മോദി സര്‍ക്കാരിനെ കണക്കറ്റ് പരിഹസിച്ച് രാഹുല്‍ പാര്‍ലമെന്റില്‍ കൈയ്യടി നേടി. രണ്ട് മാസത്തെ അവധിക്ക് ശേഷം പാര്‍ലമെന്റില്‍ എത്തിയ രാഹുല്‍ ഗാന്ധി തന്റെ ആദ്യപ്രസംഗത്തില്‍ തന്നെ മോദിയെ കടന്നാക്രമിക്കുകയായിരുന്നു.
 ഭൂമി ഏറ്റെടുക്കല്‍ ബില്ലിനെതിരെ ലോക്‌സഭയില്‍ അതിശക്തമായ പ്രതിഷേധവുമാണ് രാഹുല്‍ സഭയില്‍ ഉയര്‍ത്തിയത്.
 കര്‍ഷകരെ മറന്നുള്ള ഭരണമാണ് മോദിയുടേതെന്ന് കുറ്റപ്പെടുത്തലുമായാണ് രാഹുല്‍ ഗാന്ധി പതിനാറാം ലോക്‌സഭയിലെ തന്റെ ആദ്യ പ്രസംഗം തുടങ്ങിയത്. ഹരിത വിപ്ലവം നമുക്ക് സമ്മാനിച്ചത് കര്‍ഷകരാണെന്ന് മറക്കരുതെന്നും അദ്ദേഹം പറഞ്ഞു. മോദിയുടേത് \'നല്ല നാളുകള്‍\' സമ്മാനിച്ച സര്‍ക്കാറല്ല, മറിച്ച് കോട്ടും ബൂട്ടും ധരിച്ച സര്‍ക്കാറാണെന്നും രാഹുല്‍ പാര്‍ലമെന്റില്‍ നടത്തിയ പ്രസംഗത്തില്‍ പറഞ്ഞു.
നല്ലനാളുകള്‍ വരുമെന്ന് പറഞ്ഞ് അധികാരത്തിലെത്ത് നരേന്ദ്ര മോദി സര്‍ക്കാര്‍ കര്‍ഷിക ഉല്‍പ്പന്നങ്ങള്‍ക്ക് അടിസ്ഥാന വില നല്‍കുന്നതില്‍ പോലും പരാജയപ്പെട്ടിരിക്കയാണ്. കോണ്‍ഗ്രസ് അധികാരത്തിലിരുന്ന സമയത്ത് കാര്‍ഷിക ഉല്‍പ്പാദന രംഗത്ത് 20 ശതമാനത്തിന്റെ വര്‍ദ്ധനയാണ് ഓരോ വര്‍ഷവും ഉണ്ടായിരുന്നത്. എന്നാല്‍ നല്ല നാളുകള്‍ വാഗ്ദാനം ചെയ്ത് അധികാരത്തിലെത്തിയ സര്‍ക്കാറിന്റെ കീഴില്‍ അത് അഞ്ച് ശതമാനം മാത്രമായി കുറഞ്ഞിരിക്കയാണ്. കര്‍ഷകര്‍ക്ക് വേണ്ടി എല്ലാം ചെയ്യുമെന്നാണ് പ്രധാനമന്ത്രി പറഞ്ഞത്. എന്നാല്‍, ഒന്നും ചെയ്തുകണ്ടില്ല. കര്‍ഷകര്‍ക്ക് നിലനില്‍പ്പില്ലാതെ എങ്ങനെ രാജ്യം ശക്തിപ്പെടുമെന്നം രാഹുല്‍ ഗാന്ധി ചോദിച്ചു.
ഏതൊക്കെ മേഖലകളില്‍ അപ്രതീക്ഷിത മഴയില്‍ കാര്‍ഷകര്‍ ദുരിതം അനുഭവിക്കുന്നുണ്ട്? വിഗദ്ധരായ നിങ്ങള്‍ക്ക് ഇതേക്കുറിച്ച് അറിവില്ലേ.? പ്രധാനമന്ത്രിക്കോ കൃഷിമന്ത്രിക്കോ ഇതേക്കുറിച്ച് അറിയാമോ? അതേക്കുറിച്ച് അറിയാനായി പ്രധാനമന്ത്രി ഇത്തരം മേഖലകള്‍ സന്ദര്‍ശിക്കണമെന്നാണ് തന്റെ അഭിപ്രായമെന്നം അദ്ദേഹം പറഞ്ഞു. എന്തായാലും ഒരു കാര്യം ഉറപ്പാണ്. ഈ സര്‍ക്കാര്‍ കര്‍ഷകരെ പൂര്‍ണ്ണമായും തഴഞ്ഞിരിക്കയാണ്. തൊഴിലാളികളുടെ കാര്യവും ഇതുതന്നെയാണ്. കര്‍ഷകരെ തഴയുന്ന സര്‍ക്കാര്‍ ചെയ്യുന്നത് വലിയ തെറ്റാണെന്നും രാഹുല്‍ ഗാന്ധി പ്രസംഗത്തില്‍ പറഞ്ഞു.
രാഹുലിന്റെ പ്രസംഗത്തിനിടെ നിരവധി തവണ ഭരണ പക്ഷ ബഞ്ചില്‍നിന്ന് ബഹളം ഉയര്‍ന്നു. സര്‍ക്കാരിനെ വിമര്‍ശിക്കുന്ന രാഹുലിന്റെ പരാമര്‍ശങ്ങളുയര്‍ന്നപ്പോള്‍ കോണ്‍ഗ്രസ് അംഗങ്ങള്‍ ഡെസ്‌കിലടിച്ച് പ്രോത്സാഹിപ്പിക്കുകയും ചെയ്തു. കോട്ടും സ്യൂട്ടും ധരിച്ച സര്‍ക്കാറാണ് ഇപ്പോഴത്തേതെന്ന് രാഹുല്‍ പറഞ്ഞപ്പോള്‍ പ്രതിപക്ഷ ബഞ്ചില്‍ നിന്നും പ്രതിഷേധം ഉയരുകയും ചെയ്തു. നരേന്ദ്ര മോദി ധരിച്ച പത്ത് ലക്ഷം രൂപയുടേതെന്ന് മാദ്ധ്യമങ്ങള്‍ വാര്‍ത്തയെഴുതിയ കോട്ടിനെ കുറിച്ചായിരുന്നു രാഹുലിന്റെ ഈ പരാമര്‍ശം.
അതേസമയം രാഹുലിന്റെ ആരോപണങ്ങള്‍ക്ക് മറുപടി നല്‍കിയ മന്ത്രി വെങ്കയ്യ നായിഡു കര്‍ഷകര്‍ക്ക് വേണ്ടി പ്രവര്‍ത്തിക്കുന്ന സര്‍ക്കാറാണിതെന്ന് അവകാശപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha