കോവിഡ് ബാധയെ തുടര്‍ന്ന് ആഘോഷങ്ങള്‍ കുറച്ചിരിക്കുകയാണ്. കൂടുതല്‍ ആളുകള്‍ കൂടുന്ന ആഘോഷങ്ങള്‍ കഴിവതും ഒഴുവാക്കുന്നതാണ് നല്ലത്. എന്നാല്‍ ഇവിടെ ആഘോഷം കുറച്ചതിന് പിറന്നാള്‍ ദിവസം അമ്മയെയും മകളെയും കുത്തിപ്പരിക്കേല്‍പിച്ചിരിക്കുകയാണ് ബന്ധുവായ യുവാവ്. മഹാരാഷ്ട്രയിലെ നിഗ്ദിയിലാണ് സംഭവം. രാജു കെരപ്പ ഗെയ്ക്‌വാദ് തന്റെ മകളുടെ ജന്മദിനം ഇത്തവണ ചെറിയ രീതിയില്‍ ആഘോഷിക്കാമെന്ന് തീരുമാനിക്കുകയായിരുന്നു. എന്നാല്‍ വിപുലമായ ആഘോഷം പ്രതീക്ഷിച്ച ബന്ധുക്കളിലൊരാള്‍ പിറന്നാള്‍ ആഘോഷിച്ച ബാലികയെയും അവളുടെ അമ്മയെയും കുത്തിപ്പരിക്കേല്‍പിച്ചു.

സംഭവത്തില്‍ സന്തോഷ് പ്രദീപ് ഗെയ്ക്‌വാദ് (40) എന്നയാള്‍ പൊലീസിന്റെ പിടിയിലായി. ആശുപത്രിയില്‍ പ്രവേശിപ്പിച്ച അമ്മയുടെയും മകളും അപകടനില തരണം ചെയ്തതായി അന്വേഷണ ഉദ്യോഗസ്ഥര്‍ അറിയിച്ചു.
'പരാതിക്കാരനും പ്രതിയും ബന്ധുക്കളാണ്. സാധാരണയായി രാജുവും കുടുംബവും ജനമദിനം വലിയ ആഘോഷമായാണ് കൊണ്ടാടാറുള്ളത്. എന്നാല്‍ ഈ വര്‍ഷം കോവിഡ് വ്യാപനത്തെ തുടര്‍ന്ന് പരിപാടി ലളിതമാക്കി ആഘോഷിക്കാന്‍ തീരുമാനിച്ചു. ഇക്കാര്യം അറിഞ്ഞ് കുപിതനായ സന്തോഷ് നിരന്തരം പരാതിപ്പെടുന്നുണ്ടായിരുന്നു. ബിരിയാണി തയാറാക്കാത്തിനെ ചൊല്ലിയും ഇയാള്‍ കലഹിച്ചു' നിഗിഡി എസ്.ഐ വര്‍ഷ റാണി ഗാട്ടെ പറഞ്ഞു.
'തുടര്‍ന്ന് കുട്ടിയുടെ ജനമദിനം എല്ലാ വര്‍ഷത്തെയും പോലെ എന്താണ് ആഘോഷിക്കാത്തതെന്ന് ചോദിച്ച് ഇയാള്‍ രാജുവിന്റെ വീട്ടിലെത്തി കലഹിച്ചു. എന്നാല്‍ രാജുവും കുടുംബവും ഇതിനോട് അനുകൂലമായി പ്രതികരിച്ചില്ല.
തുടര്‍ന്ന് കുപിതനായ പ്രതി പരാതിക്കാരന്റെ ഭാര്യയെ മൂര്‍ച്ചയേറിയ ആയുധം ഉപയോഗിച്ച് കുത്തി. അമ്മയെ രക്ഷിക്കാനായി ഓടിയെത്തിയ മകളെയും ഇയാള്‍ ആക്രമിക്കുകയായിരുന്നു. കൈ, വിരലുകള്‍, കാല്‍പാദം എന്നിവിടങ്ങളില്‍ ഇരുവര്‍ക്കും ഒന്നില്‍ കൂടുതല്‍ മുറിവുകളുണ്ട്' വര്‍ഷറാണി കൂട്ടിച്ചേര്‍ത്തു.