യു.എന്‍ പൊതുസഭയില്‍ പ്രധാനമന്ത്രി നരേന്ദ്ര മോദിയെ വ്യക്തിപരമായി വിമര്‍ശിച്ച പാക്കിസ്ഥാന്‍ പ്രധാനമന്ത്രി ഇമ്രാന്‍ ഖാന് മറുപടി. യുക്തിഭദ്രമായ ഒരു നിര്‍ദേശവും ലോകത്തിന് നല്‍കാനില്ലാത്തവന്റെ, സ്വയം ഒന്നും എടുത്തുകാട്ടാനില്ലാത്തവന്റെ നിഷ്ഫലമായ വായാടിത്തം മാത്രമാണ് ഇമ്രാന്‍ ഖാന്റേതെന്ന് ഇന്ത്യന്‍ പ്രതിനിധി മറുപടി നൽകി. നുണകളും തെറ്റായവിവരങ്ങളും യുദ്ധക്കൊതിയും മാത്രമാണ് ഈ പ്രസ്‌താവനയിലുളളതെന്നും ഇന്ത്യന്‍ പ്രതിനിധി വ്യക്തമാക്കി.

ഐക്യരാഷ്ട്ര സഭയുടെ അന്തസിനെ ഹനിക്കുന്ന വാക്കുകളാണ് ഇമ്രാന്‍ ഖാന്റേത്. കേന്ദ്രഭരണ പ്രദേശമായ ജമ്മു കാശ്‌മീര്‍ രാജ്യത്തിന്റെ അവിഭാജ്യ ഘടകമാണെന്ന് വ്യക്തമാക്കിയ അദ്ദേഹം ജമ്മു കാശ്‌മീരില്‍ ഇന്ത്യ നടത്തുന്ന നിയമനിര്‍മ്മാണങ്ങള്‍ തീര്‍ത്തും ഇന്ത്യയുടെ ആഭ്യന്തര വിഷയം മാത്രമാണെന്നും ചൂണ്ടിക്കാട്ടി. കാശ്‌മീരിന്റെ ചില ഭാഗങ്ങള്‍ പാക്കിസ്ഥാന്‍ അനധികൃതമായി കൈവശംവച്ചിരിക്കുന്നത് മാത്രമാണ് കാശ്‌മീരുമായി ബന്ധപ്പെട്ട് ആകെ നിലനില്‍ക്കുന്ന തര്‍ക്കം. നിയമവിരുദ്ധമായി കൈവശംവച്ചിരിക്കുന്ന പ്രദേശങ്ങളില്‍ നിന്ന് ഒഴിയാനാണ് പാകിസ്ഥാനോട് ഇന്ത്യ ആവശ്യപ്പെടുന്നതെന്നും ഇന്ത്യന്‍ പ്രതിനിധി മറുപടി നൽകി.