മതം മാറിയാല് സാമുദായിക സംവരണം ലഭിക്കില്ല
മതംമാറിയാല് സാമുദായിക സംവരണം ലഭിക്കില്ലെന്ന് മദ്രാസ് ഹൈക്കോടതി. ക്രിസ്റ്റിയന് നാടാര് വിഭാഗത്തില് നിന്ന് ഇസ്ലാം മതത്തിലേക്ക് മതം മാറിയ യുവതിയുടെ ഹര്ജിയിലാണ് ഉത്തരവ്. മതം മാറി നേരത്തെ ലഭിച്ചിരുന്ന സംവരണം ലഭിക്കുന്നതിനാണ് യുവതി കോടതിയില് ഹര്ജി നല്കിയത്. ജസ്റ്റിസ് ആര് രവി സുബ്രഹ്മണ്യമാണ് വിധി പുറപ്പെടുവിച്ചത്. മതം മാറിയ ഒരാള്ക്ക് സാമുദായിക പരിഗണനക്ക് അര്ഹതയില്ലെന്നും ജനനത്തിലൂടെയാണ് ഒരാളുടെ പിന്നാക്കാവസ്ഥ നിര്ണയിക്കപ്പെടുന്നതെന്നും കോടതി നിരീക്ഷിച്ചു. ഒരു ഹിന്ദു, ജാതി അംഗീകരിക്കാത്ത ക്രിസ്തു മതത്തിലേക്കോ അതുപോലുള്ള മറ്റു മതങ്ങളിലേക്കോ മതം മാറിയാല് ആ വ്യക്തിയുടെ ജാതി നഷ്ടപ്പെടുന്നതായി കണക്കാക്കണമെന്ന് സുപ്രീംകോടതി വിധിയുള്ളതായും കോടതി വ്യക്തമാക്കി.
പിന്നാക്ക വിഭാഗമായ ക്രിസ്ത്യന് നാടാര് വിഭാഗത്തില് ജനിച്ച യാസ്മിന് പിന്നീട് ഇസ്ലാമിലേക്ക് മതംമാറി ആ സമുദായത്തിലുള്ള ഒരാളെ വിവാഹം കഴിച്ചു. കഴിഞ്ഞവര്ഷം തമിഴ്നാട് സംസ്ഥാനസര്ക്കാറില് ഗ്രൂപ്പ് നാലില്പ്പെട്ട ഒരു തസ്തികയിലേക്കുള്ള യാസ്മിന്റെ അപേക്ഷ 30 വയസ്സ് കഴിഞ്ഞെന്ന കാരണം ചൂണ്ടിക്കാട്ടി ബന്ധപ്പെട്ട അധികൃതര് തള്ളിക്കളഞ്ഞു. മതം മാറിയതിനാല് സംവരണം ലഭ്യമല്ലാത്ത മറ്റ് വിഭാഗക്കാരിയായി മാത്രമേ യാസ്മിനെ പരിഗണിക്കാനാവുകയുള്ളൂവെന്നും അധികൃതര് വ്യക്തമാക്കിയിരുന്നു.
എന്നാല്, തനിക്ക് ഇസ്ലാമിനവകാശപ്പെട്ട പിന്നാക്ക സമുദായ പദവി അനുവദിക്കണമെന്നും പിന്നാക്കസമുദായക്കാര്ക്കുള്ള ഉയര്ന്ന പ്രായപരിധിയായ 35 വയസ്സ് തനിക്കും ബാധകമാക്കണമെന്നും യാസ്മിന് വാദിച്ചു. ഈ വാദം ബന്ധപ്പെട്ട അധികൃതര് തള്ളിക്കളഞ്ഞതിനെതിരെയാണ് യാസ്മിന് കോടതിയിലെത്തിയത്. യാസ്മിന്റെ പരാതി തള്ളിക്കളഞ്ഞ കോടതി യാസ്മിന് പിന്നാക്ക സമുദായത്തില്പ്പെടുന്നില്ലെന്ന അധികൃതരുടെ നിരീക്ഷണം ശരിവെച്ചു.
https://www.facebook.com/Malayalivartha