മഹാരാഷ്ട്രയില്‍ പ്രതിദിന വര്‍ധനയില്‍ കാര്യമായ കുറവ്. കോവിഡ് പോസിറ്റീവായവരുടെ എണ്ണം നാലര ലക്ഷം പിന്നിട്ടെങ്കിലും കണ്ടെയ്ന്‍മെന്റ് സോണുകള്‍ അല്ലാത്ത പ്രദേശങ്ങളിലെ മാളുകള്‍, മാര്‍ക്കറ്റ് കോംപ്ലക്‌സുകള്‍ എന്നിവ നാളെ മുതല്‍ തുറക്കും. എന്നാല്‍, തിയറ്ററുകള്‍ക്കും ഭക്ഷണശാലകള്‍ക്കും പ്രവര്‍ത്തനാനുമതിയില്ല. സംസ്ഥാനത്ത് 8968 പേര്‍ കൂടി ഇന്നലെ പോസിറ്റീവ് ആയി. 266 പേര്‍ മരിച്ചു.

മുംബൈ കോര്‍പറേഷന്‍ പരിധിയില്‍ ആഴ്ചയില്‍ എല്ലാ ദിവസവും റോഡുകളുടെ ഇരുവശത്തുമുള്ള കടകള്‍ തുറക്കാന്‍ അനുമതി നല്‍കി. ഓരോ വശത്തെയും കടകള്‍ ഒന്നിടവിട്ട ദിവസങ്ങളിലാണ് തുറന്നിരുന്നത്. മുംബൈ കോര്‍പറേഷന്‍ പരിധിയില്‍ 70 ശതമാനത്തോളം കോവിഡ് കെയര്‍ സെന്ററുകളും ഒഴിവാക്കുന്നു. ഹോട്ടലുകള്‍, ഹോസ്റ്റലുകള്‍, ലോഡ്ജുകള്‍ എന്നിവയാണ് ഇതിനായി ഉപയോഗിച്ചിരുന്നത്.

ഞായറാഴ്ച രാത്രി കോവിഡ് സ്ഥിരീകരിച്ച കര്‍ണാടക മുഖ്യമന്ത്രി യെഡിയൂരപ്പ (78) ബെംഗളൂരു മണിപ്പാല്‍ ആശുപത്രിയില്‍ ചികിത്സയില്‍. പ്രമേഹമുള്ളതിനാല്‍ 10 ദിവസത്തോളം ആശുപത്രിയില്‍ തുടരേണ്ടി വന്നേക്കാം. മകള്‍ ബി.വൈ പത്മാവതിയും ഇവിടെ ചികിത്സയിലാണ്. മുഖ്യമന്ത്രിയുടെ ഔദ്യോഗിക വസതിയായ കാവേരിയിലെ 6 ജീവനക്കാര്‍ക്കും കോവിഡ് സ്ഥിരീകരിച്ചു. എന്നാല്‍, കഴിഞ്ഞ ദിവസം അദ്ദേഹവുമായി കൂടിക്കാഴ്ച നടത്തിയ ഗവര്‍ണര്‍ വാജുഭായ് വാലയുടെ പരിശോധനാ ഫലം നെഗറ്റീവ്. കര്‍ണാടകയില്‍ 4752പേര്‍ കൂടി പോസിറ്റീവ്. മരണം 98. പ്രതിദിന കോവിഡ് കൂടിയതിനെത്തുടര്‍ന്ന് റാപ്പിഡ് ആന്റിജന്‍ പരിശോധന വ്യാപകമാക്കി. ബെംഗളൂരുവില്‍ എല്ലാ വീടുകളിലുമെത്തി പരിശോധന നടത്തും.

തമിഴ്‌നാട്ടില്‍ കോവിഡ് സ്ഥിരീകരിച്ച കാര്‍ത്തി ചിദംബരം എംപിക്ക് നേരിയ ലക്ഷണങ്ങള്‍ മാത്രമായതിനാല്‍ ഡോക്ടര്‍മാരുടെ ഉപദേശപ്രകാരം വീട്ടില്‍ ക്വാറന്റീനില്‍ കഴിയുകയാണ്. കോവിഡ് ബാധിച്ചു രാജ്ഭവനില്‍ നിരീക്ഷണത്തില്‍ കഴിയുന്ന ഗവര്‍ണര്‍ ബന്‍വാരിലാല്‍ പുരോഹിതിന്റെ ആരോഗ്യനില തൃപ്തികരം. ഡിഎംകെ ജനപ്രതിനിധികളായ എസ്.രാമലിംഗം എംപി (മയിലാടുതുറൈ), എം.രാമചന്ദ്രന്‍ എംഎല്‍എ (തഞ്ചാവൂര്‍ ഒരത്തനാട്) എന്നിവര്‍ക്കും കോവിഡ് കണ്ടെത്തി. തമിഴ്‌നാട്ടില്‍ ഇതാദ്യമായി ഒറ്റദിന കോവിഡ് മരണം 100 കടന്നു. 109 പേരാണ് ഇന്നലെ മരിച്ചത്. 5609 പേര്‍ പോസിറ്റീവ്. രോഗ മുക്തരായവരുടെ എണ്ണം 2 ലക്ഷം കവിഞ്ഞു. ഇന്നലെ മാത്രം 5800 പേര്‍ ആശുപത്രി വിട്ടു.