റിപ്ലബിക് ടിവിയുടെ ചീഫ് എഡിറ്ററായ അര്‍ണബ് ഗോസ്വാമി അദ്ദേഹത്തിന്റെ ഡിബീറ്റുകളിലൂടെയാണ് പ്രശ്തനാകുന്നത്. തന്റെ അഭിപ്രായം ശരിയെന്ന് സ്ഥാപിക്കാനുള്ള തിരിക്കാണ് അദ്ദേഹത്തിന്റെ ചര്‍ച്ചകള്‍. അതുകൊണ്ടു തന്നെ പലപ്പോഴും ചര്‍ച്ചകള്‍ അനിയന്ത്രിതമായ വാക്കേറ്റത്തിലേക്ക് പോകുന്നതും പതിവാണ്. ഇതുതന്നെയാണ് റിപ്പബിക് ടിവി മാര്‍ക്കറ്റ് ചെയ്യുന്നതും. ഇതിന് ഇപ്പോള്‍ കോടതിയില്‍ നിന്നും അര്‍ണബിന് തിരിച്ചടി നേരിട്ടിരിക്കുകയാണ്. കോണ്‍ഗ്രസ് നേതാവ് ശശി തരൂരിന്റെ പത്‌നി സുനന്ദ പുഷ്‌കറുടെ മരണവുമായി ബന്ധപ്പെട്ട കേസില്‍ സമാന്തര അന്വേഷണവും വിചാരണയും നടത്തിയതിന് മാധ്യമപ്രവര്‍ത്തകന്‍ അര്‍ണബ് ഗോസ്വാമിയെ ഡല്‍ഹി ഹൈക്കോടതി ചോദ്യം ചെയ്തു. സംയമനം പാലിക്കുന്നതിനും വാചാടോപങ്ങള്‍ കുറയ്ക്കുന്നതിനും അദ്ദേഹം ഉത്തരവാദിത്തം സ്വീകരിക്കണമെന്നും മാധ്യമപ്രവര്‍ത്തകനോട് കോടതി പറഞ്ഞു. ആരെങ്കിലും മാധ്യമങ്ങളുടെ വായടപ്പിക്കണമെന്ന് പറയുന്നില്ലെന്നും അതേസമയം അന്വേഷണത്തിന്റെ പവിത്രത കാത്തുസൂക്ഷിക്കണമെന്നും ജസ്റ്റിസ് മുക്ത ഗുപ്ത പറഞ്ഞു.

'ദയവായി സംയമനം പാലിക്കുക. ക്രിമിനല്‍ കേസില്‍ പോലീസ് അന്വേഷണം നടന്നുകഴിഞ്ഞാല്‍, മാധ്യമങ്ങള്‍ സമാന്തര അന്വേഷണം നടത്താന്‍ പറ്റില്ല,' ജഡ്ജി പറഞ്ഞു. ആളുകള്‍ പത്രപ്രവര്‍ത്തനത്തില്‍ ഏര്‍പ്പെടുന്നതിന് മുന്‍പ് ക്രിമിനല്‍ വിചാരണയില്‍ ഒരു കോഴ്‌സ് എടുക്കേണ്ടതാണെന്ന് കോടതി അഭിപ്രായപ്പെട്ടു. 'മാധ്യമങ്ങള്‍ക്ക് ആരെയും ശിക്ഷിക്കാന്‍ കഴിയില്ല' അല്ലെങ്കില്‍ ആരെയെങ്കിലും കുറ്റവാളിയാണെന്ന് വാദിക്കാനോ അല്ലെങ്കില്‍ തെളിവില്ലാത്ത മറ്റേതെങ്കിലും അവകാശവാദങ്ങള്‍ ഉന്നയിക്കാനോ കഴിയില്ല. അന്വേഷണത്തിലോ വിചാരണയിലോ ഉള്ള കാര്യങ്ങളെക്കുറിച്ച് റിപ്പോര്‍ട്ടുചെയ്യുമ്പോള്‍ മാധ്യമങ്ങള്‍ ശ്രദ്ധയും ജാഗ്രതയും പാലിക്കണമെന്ന് 2017 ഡിസംബര്‍ ഒന്നിലെ ഉത്തരവിനെ ഹൈക്കോടതി പരാമര്‍ശിച്ചു.

