രാജ്യത്തെ കൊവിഡ് കേസുകള്‍ പതിനേഴ് ലക്ഷത്തിലേക്ക്. തമിഴ്നാട്ടില്‍ രോഗബാധിതരുടെ എണ്ണം രണ്ടര ലക്ഷവും, ആന്ധ്രയില്‍ ഒന്നര ലക്ഷവും കടന്നു. രാജ്ഭവനിലെ പൊലീസുകാരന് രോഗം സ്ഥിരീകരിച്ചതോടെ അരുണാചല്‍ ഗവര്‍ണര്‍ ബി.ഡി. മിശ്ര കൊവിഡ് പരിശോധനയ്ക്ക് വിധേയനായി. മേഘാലയയില്‍ 27 സുരക്ഷാ ഉദ്യോഗസ്ഥര്‍ക്ക് കൂടി രോഗം സ്ഥിരീകരിച്ചു. ഡല്‍ഹിയില്‍ കണ്ടെന്റ്മെന്റ് സോണുകളുടെ എണ്ണം 715ല്‍ നിന്ന് 496 ആയി കുറഞ്ഞു. പ്രതിദിന കേസുകളുടെ എണ്ണത്തില്‍ മഹാരാഷ്ട്ര വീണ്ടും ഒന്നാം സ്ഥാനത്ത് എത്തി. 9,601 പുതിയ കേസുകളും 322 മരണവും റിപ്പോര്‍ട്ട് ചെയ്തു. ആകെ പോസിറ്റീവ് കേസുകള്‍ 4,31,719. ആകെ മരണം 15,316. പുതിയ കേസുകളുടെ എണ്ണത്തില്‍ രണ്ടാം സ്ഥാനത്ത് ആന്ധ്രയാണ്. 24 മണിക്കൂറിനിടെ 9,276 കേസുകളും 58 മരണവും റിപ്പോര്‍ട്ട് ചെയ്തു.

ആകെ പോസിറ്റീവ് കേസുകള്‍ 1,50,209 ആയി. തമിഴ്നാട്ടില്‍ 5,879ഉം, കര്‍ണാടകയില്‍ 5,172ഉം പുതിയ കേസുകള്‍ റിപ്പോര്‍ട്ട് ചെയ്തു. ചെന്നൈയില്‍ കൊവിഡ് കേസുകള്‍ ഒരു ലക്ഷം കടന്നു. ഉത്തര്‍പ്രദേശ്, ബിഹാര്‍, പശ്ചിമ ബംഗാള്‍, തെലങ്കാന, ഗുജറാത്ത്, ഒഡിഷ സംസ്ഥാനങ്ങളില്‍ രോഗവ്യാപനം തീവ്രമായി തുടരുകയാണ്.