അയോധ്യയില്‍ ഇന്നു നടക്കുന്ന ഭൂമിപൂജയില്‍ പങ്കെടുക്കുന്നതിനായി പ്രധാനമന്ത്രി ന്യൂഡല്‍ഹിയില്‍ നിന്ന് രാവിലെ പ്രത്യേക വിമാനത്തില്‍ ലക്‌നൗവിലെത്തും. 11.30-ന് അയോധ്യയിലെ സാകേത് കോളജ് ഹെലിപാഡിലെത്തുമെന്നാണ് സംഘാടകര്‍ അറിയിച്ചിരിക്കുന്നത്. തുടര്‍ന്ന് ഹനുമാന്‍ ഗഡി ക്ഷേത്രത്തിലും രാം ലല്ല വിഗ്രഹമുള്ള താല്‍ക്കാലിക ക്ഷേത്രത്തിലും പൂജയ്ക്കും ദര്‍ശനത്തിനും ശേഷം അദ്ദേഹം ഭൂമിപൂജയില്‍ പങ്കുകൊള്ളും.

അയോധ്യയില്‍ രാമക്ഷേത്ര ശിലാപൂജയ്ക്കു ശേഷം പ്രധാനമന്ത്രി നരേന്ദ്ര മോദി ക്ഷേത്രഭൂമിയില്‍ പാരിജാതത്തൈ നടും. പിന്നീട് ശിലാഫലകം അനാഛാദനം ചെയ്യുകയും ക്ഷേത്രനിര്‍മാണവുമായി ബന്ധപ്പെട്ട സ്റ്റാംപ് പ്രകാശിപ്പിക്കുകയും ചെയ്യും.

ഇന്നലെ മുതല്‍ ചടങ്ങിലേക്കു ക്ഷണിക്കപ്പെട്ടവര്‍ ലക്‌നൗവിലും ഫൈസാബാദിലും അയോധ്യയിലുമെത്തി. മോഹന്‍ ഭാഗവത്, ബാബാ രാംദേവ്, കര്‍സേവയില്‍ പങ്കെടുത്തു കൊല്ലപ്പെട്ടവരുടെ കുടുംബാംഗങ്ങള്‍ എന്നിവര്‍ അയോധ്യയിലെത്തി.

അയോധ്യയിലെ താമസക്കാരെ മാത്രമേ നഗരത്തിലേക്കു കടത്തുന്നുള്ളൂവെന്നു ഹനുമാന്‍ ഗഡി ക്ഷേത്രത്തിനടുത്തുള്ള കച്ചവടക്കാരന്‍ രാം നാരായണ്‍ ശ്രീവാസ്തവ പറഞ്ഞു. സരയൂ തീരത്ത് പൊതുജനങ്ങളുടെ പ്രവേശനത്തിനു കര്‍ശന നിയന്ത്രണമേര്‍പ്പെടുത്തിയതായി അയോധ്യ ജില്ലാ മജിസ്‌ട്രേട്ട് അനുജ് ഝാ പറഞ്ഞു. ക്ഷണിക്കപ്പെട്ടവര്‍ക്കു മാത്രമാണ് ഹനുമാന്‍ ഗഡിക്ക് അപ്പുറത്തേക്ക് പ്രവേശനമുള്ളത്.

കോവിഡ് ചട്ടങ്ങള്‍ കര്‍ശനമായി പാലിക്കാനാണ് പൊലീസിനുള്ള നിര്‍ദേശം. ദൂരദര്‍ശനിലടക്കം ചടങ്ങുകളുടെ തല്‍സമയ സംപ്രഷണമുണ്ട്. എല്‍ ആന്‍ഡ് ടി ഗ്രൂപ്പാണ് ക്ഷേത്ര നിര്‍മാണം നടത്തുന്നത്.

ബിജെപിയുടെ രാമക്ഷേത്ര പ്രചാരണത്തിനു നേതൃത്വം നല്‍കിയ 3 പേര്‍ ഇന്ന് അയോധ്യയില്‍ ചടങ്ങുകള്‍ നടക്കുമ്പോള്‍ അവിടെയുണ്ടാകില്ല - എല്‍.കെ. അഡ്വാനി, മുരളി മനോഹര്‍ ജോഷി, ഉമാ ഭാരതി എന്നിവരാണ് അസാന്നിദ്ധ്യം കൊണ്ട് ശ്രദ്ധനേടുന്നത്. അഡ്വാനിയെയും ജോഷിയെയും രാമക്ഷേത്രനിര്‍മാണ ട്രസ്റ്റ് ക്ഷണിക്കുന്നതുമായി ബന്ധപ്പെട്ട് വിവാദങ്ങളുണ്ടായിരുന്നു. ഇരുവരെയും ഫോണിലൂടെ ക്ഷണിച്ചെന്നും വിഡിയോ കോണ്‍ഫറന്‍സിലൂടെ അവര്‍ ചടങ്ങുകള്‍ വീക്ഷിക്കുമെന്നുമാണ് ട്രസ്റ്റ് അംഗങ്ങള്‍ പറയുന്നത്.

ഉമാ ഭാരതിക്ക് ക്ഷണം ലഭിച്ചെങ്കിലും കോവിഡ് പശ്ചാത്തലത്തില്‍ ചടങ്ങു നടക്കുമ്പോള്‍ എത്തില്ലെന്നും പിന്നീടു ദര്‍ശനം നടത്തുമെന്നും അവര്‍ വ്യക്തമാക്കി. ശ്രീരാമന്‍ ആരുടെയും കുത്തകയല്ലെന്നും ഏതു മതക്കാരനും പാര്‍ട്ടിക്കാരനും ശ്രീരാമനില്‍ വിശ്വസിക്കാമെന്നും ഉമ ഭാരതി പറയുന്ന വിഡിയോയും വൈറലായിട്ടുണ്ട്. കോണ്‍ഗ്രസ് നേതാവ് ദിഗ്‌വിജയ് സിങ് ആ വിഡിയോ ട്വീറ്റ് ചെയ്തു.

മഞ്ഞയും കാവിയും പെയിന്റണിഞ്ഞ നഗരത്തില്‍ എത്തിയ വിവിധ ദേശങ്ങളില്‍ നിന്നുള്ള രാമഭക്തര്‍ക്കായി 1.25 ലക്ഷം ലഡുവാണ് പ്രസാദമായി നല്‍കുന്നത്.