ഭാവിയില്‍ അവര്‍ സംയമനം പാലിക്കുമെന്നും അതോടൊപ്പം 'മാധ്യമവിചാരണ' ഒഴിവാക്കുമെന്നും മാധ്യമപ്രവര്‍ത്തകന്റേയും ചാനലിന്റേയും അഭിഭാഷകന്‍ കോടതിക്ക് ഉറപ്പ് നല്‍കിയതായി 2017 ലെ ഉത്തരവില്‍ രേഖപ്പെടുത്തിയിട്ടുണ്ട്.അവരുടെ പക്കല്‍ തെളിവുണ്ടെന്ന ചാനലിന്റെ അവകാശവാദം, ജഡ്ജി ചോദ്യം ചെയ്തു. 'നിങ്ങള്‍ സ്ഥലത്തുണ്ടായിരുന്നോ? നിങ്ങള്‍ ഒരു ദൃക്‌സാക്ഷിയാണോ? അന്വേഷണവുമായി ബന്ധപ്പെട്ട് ചില പവിത്രതയുണ്ട്,' ജഡ്ജി പറഞ്ഞു. എയിംസില്‍ നിന്ന് തെളിവുകള്‍ ഉണ്ടെന്നും അതിന്റെ അടിസ്ഥാനത്തിലാണ് ചില കാര്യങ്ങള്‍ സംപ്രേഷണം ചെയ്തതെന്നും അര്‍ണബിന്റെ അഭിഭാഷക മാള്‍വിക ത്രിവേദി പറഞ്ഞു. ക്രിമിനല്‍ വിചാരണയില്‍ തെളിവ് എന്താണെന്ന് തീരുമാനിക്കുന്നത് കോടതിയാണെന്നും പ്രസ്താവനകള്‍ തെളിവുകളല്ലെന്നും ജഡ്ജി പറഞ്ഞു. 'അന്വേഷണ ഏജന്‍സി സമര്‍പ്പിച്ച കുറ്റപത്രത്തിനെതിരായ അപ്പീല്‍ പരിഗണിക്കാന്‍ മാധ്യമങ്ങള്‍ക്ക് കഴിയുമോ,' ജഡ്ജി ചോദിച്ചു. 'ഇത് വാദിയുടെ (തരൂര്‍) എതിര്‍ ഹര്‍ജിയല്ല, മറിച്ച് അന്വേഷണ ഏജന്‍സിയാണ്. സമാന്തര അന്വേഷണമോ വിചാരണയോ ഉണ്ടോ?കോടതികള്‍ സ്വന്തം കാര്യം ചെയ്യാന്‍ നിങ്ങള്‍ ആഗ്രഹിക്കുന്നില്ലേ? 'ജഡ്ജി പറഞ്ഞു.

