രാജ്യത്ത് കോവിഡ് 19 രൂക്ഷമായിരിക്കെ കൊവിഡ് ബാധിച്ച് മരിച്ചവരില്‍ 50 ശതമാനം ആളുകളും 60 വയസിന് മുകളില്‍ പ്രായമുളളവരെന്ന് കേന്ദ്ര ആരോഗ്യ മന്ത്രാലയം. 37 ശതമാനം മരണം സംഭവിച്ചിരിക്കുന്നത് 45നും 60നും ഇടയില്‍ പ്രായമുളളവര്‍ക്കാണ്. 11 ശതമാനം മരണം സംഭവിച്ചിരിക്കുന്നത് 26 നും 44നും ഇടയില്‍ പ്രായമുളളവര്‍ക്കാണ്. 18നും 25നും ഇടയില്‍ പ്രായമുളളവരുടെ മരണനിരക്ക് ഒരു ശതമാനം മാത്രമാണ്. കേന്ദ്ര ആരോഗ്യ സെക്രട്ടറി രാജേഷ് ഭൂഷണ്‍ നടത്തിയ വാര്‍ത്താ സമ്മേളനത്തിലാണ് ഇക്കാര്യം അറിയിച്ചത്.

68 ശതമാനം പുരുഷന്‍മാരും 32 ശതമാനം സ്ത്രീകള്‍ക്കുമാണ് രാജ്യത്ത് കൊവിഡ് ബാധിച്ചിരിക്കുന്നത്. ഇന്ത്യയില്‍ കൊവിഡ് രോഗമുക്തി നേടുന്നവരുടെ എണ്ണം ദിനംപ്രതി വര്‍ദ്ധിച്ചുവരികയാണെന്നും മരണനിരക്കില്‍ വന്‍ കുറവുണ്ടാകുന്നുണ്ടെന്നും രാജേഷ് ഭൂഷണ്‍ പറഞ്ഞു. രാജ്യത്ത് ഇതുവരെ രണ്ട് കോടിയിലധികം കൊവിഡ് ടെസ്റ്റുകള്‍ നടത്തിയിട്ടുണ്ട്. നിലവിലെ ആക്ടീവ് കേസുകളുടെ ഇരട്ടിയാണ് രാജ്യത്ത് രോഗമുക്തി നേടിയവരുടെയെണ്ണമെന്നും അദ്ദേഹം പറഞ്ഞു. രാജ്യത്ത് 5,86,298 ആക്ടീവ് കൊവിഡ് കേസുകളാണുളളത്. 12 ലക്ഷത്തിലേറെ പേര്‍ രോഗമുക്തരായി. 38,000ല്‍ ഏറെ പേര്‍ കൊവിഡ് ബാധിച്ച് മരണപ്പെടുകയും ചെയ്തു.