മാസങ്ങളില് ഇന്ത്യയിലെത്തും. അമേരിക്കയില് നിന്നാണ് പ്രത്യേകം രൂപകല്പന ചെയ്ത ബോയിങ് 777 വിമാനങ്ങള് ഇറക്കുമതി ചെയ്യുന്നത്. യു.എസ്. പ്രസിഡന്റിന്റെ എയര്ഫോഴ്സ് വണ് വിമാനത്തിന് തുല്യമായ സൗകര്യങ്ങള് ഇവയിലുണ്ടാകുമെന്നാണ് അറിയുന്നത്.
എയര് ഇന്ത്യയുടെ രണ്ട് ദീര്ഘദൂര ബോയിങ് 777 വിമാനങ്ങളിലാണ് പ്രതിരോധ സംവിധാനം ഘടിപ്പിക്കുന്നത്. മിസൈല് പ്രതിരോധ സംവിധാനം ഘടിപ്പിക്കുന്നതോടെ സഞ്ചരിക്കുന്ന വൈറ്റ് ഹൗസ് എന്നറിയപ്പെടുന്ന 'എയര്ഫോഴ്സ് വണ്ണിനു' തുല്യമാകും എയര് ഇന്ത്യ വണ്ണും.
1350 കോടി രൂപയ്ക്കാണ് പ്രതിരോധ സംവിധാനങ്ങളാണ് ഇന്ത്യ യുഎസിനോടു വാങ്ങുന്നത്.വില്പനയ്ക്ക് യുഎസ് കോണ്ഗ്രസ് കഴിഞ്ഞ ഫെബ്രുവരിയില് അംഗീകാരം നല്കിയിരുന്നു. സുരക്ഷ ഭീഷണിയുടെ പശ്ചാത്തലത്തില് ഇന്ത്യയുടെ അഭ്യര്ഥന മാനിച്ചാണ് യു.എസ് തീരുമാനം. ഇന്ത്യ-യു.എസ് നയതന്ത്ര ബന്ധം ശക്തിപ്പെടുത്തുന്നതിന്റെ ഭാഗമായാണ് നടപടി.
'എയര് ഇന്ത്യ വണ്' എന്ന പേരിട്ടിട്ടുള്ള വിമാനങ്ങള് പ്രധാനമന്ത്രിയെക്കൂടാതെ രാഷ്ട്രപതി, ഉപരാഷ്ട്രപതി എന്നിവരുടെ ഔദ്യോഗിക യാത്രകള്ക്കും ഉപയോഗിക്കും. നിലവില് 25 വര്ഷത്തോളം പഴക്കമുള്ള ബോയിങ് 747 വിമാനങ്ങളാണ് പ്രധാനമന്ത്രി ഉപയോഗിക്കുന്നത്. ഏതാണ്ട് 8,458 കോടി രൂപയാണ് രണ്ട് ബോയിങ് 777-300 ഇ.ആര്. വിമാനങ്ങള്ക്കായി ഇന്ത്യ ചെലവിടുന്നത്. ബോയിങ്ങിന്റെ ഡാലസിലുള്ള കേന്ദ്രത്തിലാണ് എയര് ഇന്ത്യ വണ് വിമാനങ്ങള് തയ്യാറാക്കുന്നത്. ബോയിങ് വിമാനങ്ങളുടെ നവീകരണത്തിനുമാത്രം ഏതാണ്ട് 1500 കോടിയോളം രൂപ ചെലവിടുന്നുണ്ട്.
ബോയിങ് 747-200-ബി ശ്രേണിയിലുള്ള രണ്ടു വിമാനങ്ങളാണ് അമേരിക്കന് പ്രസിഡന്റിനായുള്ള എയര് ഫോഴ്സ് വണ്ണിന് ഉപയോഗിക്കുന്നത്. ആകാശത്തുവെച്ചുതന്നെ ഇന്ധനം നിറയ്ക്കല്, സുരക്ഷിതമായ ആശയവിനിമയ ഉപകരണങ്ങള് എന്നിവ ഇതിന്റെ പ്രത്യേകതകളാണ്. യു.എസ്സിനെതിരേ ആക്രമണമുണ്ടായാല് മൊബൈല് കമാന്ഡ് സെന്ററായി ഈ വിമാനം പ്രവര്ത്തിക്കും.
