കോവിഡ് വ്യാപനം തുടരുന്നതിനിടെ അമേരിക്കയുൾപ്പെടെയുള്ള പല രാജ്യങ്ങളും കൊവിഡിനെതിരായ വാക്സിൻ കണ്ടുപിടിക്കാനുള്ള ശ്രമത്തിലാണ്.. ഹൈദരാബാദ് ആസ്ഥാനമായി പ്രവർത്തിക്കുന്ന ഭാരത് ബയോടെക്കുമായും നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയുമായും ചേർന്ന് ഇന്‍ഡ്യന്‍ കൗൺസില്‍ ഫോർ മെഡിക്കല്‍ റിസർച്ച് നിർമിക്കുന്ന കൊവിഡിനെതിരായ തദ്ദേശീയമായ വാക്സിനായ കൊവാക്സിന്‍ എത്രയും വേഗം പുറത്തുറങ്ങുമെന്നാണ് റിപ്പോർട്ടുകൾ

കുരങ്ങുകളിൽ നടത്തിയ പരീക്ഷണം വൻവിജയമാണെന്ന റിപ്പോര്‍ട്ടിനു പിന്നാലെ കൊവിഡ് പരീക്ഷണ വാക്സിൻ മനുഷ്യരിൽ പരീക്ഷിക്കാനൊരുങ്ങി ബഹുരാഷ്ട്ര കമ്പനിയായ ജോൺസൺ ആൻ്റ് ജോൺസൺ. കൊവിഡ്-19നെതെിരെ ഇതുവരെ വികസിപ്പിച്ചതിൽ ഏറ്റവും ഫലപ്രദമായ വാക്സിനാണ് തങ്ങളുടേതെന്നാണ് കമ്പനി അവകാശപ്പെടുന്നത്.

കൊവിഡ് പ്രതിരോധ വാക്സിൻ രണ്ട് ഡോസ് എടുക്കേണ്ടി വരുമോ എന്ന ആശങ്ക നിലനിൽക്കുന്നതിനിടെ ജോൺസൺ ആൻ്റ് ജോൺസൺ വാക്സിൻ ഒരു ഡോസ് മാത്രം കുത്തിവെച്ചാൽ മതിയെന്നും കുരങ്ങുകളിൽ നടത്തിയ പരീക്ഷണത്തിൻ്റെ ഫലത്തിൽ പറയുന്നുണ്ട്.

കമ്പനി വികസിപ്പിച്ച പരീക്ഷണ വാക്സിൻ ആറു കുരങ്ങുകളിലാണ് കുത്തിവെച്ചത്. ഇതിനു ശേഷം ഇവയെ കൊവിഡ്-19 ബാധയേൽക്കാൻ അനുവദിച്ചെങ്കിലും അഞ്ച് കുരങ്ങുകളിലും രോഗമുണ്ടായില്ല. വാക്സിൻ കുത്തിവെച്ച ആറു കുരങ്ങുകളിലും യാതൊരു വിധ ശ്വാസകോശ രോഗങ്ങളും ഉണ്ടായില്ലെന്നും ജോൺസൺ ആൻ്റ് ജോൺസൺ വ്യക്തമാക്കി. നേച്ചര്‍ മാസികയിലാണ് വാക്സിൻ പരീക്ഷണത്തിൻ്റെ ഫലം പ്രസിദ്ധീകരിച്ചത്. വാക്സിൻ ലഭിച്ച കുരങ്ങുകളിൽ കൊവിഡിനെതിരെ പ്രതിരോധശേഷിയുണ്ടായെന്നാണ് റിപ്പോര്‍ട്ടിൽ പറയുന്നത്.

കൊവിഡിനെതിരെ ഒറ്റ ഡോസ് വാക്സിനിൽ തന്നെ മനുഷ്യര്‍ക്ക് പ്രതിരോധശേഷി നേടാനാകുമെന്ന് ആത്മവിശ്വാസം നല്‍കുന്നതാണ് വാക്സിൻ പരീക്ഷണഫലമെന്ന് ജോൺസൺ ആൻ്റ് ജോൺസൺ ചീഫ് സയൻ്റിഫിക് ഓഫീസര്‍ ഡോ. പോള്‍ വ്യക്തമാക്കി. വാക്സിൻ്റെ ആദ്യഘട്ട ക്ലിനിക്കൽ പരീക്ഷണങ്ങള്‍ ബെൽജിയത്തിലും യുഎസിലുമായിരിക്കും നടക്കുകയെന്നാണ് റിപ്പോര്‍ട്ട്.

18 വയസ്സിനും 55 വയസിനും ഇടയിൽ പ്രായമുള്ള ആയിരത്തിലധികം പേരിലായിരിക്കും പരീക്ഷണം നടതതുക. ഇതിനു പുറമെ 65 വയസിനു മുകളിൽ പ്രായമുള്ളവര്‍ക്കും വാക്സിൻ പരീക്ഷണാടിസ്ഥാനത്തിൽ നല്‍കും. ഗവേഷണവുമായി മുന്നോട്ടു പോകാനും വൻതോതിൽ ഉത്പാദനം തുടങ്ങാനും തങ്ങള്‍ക്ക് ആത്മവിശ്വാസമുണ്ടെന്നും കമ്പനി വ്യക്തമാക്കി.

യുഎസ് സര്‍ക്കാര്‍ വാക്സിൻ ഗവേഷണത്തിനായി കമ്പനിയ്ക്ക് 45.6 കോടി ഡോളറിൻ്റെ സാമ്പത്തിക സഹായമാണ് നല്‍കുന്നത്. ജൂലൈ മാസത്തിൽ ഒന്നാം ഘട്ട വാക്സിൻ പരീക്ഷണം പൂര്‍ത്തിയാക്കിയ ശേഷം സെപ്റ്റംബറോടെ മൂന്നാം ഘട്ട വാക്സിൻ പരീക്ഷണം നടത്താനാണ് ജോൺസൺ ആൻ്റ് ജോൺസൺ പദ്ധതിയിടുന്നത്.