കടല്‍ക്കൊല കേസ്... ഇറ്റാലിയന്‍ നാവികര്‍ക്കെതിരെ എട്ട് വര്‍ഷങ്ങള്‍ നീണ്ട നിയമപോരാട്ടം കേന്ദ്ര സര്‍ക്കാര്‍ അവസാനിപ്പിക്കുന്നു
ഇറ്റാലിയന്‍ നാവികര്‍ ഇന്ത്യന്‍ കടലില്‍ നടത്തിയ വെടിവെപ്പില്‍ രണ്ട് മത്സ്യതൊഴിലാളികള്‍ കൊല്ലപ്പെട്ട കേസില്‍ എട്ട് വര്‍ഷങ്ങള്‍ നീണ്ട നിയമപോരാട്ടത്തിനൊടുവില്‍ നാവികര്‍ക്കെതിരെയുള്ള കേസ് കേന്ദ്ര സര്‍ക്കാര്‍ അവസാനിപ്പിക്കുന്നു. ഇത് സംബന്ധിച്ച് കേന്ദ്രം സുപ്രീം കോടതിയില്‍ അപേക്ഷ നല്‍കിയിട്ടുണ്ട്. അന്താരാഷ്ട്ര ആര്‍ബിട്രേഷന്‍ ട്രൈബിയോണല്‍ വിധി ചൂണ്ടിക്കാട്ടിയാണ് കേന്ദ്രം കോടതിയില്‍ അപേക്ഷ സമര്‍പ്പിച്ചത്. കടല്‍ക്കൊല കേസില്‍ ഇറ്റാലിയന്‍ നാവികര്‍ ഐക്യരാഷ്ട്രസഭയുടെ ചട്ടങ്ങള്‍ക്ക് വിരുദ്ധമായി പെരുമാറിയെന്ന് അന്താരാഷ്ട്ര ആര്‍ബിട്രേഷന്‍ ട്രൈബ്യൂണല്‍ കണ്ടെത്തിയിരുന്നു. നാവികര്‍ക്ക് എതിരെ ക്രിമിനല്‍ നടപടി സ്വീകരിച്ച ഇന്ത്യയുടെ നടപടിയും ട്രൈബ്യൂണല്‍ ശരിവച്ചിരുന്നു. എന്നാല്‍ ഇന്ത്യയിലെ കോടതികള്‍ക്ക് ഈ കേസില്‍ തീര്‍പ്പ് കല്‍പിക്കാനുള്ള അധികാരം ഇല്ലെന്നും അന്താരാഷ്ട്ര കോടതി പറഞ്ഞിരുന്നു. മത്സ്യതൊഴിലാളികളുടെ ധനസഹായം നല്‍കണമെന്നും ട്രൈബ്യൂണല്‍ വിധിച്ചു. 2012ലാണ് ഇറ്റലിയന്‍ കപ്പലായ ഇന്‍ട്രിക്കാ ലെക്‌സിയിലെ നാവികരായ മാസിമിലിയാനോ ലാത്തോറെ, സാല്‍വതോര്‍ ഗിറോണ്‍ എന്നിവരുടെ വെടിയേറ്റ് നീണ്ടകര സ്വദേശികളായ രണ്ട് മത്സ്യത്തൊഴിലാളികള്‍ കൊല്ലപ്പെടുന്നത്. കപ്പല്‍ കരയിലേക്ക് എത്തിച്ച കേരള പൊലീസ് നാവികരെ കസ്റ്റഡിയിലെടുത്തു. നീണ്ട നിയമ തര്‍ക്കങ്ങള്‍ക്കൊടുവില്‍ ഇവര്‍ക്കെതിരെയുള്ള കേസ് അന്താരാഷ്ട്ര തര്‍ക്ക പരിഹാര ട്രൈബ്യൂണലില്‍ എത്തുകയായിരുന്നു.
എന്നാല്‍ ഇറ്റാലിയന്‍ നാവികര്‍ ഇന്ത്യന്‍ കടലില്‍ നടത്തിയ കൊലപാതകം സംബന്ധിച്ച് അന്താരാഷ്ട്ര ട്രൈബ്യൂണലില്‍ വന്ന വിധി ഇന്ത്യക്ക് അനുകൂലമല്ലെന്നും, അത് മത്സ്യത്തൊഴിലാളികള്‍ക്ക് എതിരാണെന്നും ചൂണ്ടിക്കാട്ടി കേരള സ്വതന്ത്ര മത്സ്യത്തൊഴിലാളി ഫെഡറേഷന്‍. ട്രൈബ്യൂണല്‍ വിധി വന്നിട്ട് 40 ദിവസത്തോളം പിന്നിട്ട ശേഷമാണ് അത് കേന്ദ്ര സര്‍ക്കാര്‍ പുറത്തു വിടുന്നതെന്നും സ്വതന്ത്ര മത്സ്യത്തൊഴിലാളി യൂണിയന്‍ ആരോപിച്ചു.
https://www.facebook.com/Malayalivartha
