മോഡിയെ നേരിടാന്‍ സോഷ്യലിസ്റ്റ് ചേരിയുടെ വിശാല ഐക്യം വേണമെന്ന വിശ്വാസത്തില്‍ ആറു ജനതാപാര്‍ട്ടികള്‍ ഒന്നിച്ചു. മുന്‍ യു.പി. മുഖ്യമന്ത്രി മുലായം സിങ് യാദവായിരിക്കും എക്യമുന്നണിക്ക് നേതൃത്വം നല്‍കുക.ജനതാ പരിവാറിന്റെ ഔദ്യോഗിക പേരും ചിഹ്നവും പതാകയുമൊക്കെ ഇനിയും തീരുമാനിക്കാനുണ്ട്.
ആര്‍.ജെ.ഡി, ജനതാദള്‍(യു), സമാജ്‌വാദി പാര്‍ട്ടി എന്നിവയുള്‍പ്പെടെ ആറു പാര്‍ട്ടികളുടെ ഐക്യം പൂര്‍ണമായതായി ലാലു പറഞ്ഞു. ഇതുസംബന്ധിച്ച പ്രഖ്യാപനം ഉടനുണ്ടാകും. മുലായം സിങ് യാദവായിരിക്കും പുതിയ പാര്‍ട്ടിയുടെ നേതാവ്. ബിജെപിയുടെ വര്‍ഗീയ അജണ്ടകള്‍ക്ക് മറുപടി നല്‍കാന്‍ ഇത്തരത്തിലൊരു യോജിപ്പ് അനിവാര്യമാണെന്ന് പാര്‍ട്ടിയുടെ ദേശീയ എക്‌സിക്യുട്ടീവ് യോഗത്തിനുശേഷം ലാലു പ്രസാദ് യാദവ് പറഞ്ഞു.
ലാലു പ്രസാദ് യാദവിന്റെ പ്രഖ്യാപനത്തെ ജനതാദള്‍(യു) ജനറല്‍ സെക്രട്ടറി കെ.സി.ത്യാഗി സ്വാഗതം ചെയ്തിട്ടുണ്ട്. ഏപ്രില്‍ 20നകം പാര്‍ട്ടികളുടെ യോജിപ്പ് പൂര്‍ണമാകുമെന്നും ഇതുസംബന്ധിച്ച ഔദ്യോഗിക പ്രഖ്യാപനം ഉടനുണ്ടാകുമെന്നും അദ്ദേഹം പറഞ്ഞു. ലാലുവിന്റെ അനുമതി കൂടി ലഭിച്ചതോടെ ഐക്യം സംബന്ധിച്ച ചര്‍ച്ചകള്‍ക്ക് വേഗം കൂടി.
ബീഹാര്‍ മുഖ്യമന്ത്രി നിതീഷ് കുമാറും ഐഎന്‍എല്‍ഡി നേതാവ് ഓംപ്രകാശ് ചൗത്താലയും മുലായം സിങ് യാദവിന്റെ വീട്ടില്‍ അദ്ദേഹവുമായി ചര്‍ച്ച നടത്തിയിരുന്നു. ലാലുവിന്റെ പാര്‍ട്ടിയുടെ അംഗീകാരം വൈകിയതാണ് ഐക്യപ്രഖ്യാപനം നീണ്ടുപോയത്. പാര്‍ട്ടിയിലെ മുതിര്‍ന്ന നേതാക്കള്‍ ലയനത്തെ എതിര്‍ത്തിരുന്നുവെങ്കിലും, ഒരു ദിവസം നീണ്ട സുദീര്‍ഘ ചര്‍ച്ചകള്‍ക്കൊടുവില്‍ ലയന തീരുമാനത്തിന് ലാലു അംഗീകാരം നേടിയെടുത്തത്.
ഇടതുപക്ഷത്തിന്റെ കൂടെ പിന്തുണ ഉറപ്പാക്കി പഴയ വിപി സിങ് കാലം തിരിച്ചുകൊണ്ടുവരാനാകുമെന്ന പ്രതീക്ഷയിലാണ് ഈ കക്ഷികള്‍. ബിഹാറിലും ഉത്തര്‍പ്രദേശിലും 2017ല്‍ നടക്കുന്ന നിയമസഭാ തിരഞ്ഞെടുപ്പാകും ജനതാപാര്‍ട്ടികളുടെ ലയനത്തിന്റെ ആദ്യ പരീക്ഷണ വേദി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha