ബീഹാറില് ട്രെയിനിനു നേരെയുണ്ടായ മാവോവാദി ആക്രമണത്തില് 3 മരണം; ലക്ഷ്യം ആയുധങ്ങള്
ബീഹാറില് തീവണ്ടിക്കുനേരെയുണ്ടായ മാവോവാദി ആക്രമണത്തില് 3 പേര് മരിച്ചു. മരിച്ചവരില് ബീഹാര് പോലീസിലെ എസ്.ഐയും,റെയില്വേ സുരക്ഷാ സേനയിലെ ജവാനും ഉള്പ്പെടുന്നു. റെയില്വേ സുരക്ഷാസേനയിലെ ജവാന് സുഖ്നാഥ് ഡി.സിങ്, ബിഹാര് പോലീസിലെ എസ്.ഐ.കുമാര് അമിത് എന്നിവരും മുഹമ്മദ് അന്സാരി എന്ന യാത്രക്കാരനുമാണ് കൊല്ലപ്പെട്ടത്. അഞ്ചുപേരെ പരിക്കുകളോടെ ആശുപത്രിയില് പ്രവേശിപ്പിച്ചിട്ടുണ്ട്. പരിക്കേറ്റ റെയില്വേ ജീവനക്കാരന് മനോജ് കുമാര് സിങ്ങിന്റെ നില ഗുരുതരമാണ്. നൂറോളം വരുന്ന മാവോവാദികള് ധന്ബാദ് പാറ്റ്ന ഇന്റര് സിറ്റി എക്സ്പ്രസ്സിനു നേരെയാണ് ആക്രമണം നടത്തിയത്.
ജാമുയി റെയില്വേ സ്റ്റേഷനിലേക്ക് തീവണ്ടി അടുത്തുകൊണ്ടിരിക്കെ കുന്ദ്രയ്ക്ക് സമീപം വെച്ചായിരുന്നു ആക്രമണം. തീവണ്ടിക്ക് സുരക്ഷയൊരുക്കാന് അകമ്പടി പോയ സി.ആര്.പി.എഫ്, ആര്.പി.എഫ് ഭടന്മാരുടെ ആയുധങ്ങള് പിടിച്ചെടുക്കുകയായിരുന്നു ലക്ഷ്യമെന്നാണ് നിഗമനം. ആയുധങ്ങള് പിടിച്ചെടുത്ത് മാവോവാദികള് വനത്തിലേക്ക് ഓടിമറഞ്ഞു. സംഭവത്തെ തുടര്ന്ന് ഡല്ഹി-ഹൗറ റൂട്ടിലുള്ള ട്രെയിന് ഗതാഗതം നിര്ത്തിവെച്ചു. ആക്രമണത്തെക്കുറിച്ച് വിശദമായ അന്വേഷണം നടത്താന് കേന്ദ്ര ആഭ്യന്തര മന്ത്രാലയം ഉത്തരവിട്ടു. പ്രദേശത്തെ വനമേഖലയില് മാവോവാദികള്ക്കായി സുരക്ഷാസേന തിരച്ചിലാരംഭിച്ചിട്ടുണ്ട്. മരിച്ചവരുടെ ബന്ധുക്കള്ക്ക് അഞ്ചുലക്ഷം രൂപ സഹായധനം നല്കുമെന്ന് റെയില്വേ മന്ത്രി സി.പി.ജോഷി ഡല്ഹിയില് അറിയിച്ചു. പരിക്കേറ്റവര്ക്ക് ഒരുലക്ഷം രൂപവീതം നല്കും. ഛത്തീസ്ഗഢിലെ ബസ്തര് മേഖലയില് കോണ്ഗ്രസ് നേതാക്കളുടെ വാഹനവ്യൂഹം ആക്രമിച്ച് 28 പേരെ കൊലപ്പെടുത്തിയ സംഭവം നടന്ന് ഒരു മാസമാകും മുമ്പാണ് മാവോവാദികള് യാത്രാതീവണ്ടിക്ക് നേരേ ആക്രമണം നടത്തുന്നത്.
https://www.facebook.com/Malayalivartha