പ്രത്യേകതകള്
* മിസൈല് പ്രതിരോധശേഷി. വിമാനത്തിനുനേരെ വരുന്ന മിസൈലുകള് കണ്ടെത്താനുള്ള സംവിധാനവും അവയുടെ നിയന്ത്രണസംവിധാനം തകര്ത്ത് വഴിതിരിച്ചുവിടാനുള്ള ശേഷിയും
* ശത്രുവിന്റെ റഡാറുകളുടെ കണ്ണുവെട്ടിക്കാനുള്ള ശേഷി
* കൂടുതല് വലിയ ഓഫീസ് സൗകര്യം, മീറ്റിങ് മുറികള്, ആധുനിക ആശയവിനിമയ സംവിധാനങ്ങള്, മെഡിക്കല് സംവിധാനങ്ങള്
* ഇന്ത്യയില്നിന്ന് യു.എസ്. വരെ നേരിട്ട് പറക്കാം. ഇടയ്ക്ക് ഇന്ധനം നിറയ്ക്കേണ്ടിവരില്ല.
* മണിക്കൂറില് 900 കിലോമീറ്റര് വേഗം
* ലാര്ജ് എയര്ക്രാഫ്റ്റ് ഇന്ഫ്രാറെഡ് കൗണ്ടര്മെഷേര്സ്, സെല്ഫ് പ്രൊട്ടക്ഷന് സ്യൂട്ട്സ് തുടങ്ങിയ സുരക്ഷാ സംവിധാനങ്ങള്.
വിമാനങ്ങള്ക്ക് നേരെ മിസൈല് ഭീഷണിയുണ്ടാവുന്നപക്ഷം നേരത്തെ അപകടമുന്നറിയിപ്പ് ലഭ്യമാക്കുകയും ശത്രുമിസൈലുകളെ തകര്ക്കാനുള്ള പ്രതിരോധ സംവിധാനങ്ങള് പ്രവര്ത്തനക്ഷമമാകുകയും ചെയ്യാന് ഈ സംവിധാനത്തിന് സാധിക്കും.
യുഎസ് പ്രസിഡന്റിന്റെ ഔദ്യോഗിക വിമാനമായ എയര്ഫോഴ്സ് വണ്ണില് അമ്പരപ്പിക്കുന്ന സൗകര്യങ്ങളും സുരക്ഷാ സംവിധാനങ്ങളുമാണ് ഉള്ളത്. രണ്ടു നിലയുള്ള വിമാനത്തിന്റെ മുകളിലത്തെ നിലയിലാണു പ്രസിഡന്റ് യാത്ര ചെയ്യുക. വിമാനത്തിനുള്ളില്നിന്നു തന്നെ രാജ്യത്തെ അഭിസംബോധന ചെയ്യാം. വിപുലമായ വാര്ത്താവിനിമയ സംവിധാനം. ശസ്ത്രക്രിയ ഉള്പ്പെടെയുള്ള ചികില്സാ സൗകര്യങ്ങള്. ആകാശത്തു വച്ചുതന്നെ ഇന്ധനം നിറയ്ക്കാം. എത്രനേരവും ആകാശത്തു തുടരാം. ആണവ സ്ഫോടനത്തിന്റെ ആഘാതത്തില്പ്പോലും ക്ഷതമേല്ക്കില്ല.
നിലവില് രാഷ്ട്രപതിയും ഉപരാഷ്ട്രപതിയും പ്രധാനമന്ത്രിയും എയര് ഇന്ത്യയുടെ ബി747 വിമാനങ്ങളിലാണ് സഞ്ചരിക്കുന്നത്. എയര് ഇന്ത്യ പൈലറ്റുമാര് തന്നെയാണ് ഈ വിമാനങ്ങള് പറത്തുന്നത്. പ്രധാനമന്ത്രി ഉള്പ്പെടെയുള്ള ഉന്നത നേതാക്കള് സഞ്ചരിക്കുമ്പോള് വിമാനം എയര് ഇന്ത്യ വണ് എന്ന കോഡ് നാമത്തില് അറിയപ്പെടും. എന്നാല് നേതാക്കള് ഉപയോഗിക്കാത്ത സമയത്ത് ഈ വിമാനങ്ങള് നിലവില് എയര് ഇന്ത്യയുടെ വാണിജ്യ സര്വ്വീസുകള്ക്കാണ് ഉപയോഗിക്കുന്നത്. പുതിയ വിമാനങ്ങള് വാങ്ങുന്നതിനു കഴിഞ്ഞ വര്ഷത്തെ ബജറ്റില് 4469 കോടി രൂപ കേന്ദ്രസര്ക്കാര് വകയിരുത്തിയിരുന്നു.
"
https://www.facebook.com/Malayalivartha
