അവനുവേണ്ടത് നല്ല തുടക്കമാണ്; കുട്ടിക്കാലം മുതല്‍ എനിക്ക് സഞ്ജുവിനെ അറിയാം' ഗംഭീറിന് മറുപടിയുമായി തരൂര്‍
ഇന്ത്യയുടെ മികച്ച വിക്കറ്റ് കീപ്പര്‍ ബാറ്റ്‌സ്മാന്‍ മാത്രമല്ല, മികച്ച യുവ ബാറ്റ്‌സ്മാനും സഞ്ജു സാംസണ്‍ ആണെന്ന ഗൗതം ഗംഭീറിന്‍റെ ട്വീറ്റിനെ പിന്തുണച്ച്‌ ശശിതരൂര്‍ എംപി. സഞ്ജുവിനെ കുറിച്ച്‌ പറയുന്ന ഗംഭീറിന്‍റെ ട്വീറ്റ് പോസ്റ്റ് ചെയ്തായിരുന്നു തരൂരിന്‍റെ പ്രതികരണം.
'എനിക്ക് തര്‍ക്കമില്ല ഗംഭീര്‍, കുട്ടിക്കാലം മുതല്‍ എനിക്ക് സഞ്ജുവിനെ അറിയാം. 14ാം വയസ്സില്‍ അവനോട് ഞാന്‍ നീ അടുത്ത ധോണിയാവുമെന്ന് പറഞ്ഞിരുന്നു. അതിനുള്ള കഴിവും ആത്മവിശ്വാസവും അവനുണ്ട്. അവനുവേണ്ടത് നല്ല തുടക്കമാണ് - എന്ന് തരൂർ കുറിച്ചു.
ചെന്നൈ സൂപ്പര്‍ കിങ്‌സിന് എതിരെ 32 പന്തില്‍ 74 റണ്‍സ് സഞ്ജു അടിച്ചെടുത്തതിന് പിന്നാലെയാണ് സഞ്ജുവിനെ പ്രശംസിച്ചുകൊണ്ട് ഗംഭീർ രംഗത്തെത്തിയത്. മറ്റെല്ലാവരും സഞ്ജുവിനെ കൈനീട്ടി സ്വീകരിക്കുമ്ബോള്‍ ഇന്ത്യന്‍ ടീമില്‍ മാത്രം സ്ഥാനം ലഭിക്കാത്തത് വിചിത്രമാണെന്ന് ഗംഭീര്‍ പ്രതികരിച്ചിരുന്നു. സഞ്ജുവിന് വേണ്ടി മുന്‍പും ഗംഭീര്‍ പ്രതികരിച്ചിരുന്നു.
തിരുവനന്തപുരത്തിെന്‍റ സ്വന്തം സഞ്ജുവിെന്‍റ വിസ്മയ ഇന്നിങ്സായിരുന്നു അത്. തനിക്കെന്ത് ചെയ്യാനാകുമെന്ന് രാജ്യത്തിനും ലോകത്തിനും അദ്ദേഹം ഇന്നലെ കാണിച്ചുകൊടുത്തു. അദ്ദേഹത്തെക്കുറിച്ചോര്‍ത്ത് അഭിമാനിക്കുന്നു എന്നായിരുന്നു സചിന്‍ തെണ്ടുല്‍ക്കറുടെ അഭിനന്ദന ട്വീറ്റ് ചൂണ്ടിക്കാട്ടി നേരത്തേ തരൂര്‍ പ്രതികരിച്ചിരുന്നത്.
https://www.facebook.com/Malayalivartha