തനിക്കരെതിരെ അപകീര്‍ത്തികരമായ പരാമര്‍ശം നടത്തുന്നതുമായി ബന്ധപ്പെട്ട് അര്‍ണബ് ഗോസ്വാമിക്കെതിരെ ഇടക്കാല ഉത്തരവ് ആവശ്യപ്പെട്ട് കോണ്‍ഗ്രസ് എംപി തരൂര്‍ സമര്‍പ്പിച്ച ഹര്‍ജിയായിരുന്നു ഹൈക്കോടതി പരിഗണിച്ചത്. പ്രതികളെ (അര്‍ണബ് ഗോസ്വാമിയും അദ്ദേഹത്തിന്റെ ചാനലും) അവരുടെ അഭിഭാഷക വഴി ഇക്കാര്യത്തില്‍ അടുത്ത ഹിയറിങ്ങില്‍ പ്രസ്താവന സമര്‍പ്പിക്കണമെന്നും കോടതി പറഞ്ഞു.ജൂലൈ, ഓഗസ്റ്റ് മാസങ്ങളില്‍ ടിവി ചാനലില്‍ തന്നെക്കുറിച്ച് പരാമര്‍ശിച്ച് നടന്ന പരിപാടികളുടെ സംപ്രക്ഷേപണവുമായി ബന്ധപ്പെട്ടാണ് തരൂരിന്റെ പരാതി. സുനന്ദ പുഷ്‌കര്‍ കേസ് പോലീസിനേക്കാള്‍ നന്നായി തങ്ങള്‍ അന്വേഷിച്ചുവെന്നും പുഷ്‌കര്‍ കൊല്ലപ്പെട്ടുവെന്ന് തനിക്ക് ഇപ്പോഴും സംശയമില്ലെന്നും അര്‍ണബ് ആ പരിപാടിയില്‍ അവകാശപ്പെട്ടിരുന്നു. വസ്തുതാപരമായി ശരിയോ സ്ഥാപിതമോ ആയ കാര്യങ്ങള്‍ മാത്രം റിപ്പോര്‍ട്ട് ചെയ്യാന്‍ മാധ്യമപ്രവര്‍ത്തകനോട് നിര്‍ദ്ദേശിക്കണമെന്ന് അഭിഭാഷകരായ ഗൗരവ് ഗുപ്ത, മുഹമ്മദ് എ ഖാന്‍ എന്നിവര്‍ മുഖേന തരൂര്‍ സമര്‍പ്പിച്ച അപേക്ഷയില്‍ ആവശ്യപ്പെടുന്നുണ്ട്.

തരൂരിന്റെ അപേക്ഷയില്‍ ഹൈക്കോടതി മാധ്യമപ്രവര്‍ത്തകന്റെ പ്രതികരണം തേടി, നവംബര്‍ 20 ന് കൂടുതല്‍ വാദം കേള്‍ക്കുന്നതിനായി പട്ടികപ്പെടുത്തി. സുനന്ദയുടെ മരണവുമായി ബന്ധപ്പെട്ട് അര്‍ണബും ചാനലും സംപ്രേഷണം ചെയ്യുന്ന വാര്‍ത്തകള്‍ക്കെതിരേ തരൂര്‍ സമര്‍പിച്ച മൂന്ന് പരാതികളിലായിരുന്നു 2017ലെ കോടതി ഉത്തരവ്. ഈ വാര്‍ത്തകളില്‍ തനിക്കെതിരേ അപകീര്‍ത്തി പരാമര്‍ശങ്ങള്‍ ചാനലും മാധ്യമപ്രവര്‍ത്തകനും നടത്തുന്നുവെന്നായിരുന്നു പരാതിയില്‍ തരൂര്‍ ചൂണ്ടിക്കാട്ടിയത്.2014 ജനുവരി 17 രാത്രി തെക്കന്‍ ദില്ലിയിലെ പഞ്ചനക്ഷത്ര ഹോട്ടലിന്റെ സ്യൂട്ട് റൂമിലാണ് സുനന്ദ പുഷ്‌കറെ മരിച്ച നിലയില്‍ കണ്ടെത്തിയത്. സുനന്ദ പുഷ്‌കറുടെ മരണവുമായി ബന്ധപ്പെട്ട വസ്തുതകള്‍ വ്യക്തമാക്കുന്ന വാര്‍ത്തകള്‍ മാധ്യമപ്രവര്‍ത്തകനും വാര്‍ത്താ ചാനലിനും നല്‍കാമെന്നും എന്നാല്‍ ശശി തരൂര്‍ എം.പി 'കുറ്റവാളി' എന്ന് വിളിക്കാന്‍ കഴിയില്ലെന്നും കോടതി 2017 മെയ് 29 ന് പറഞ്ഞിരുന്നു.